Ads by Google Ads by Google

Fa'ai'uga Folasaga a Fale'aiga - Laulauina Tausami Paleni

I le toe tauaofiaga o le Fonotaga Lona 2 a le DOH Tobacco Diabetes Coalition ma Fale'aiga  tetele fo'i i le atunu'u, sa maua ai le avanoa e fa'asoa mai ai lagona o i latou o lo'o fa'atautaia pisinisi Fale'aiga i le Atunu'u, i latou sa vala'aulia fa'apitoa e fa'ailoa mai a latou mea tausami ua aga i lea mau, "Ia fa'aititia le tausami o le atunu'u i mea'ai e atili ai ona mama'i, ae ia mafuli i mea'ai paleni pe a afea o latou fale'aiga."

 

Na tula'i le tama'ita'i mai le Emilio's Restaurant i Pago Plaza ma ia fa'ailoa, "I totonu o le matou fale'aiga ua mafai ona gaosia lelei ai le Ti Moegalo, ma e alumia tele ina ua silafia e le to'atele o lo'o ua maua ia i matou lea ti. E le gata i lea, ua i ai ma le sua o le niu ua mae'a tautu mai i Ipu Malamalama.”

 

"O le Fa'i fo'i ua tautu mai ai le matou mea'ai sili ona taulia i tagata Samoa, o le fasi i'a ua tunu, lona kaleve, ma le fuala'au 'aina e sau fa'atasi ai. Ua lauiloa tele le matou ipu lena.”

 

Patipatia e le Dietician a le Falema'i Ianeta Ah Ping lea tulaga.

 

I le folasaga. a le Tropical Pizzas, ua latou aumaia ai le latou Pizzas sili ona taulia, e afa o le pizza o le Pepperoni sausage e aofia ai ma olives, tomatoes ma sosisi Italia, ae o le isi afa, ua fa'atumulia lea i le sisi, ma fualaau aina. O fua o fa'aeleeleaga mai le tatou atunu'u ua faia ai le tele o latou mea'ai sanuisi fa'apitoa  po'o Subs, e aofia ai fo'i ma pizzas i tamato ma maukeni ma pepa. O le 'aiga o moa ua mae'a fa'atulaga le coleslaw salati e 'aina fa'atasi ai ma lona kaleve po'o le papteta ua fa'amaluina.

 

Folasaga a le Koko Bean i le Laufou Shopping Center, ua latou 'aumaia ai le latou salati lea e avea o se tasi o mea'ai e mafai ona oka mai e le tagata i le latou menu, po'o le lisi o tausami ua maua ma mafai ona saunia mai e le aukuka mo oe.

 

O le folasaga a le Matai Restaurant, o mea'ai sa folasia e aofia ai le Teriyaki Chicken, o le sword fish fo'i ma le Kaleve, Shrimp Broccoli ma le fa'i e ina'i ai. Ua fa'ailoa mai ua fa'ateleina matua matutua e ulufale atu mo tausamiga, ae mana'omia lava e i latou fa'i e le fiafia i le araisa. Ua fa'atauina mai le fa'i ma fuala'au 'aina mo le gaosiga o mea'ai nei i maketi i le tatou atunu'u.

 

O le Famous Restaurant, na latou folasia a latou ipu o 'aiga tetele ma ua mafai ona ola nei mea'ai e fuafua i le to'atele o le aiga e ulufale atu, pe ta'ito'atasi fo'i e mafai lava ona talosagaina suiga fa'apena. Ua i ai le latou 'aiga o le i'a, e tausami ma le chips po'o le araisa po'o le papteta ua fa'amalu.

 

O le tetele o latou mea'ai e mafai lava ona talosaga ia le fa'atele lau asuga o le ipu, ae afai o le aiga atoa, ua totogia lava le ipu lapo'a atoa e fa'atumu, ma e tatau lava ona fa'atumu e pei ona manatu ai le tagata fa'atau. A o'o i le taimi e kuka ai le mea'ai, ona fa'aaogaina loa lea o le corn starch e fa'amalu vave atili ai le fasipovi ma fa'amanogi susua ai le mea'ai.

