Ads by Google Ads by Google

Fa’amalosi ni tama’ita’i talavou se to’alua toe ave i ai fualaau fa’asaina


[ata: foa'i]
ausage@samoanews.com

E to’atolu ni ali’i na pu’e fa’apagota e Leoleo i le vaiaso na te’a nei, ona o tu’uaiga i lo latou faia lea o uiga mataga le tau pulea i ni tama’ita’i talavou se to’a 2 e ta’i 14 tausaga le matutua.

 

O i latou nei e aofia ai Loma Iosia, Nick Mataia ma Apisaloma Timu. E ta’i $100,000 lea ua fa’atulaga e le afioga i le ali’i Fa’amasino ia Fiti Sunia e totogi, ona fa’atoa mafai lea ona tatala se tasi i tua mai le toese i Tafuna.

 

Afai e mafai ona tatala i tua se tasi, ua fautuaina ina ia auai i soo se taimi e valaau ai a latou mataupu, aua nei o latou toe solia se tulafono a le malo i soo se taimi, auai i taimi uma e valaau ai a latou mataupu, ma ia aua ne’i o latou toe taumafai e fa’afesoota’i molimau a le malo.

 

O le vaiaso na te’a nei na tutula’i uma ai i latou nei i luma o le Fa’amasinoga Maualuga, ma latou teena ai tu’uaiga fa’asaga ia tei latou. O le masina o Tesema lea ua fa’atulaga e toe tutula’i uma ai i latou nei mo le isi a latou iloiloga.

 

O le mataupu lenei na tofu atu i le Ofisa o Leoleo i Leone, ina ua talosagaina e se ulugali’i le fesoasoani a Leoleo, e fa’atatau i se pepa iila sa i ai vaega o le pauta pa’epa’e e masalomia o vaega ia o le pauta fa’asaina o le aisa, na maua i le taga o le ofuvae a le la tama teine e 14 tausaga le matua.

 

O le maua ai e Leoleo o le valaau mai le ulugali’i, na aga’i atu ai loa ni isi o Leoleo mo le fa’atinoina o le suesuega e uiga i lenei mataupu.

 

Na muamua faia e Leoleo se suega i le pepa iila ma fa’amaonia ai, o vaega ia o le pauta oona o le aisa.

 

Na taua e le Tina i Leoleo e fa’apea, o le po o le aso Toona’i, aso 6 o Oketopa, na fiu ai e fa’atali lana tama teine e 14 tausaga le matua ua le oo atu i le fale. Na fa’atoa oo atu i le te’a le itula e 10:30 i le po. O le isi a la tama teine na fa’atoa vaai ai i le taeao o le aso Sa na sosoo ai.

 

O tama’ita’i e to’alua na a’afia i lenei mataupu e ta’i 14 tausaga le matutua. O loo fa’aigoaina i totonu o faamaumauga a le fa’amasinoga, o T.T le isi ae o V.M le isi. Na muamua fesiligia e Leoleo ia T.T. fa’atoa fesiligia ai V.M.

 

Na taua e T.T. e fa’apea, a o la savavali i luga o le auala i se vaega o Malaeloa i le aoauli o le aso Toona’i, 6 o Oketopa, na fa’afuase’i ona tu atu se ta’avale rental o loo malaga atu ai ni ali’i se to’alua. O Nick ma Lemu.

 

O le ali’i o Nick na iloa mulimuli ane, o ia lea o Nick Mataia, o Lemu e pei ona taua, o ia lea o Loma Iosia.

 

Na faamaonia e T.T. i Leoleo, e le gata sa latou ulaina ma Nick ma Loma vaega o le pauta fa’asaina, ae sa latou feusua’i fo’i ma i laua ia.

 

E pei ona taua i le tagi a le malo e fa’apea, na piki e le ta’avale tama’ita’i nei e to’alua, ma auina atu loa i se tasi o fale i Taputimu. O iina lea na tula’i mai ai loa le fa’alavelave e pei ona tu’uaia ai i latou nei e to’atolu.

 

O gaioiga sa faia i totonu o lenei nofoaga e aofia ai le tu’uina atu e i latou nei o fualaau fa’asaina o le aisa ia T.T e fa’aula ai o ia, sosoo ai loa ma le faia o feusuaiga fa’asaga ia te ia.

 

O le tama’ita’i o V.M sa auina sa’o atu lava o ia ma ave i totonu o le potu a Loma. A o i ai Loma ma V.M i totonu o le potu, sa vaaia e V.M fualaau fa’asaina i totonu o le potu. E le gata o pepa iila o loo utu ai vaega o le pauta o le aisa, ae faapea fo’i i sikaleti mariuana ua uma ona taai. Sa teu e Loma i totonu o se apa plastic.

 

Ina ua mae’a ona teu e Loma ana fualaau fa’asaina, sa ia fa’asaga ane loa ma fa’amalosi le tama’ita’i o V.M e pei ona taua i le tagi a le malo. Na tete’e ma musu V.M peita’i sa fa’amalosi e Loma ona fai’aiga ia te ia. Ina ua mae’a, sa ia tuuina i ai le $50 ma fai e alu loa i le fale.

 

A o le i pu’e fa’apagota e Leoleo i latou nei e to’atolu, na osofa’i muamua lava e Leoleo le nofoaga na masalomia sa fa’atino ai le solitulafono, i le tau sailia lea o vaega o fualaau fa’asaina.

 

I lea osofaiga a Leoleo, sa latou maua atu i ai ma i latou e to’atolu ua molia, ma pu’e fa’apagota mai ai loa.

 

Ina ua fesiligia e Leoleo i latou nei, sa latou ioeina ai lo latou faia o gaioiga fa’asaga i tama’ita’i na a’afia, e pei o le ave i ai o fualaau fa’asaina o le pauta, atoa ai ma le faia i ai o faiga fa’afeusuaiga.