I le vaega lua o folasaga na fa'ailo ai galuega a Matagaluega o Soifua Maloloina a Samoa na lua i lenei tausaga e lua, a'o le'i toe fa'atasi e fetufa'i i ala e fesoasoani ai le tasi matagaluega i le isi, ina ia mautinoa o lo'o aga'i fa'atasi i tatou uma i le tulaga lelei atoatoa ona tausia le soifua Maloloina o Tagata o Samoa atoa, na fa'ailoa ai le folasaga tau le Ma'i Suka, So'ona Mamafa o le Tino ma a'afiaga e o'o atu ai i le Fa'amama o le Toto e Masini i atunu'u uma e lua.

O le tama'ita'i Foma'i, Dr. Annie Fuavai sa tula'i mo lea folasaga a le DOH mai Amerika Samoa. Sa ia fa'ailoa le ituaiga o afaina vave o i ai le to'atele o i latou sa inuvai mo le Ma'i Suka, ae ua i'u ina a'afia tumau ai le fatuga'o, ma ua ala ai ona le toe mafai ona galue e fa'amama le toto o tagata, ae ua fa'auia loa i latou i masini fa'amama toto.

I lea folasaga a Dr Fuavai, ua iloga ai, ua vave tele ona fa'ateleina le aotelega o i latou ua a'afia o latou fatuga'o, ma ua avea fo'i Amerika Samoa ma se atunu'u e televave tele ona maualuga le faitau aofai o i latou ua fa'amama toto i le Pasefika atoa.

I lea faitau aofai o fanau talavou uma ua mae'a suesuea mai a'oga uma i le atunu'u atoa, ua maua a'e ai, ua numera tasi lava Amerika Samoa i le RHD po'o le Ma'i Fatu. Ua tapena fo'i lenei asiasiga e toe aso Amerika Samoa, ma toe siakia ai le fanau talavou ae maise i latou sa matauina o tau a'afia, pe ua toe fa'aleleia pe ua tulaga leaga tele ma ua tatau fo'i ona taoto i latou.

I le folasaga na tapena i ai le tama'ita'i foma'i o Dr Annie Fuavai, sa saunoa ai o ia,  ma fa'ailoa, "O mea e lua e faigata tele ona faia e se tama ma tina matutua ua fa'agasegasea,  o le nofo umi lea fa'atalitalia sana talavai. E oso ai lona le fia sau i le falema'i ma ua fa'atali lava se'ia o'o ina matua tigaina. Peita'i o le mea lona lua, e alofa i le fanau ma lana fa'asoa ona e taugata talavai."

O iina sa fa'ailoa ai loa e Dr Fuavai le tulaga o i ai le totogia o talavai a tagata na taofia pe ua tetele fo'i pili o lo'o taumafai ma totogi. "Ou te alofa i le susuga le CEO o le falema'i tele i Faga'alu, aua a o'o ina tetele na'ua pili o falema'i a nei uma tagata, e tasi lava le ala e taumafai atu ai se tama po'o se tina matua, o le faia lea o se talosaga i le susuga Faumuina John Faumuina ina ia fa'aititia le pili, pe alofa fa'amagalo le pili. O le tele o nei pili o togafitiga ma le taotoga i le falema'i, e taumafai lava ina ia fa'amagalo ona o le alofa i le oioi mai o tagata lautele. Ae o le galuega e le mafai ona tu'ua, e tatau lava ona faia."

I le tulaga o talavai i Samoa ma Falema'i Fa'aitumalo na asiasia e le au usufono mai Amerika Samoa fa'atasi ai ma le au usufono uma mai Upolu, Samoa, na iloga ai le eseesega o mea uma o lo'o fa'atautaia i Salafai i ona falema'i fa'aitumalo e tolu sa asia, mai le falema'i tele i Moto'otua Apia.

Peita'i o le agaga sa fa'ailoa i le folasaga a le ali'i Fa'atonu o le Soifua Maloloina Lautele o Samoa, CEO Leausa Toelafoa Dr. Take Naseri, na ia fa'ailoa ai, "O Mea ua lelei mo Apia, Ua Tatau fo'i ona Lelei mo Savaii," ua na'o se miti i lenei lava taimi, ae ua galulue i ai le Matagaluega o le Soifua Maloloina i Samoa, ia moni lea manulauti.

I falema'i na asia, na muamua lava le falema'i fa'aitumalo i Foailalo District Hospital, lea sa maliliu mai ai tamaiti i le fa'ainuga vai a le Matagaluega. I lea falema'i e leai se foma'i e tiute ai, peita'i e to'afitu lelei Tausima'i Pasi ua latou galulue punoua'i ai i lea falema'i e talanoa i ma'i pe a sulufa'i atu mo togafitiga, ona fa'avasega lea ma fa'atulaga togafitiga e tausia ai le soifua gasegase ina ia toe manuia. E mafai fo'i ona taofia gasegase i lea falema'i, e faia uma lava nei fa'aiuga e le tama'ita'i tausima'i pule o lea falema'i fa'aitumalo.

O le falema'i na soso'o ai le asiasiga o le Sataua District Hospital ma e to'a 11 tausima'i e galulue ai, e fa'atasi fo'i ona asiasi ane i ai le foma'i mai Tuasivi i le latou falema'i i le vaiaso e tasi. O lo'o galulue fo'i i latou e tali i gasegase na sulufa'i atu e fia maua togaifitiga, o i latou fo'i e fa'atulaga ma fa'avasega vaila'au ma tui e togafitia ai nei gasegase uma.

O le toe falema'i na asia o le falema'i i Safotu. O lo'o i ai fo'i gasegase o lo'o fa'ataotolia ai o latou gasegase i le aso o le asiasiga, e na'o tausima'i e to'a 9 fo'i o lo'o va'aia uma nei gasegase i aso uma, e fa'atasi fo'i ona asiasi atu se foma'i mai Tuasivi i le latou falema'i i le vaiaso.