O le aso ananafi sa nafa ai le A'oga Maualuga i Leone, i le vaega o Pisinisi ma Tomai Eseese e a'oa'oina ai fanau, ma le taligamalo i so'o se Matagaluega, Pisinisi Tumaoti ae maise o le Vaega Au ma Lala o le Feterale na latou talia le vala'au ina ia auai i le aso fa'apitoa e filifili ai le fanau ni galuega e fiafia e galulue ai i le lumana'i.

E le gata i lea, ae na latou saunia fo'i ni folasaga taua, e fa'ailoa ai ituaiga tomai ma a'oa'oga e mana'omia ona mua'i a'oa'oina fa'apitoa ai fanau ona fa'ato'a mafai lea ona faigaluega i o latou Ofisa.

E fa vasega sa fa'atulaga mai mo le au vala'aulia e le Vaega o Pisinisi ma Tomai Fa'atekonolosi a Leone High.

O le vaega a le US Army ma isi vaega uma o le militeri, e fa'amoemoe lou ulufale i lou togi i le suega a le ASVAB, ma e maualuga lava o le Air Force, soso'o ai le US Navy, USCoasy Guard, USArmy ae mulimuli lava le USMarines.

O le folasaga a lea vaega sa fa'aalia video o ata o koleniga e ulufale atu loa le tamaititi a'oga ua i'u mai le a'oga maualuga, ona fa'atautaia lea o ana Koleniga fa'apitoa a le pasi mai ai, ua e toe fo'i i le aiga.

I le vaega a le Homeland Security na i ai sui na malaga mai fafo e faia suesuega ma fa'amaonia nisi o suesuega fa'apitoa ua mae'a i a'ao o lea matagaluega. Na fa'alologo le fanau ma ua latou iloa e mana'omia atu le maualuga o le tomai e mana'omia nai lo le na'o le Tipiloma mai a'oga maualuluga. Peita'i e i ai nisi o avanoa i totonu fo'i o lea matagaluega e mafai ona agava'a i ai le tagata ua umia le fa'ailoga tipiloma mai a'oga maualuluga, ae fa'apena fo'i ona la'ititi lona totogi.

I le ASPA, sa talanoa i a latou tautua lautele, e pei o le suavai taumafa, eletise, lapisi, ma le Suavai Lafoa'i. E le gata i lea, ua fa'ailoa e le vaega a le ASPA o i latou fo'i o lo'o taulamua i le una'iga malosi o fanau ina ia latou fiafia e fa'atauva i Poloketi tau le STEM, lea e aofia ai suesuega Saeanisi, Tekonolosi, Inisinia ma Matematika po'o le Numera.

O lo'o ua fa'ailoa mai e i latou, a o'o i le masina o Aperila i lenei tausaga o le a suia atoa le Polokalama lenei a le STEM i lana tauvaga fa'aletausaga, o le a faia i le vaiaso atoa, ae le na'o le aso To'ona'i e pei o isi tausaga e tolu talu ona amata mai.

O le latou taumafaiga fa'apitoa lea e fa'amautu ai le latou mau, e fa'atumati'e mai lenei tausaga, ia una'ia malosi le fiafia o le fanau e iloa ma suesue atili tomai fa'asaeanisi, tomai fa'ainisinia, tomai fa'amatematika ma tomai fa'atekonolosi.

I le vaega a le National Park sa malaga atu le to'a fa o latou sui mo le latou folasaga. O i latou nei sa malaga atu i fafo e fesoasoani ai i le Setete o Kalefonia ma le National Park a lea setete e tineia le afi na sasao ma fa'aleagaina ai latou Laufanua Fa'asao i Redlands California.

O le latou tomai na mana'omia e ulufale ai i lea galuega, Tipiloma High School, AA ma le ASci mai le Kolisi.

Na i ai le vasega o A'oa'oga fa'atausima'i a le Kolisi Tu'ufa'atasi. Na nafa i latou ma le folasga sili ona taua i fanau. Sa latou una'ia le fanau ina ia tau'ave mataupu fa'asaeanisi i le aoga e afua atu lava i le Aoga maualuga se'ia o'o i le Kolisi. O iina loa e mafai ai ona e sailia lou avea ai ma tausima'i pasi, e faia au suega, ae aoga tele mo le tausiga lelei o tatou tagata, ae maise matua matutua ma aiga, ua fa'agasegasea.

