Ua fa’amalosia e se Faalapotopotoga fou ua fa’aigoaina o le “30-30 Strong American Samoa” le atunu’u atoa ina ia soifua ma ola i se olaga soifua maloloina, ina ia faigofie ai ona tete’e i fa’ama’i eseese, ae maua ai e le tagata soifua le tino malosi ma le mafaufau maloloina lelei.

O lenei Faalapotopotoga e le galulue moni tupe fa’asili (non profit organization) na fa’avaeina mai lea i le fa’aiuga o le tausaga na te’a nei 2017, i lalo o le ta’ita’iga a le latou Peresetene, le susuga a Jonathan Fanene, o ia fo’i lea o le Fa’atonusili o le Matagaluega o Tupulaga Talavou, Tina ma Tama’ita’i a le malo.

E na o le to’a 15 i latou na amata mai ai lenei Faalapotopotoga, peita’i o le taimi nei ua lata i le to’a 100 le atunu’u ua mafai ona avea ma totino, ae o lo o fa’aopoopo pea lava i aso ta’itasi tagata fou o lo o autova’a atu e fia auai i faagaioiga ina ia maua ai le soifua maloloina.

E amata mai lava i fanau e ta’i 8 tausaga le matutua seia oo atu i le tagata matua e 81 tausaga le matua, o i latou ia ua mae’a ona lesitalaina i lenei Faalapotopotoga.

O le sini o lenei Faalapotopotoga e pei ona saunoa Fanene, o le taumafai lea ina ia unaia le ola maloloina o tagata uma i le atunu’u, ina ia le gata e malosi le tino ae faapea fo’i ona maua le malosi o le mafaufau.

Saunoa Fanene e fa’apea, o lenei fa’amoemoe, o se vaega lea o moemitiga a le afioga i le ali’i Kovana ia Lolo Matalasi Moliga, ina ia unaia polokalame eseese e mafai ai ona fesoasoani i le atunuu e tete’e atu ai i fa’ama’i eseese o loo a’afia ai le to’atele.

O lenei vaitau ua i ai le atunu’u, ua tele naua fa’ama’i le pipisi eseese ua a’afia ai tagatanu’u o Amerika Samoa, ma ua oo lava fo’i i fanau laiti ua a’afia ai i latou. O ni isi o fa’ama’i le pipisi ua to’atele ni isi o le atunu’u ua a’afia ai e aofia ai le ma’i suka, toto maualuga, e oo lava fo’i i le kanesa.

O lenei polokalame o loo faatautaia i le Youth Hall i Pago Pago, mai le aso Gafua e oo atu i le aso Faraile, i le itula e 4:30 e oo atu i le itula e 5:30 i le afiafi. O lenei polokalame e tatala mo soo se tasi e fia auai.

A o fa’amanatuina ai i le masina lenei o Oketopa le faalauiloaina o gaioiga e tete’e atu ai i le gasegase o le Kanesa o le Susu (Breast Cancer), ua fuafua ai lenei Faalapotopotoga e tuuina atu sa latou meaalofa fa’atauva’a e lagolago ai i le Faalapotopotoga a le American Samoa Cancer Coalition, e fesoasoani ai i ni isi ua a’afia i lenei fa’ama’i.