O latou folasaga sa aofia ai ma le sueina o le toto maualuga o fanau, le su'eina pe ma'i suka. O le isi mea, o i latou nei ua i ai fo'i ma le tomai e mafai ai ona fesoasoani i foma'i ina ia toe fa'afo'i le manava ola i so'o se tasi o le a mou atu le ola ia te ia. CPR. O lenei fo'i tomai tau Tausima'i Pasi, e ia te ia le agava'a e mafai ai ona latou faia tuiga i e gasegase e tusa ai o le ituaiga vaila'au e tuia i le tino o e gasegase ma le fuaina fo'i o le tele o lea vaila'au, ia tusa ai ma le fa'atonuga tusia a le foma'i na va'aia le gasegase.

Sa i ai le matagaluega o Tupe a le Malo, o i la'ua o tama'ita'i sa faia folasaga i ituaiga o tomai e mana'omia mo le latou Ofisa. E ui ina e mana'omia lava i latou ua umia tusi pasi maualuluga mai Kolisi pe afai e te fia galue o se Tausi Tusi ma se Suetusi a le Malo o Amerika Samoa, ae ua i ai lava nai avanoa mo nisi e faigaluega ai i le latou Ofisa e amata fa'ata'ita'i, e na'o le fa'ailoga Tipiloma High School lona agava'a o i ai.

O le faleoloa o le SSAB i Tafuna le pisinisi tumaoti sa auai i le vasega o folasaga, ma o i latou nei, sa latou fa'ailoa a latou oloa eseese ua mafai ona latou fa'aulufaleina mai, ae o lo'o i ai fo'i ma avanoa e mafai ona ulufale i ai le fanau ua taulimaina fa'ailoga Tipiloma mai A'oga Maualuluga, ma o i latou nei e o e kiliva a latou uta o meaafale, api ma pepa ua fa'atauina mai e nisi o Matagaluega o le Malo, aiga ma pisinisi.

Sa auai le Faletupe o Hawaii, ma sa latou fa'ailoa ai, "Afai e fia faigaluega le tamaititi ua umia le Tipiloma mai Aoga Maualuluga i le teritori nei i le matou faletupe, e mafai, ae i ai ma le isi tomai silisili ona taua e tatau ona agava'a ai lea tamaititi - Ia fa'amaoni - ma ia tausisi i tulafono a le Atua ma le Malo, aua le gaoi."

O i latou o le maualuga lea o le tomai e mana'omia mo a latou tagata tala tupe lea e tutu mai luma e tautuaina tagata gasolo atu e tala mai ma teu atu a latou tupe i le faletupe. E mana'omia ona iloa lelei fa'aaoga masini calculator ma masini talatupe.

I le folasaga a le Media po'o le vasega o e fa'asalalau, Leitio, Televise, Nusipepa Mekasini ma le Initeneti Facebook Twitter ma Uepesite, sa fa'alauiloa ai, o le tipiloma mai aoga maualuluga e mafai ona avea ma tusitala, tagata fa'asalalau e saunoa i alaleo o le Leitio Fa'asalalau, e avea fo'i ma Sui Fa'asalalau mai alaata o le Televise, ae ia lelei le iloa tusitusi ma tautala i le gagana Peretania ma le gagana Samoa.

I le atoaga o nei galuega uma na folasia, ua fa'ailoa mai e se tasi o fanau a'oga ina ua mae'a piliota e fa o le aso a'oga ananafi, "O le mea la lea ua iloa atu nei, afai e alu e amata galue i le mae'a ai o la'u a'oga i le High School, e maua la'u galuega, ae a le eli pu ma toso laina i le ASPA, Faitau Mita vai ma le eletise, o mea na e maua ai sa'u galuega. Ae a fia maua totogi lea e pule i lea vaega ma lea vaega, e tatau lava na uma le Kolisi ma toe oso i le Iunivesite. Na le gata lea na'o le ASPA, ae keke mai fo'i ma galuega i si matagaluega uma lava lea ua fa'alogologo atu ai nei."