 

O le folasaga sa sili ona patipatia o le folasaga lea mai le Motu o Olosega, lea e malaga mai ai le tama'ita'i o Talauula Tuiolosega, e fa'atautaia e ia lona faletalimalo, ma e saunia fo'i e ia mea'ai.

 

O lana kuka na fa'ailoa mai o le Esi Moto, ave'ese ona fatu ae fa'atumu i le pilikaki ua mae'a seu fa'atasi ma le laupele, aniani, ma le aniani saina poo le fou ua fa'anini'i, ae seu atu i le sua o le popo. Oka oka tao loa i le ogaumu ma e tausami lava i le fa'i saka ma le pa'u.

 

O le isi ana kuka o le laupele, matua fufulu ma tipi nini'i, fa'amatu lelei ona fa'ato'a falai loa lea i le ga'o Olive, ae seu fa'atasi ma sina masina fa'apea ma le anianisaina ua mae'a tu'ia malu lelei. O lana vaiinu suamalie o le Laumoli.

 

O le toe folasaga o le tama'ita'i tausala lalelei o Amerika Samoa lea sa ia fa'ailoa lana Kuki e gaosia lelei i le Oatmeal po'o le polesi, leai ma ni si mea e avea i ai na'o le pata lava ma le raisins e fa'afilogia ai ia matagofie i le tausami.

 

Saunoa ali'i Pule o le puipuiga o le fofoga taumafa o le atunu'u e ala i mea'ai gaosi, John Fuimaono, sa ia fa'ailoa ai, o lenei tausaga, ua mafuli ai le matagaluega ina ia "Mataituina le Saogalemu Lautele o le Soifua o Tagata mai Mea'ai Gaosi."

 

O lona uiga, ua mae'a lena tausaga sa va'aia fa'apitoa ai e le matagaluega le tulaga o nofoaga o lo'o gaosia mai ai mea'ai, ma le agava'a fo'i o i latou o gaosia mea'ai, ae o le taimi lenei, ua va'ai toto'a le matagaluega i tulaga o le malosi o le afi e kuka ai le mea'ai, siakia fa'apitoa fo'i le vevela o le mea tausami pe o talafeagai ma le fa'atulagaga a le CDC.

 

"Ua taga'i fo'i i latou po'o tausia lelei tulafono uma tau le gaosiga o mea'ai, ma e aga'i atu ina taofia le tele o mea'ai lea e mafai ona fa'atau mai i luga o fata o faleoloa, afai e faia lea tulaga, ia ese lava se potu e mataituina ua usita'ia uma ai tulafono tau le gaosiga lelei o mea tausami mo le mamalu lautele."

 

O iina loa na sofa'i atu ai loa le fa'afesili, i le tulaga o mea'ai tu'upepa e fiafia tele fanauiti e tausasami ai ona o le taugofie, ae ua le iloga se atunu'u na gaosia ai, e le o asiasia e le tatou Ofisa o Soifua Maloloina.

 

"O le a sa outou tala i le tele na'ua o pepa chips o so'o se ituagia o lo'o folasia mai fata o faleoloa, ae a siaki atu e gaosia mai Filipaina, Saina po'o Korea, ae le'i o'o muamua se tasi e suesue nei falegaosi oloa e pei o outou faia i kamupani gaosia mea'ai iinei ma Samoa fo'i.”

 

"O se fonotaga aoga lenei mo i matou le au fai fale'aiga, ua fou fo'i manatu ina ia taumafai e fa'amasani o tatou tagata e tausami paleni i mea'ai e lelei mo le tausiga o le soifua maloloina, ae le o le matele ina fa'atetele tausami e maua ai i gasegase ma atili ai ona faigata ona soifua lelei i latou ma fiafia ma aiga,” o se tala lea a le tama'ita'i o Dina mai le Emilio Restaurant.

 

"I lenei lava fetufa'iga ua matou fa'alauiloa atu ai i le mamalu o e uma e fiafia e afea matou fale'aiga, i so'o se fale'aiga lava, ia fa'ailoa atu le mea e te mana'o ai e kuka mai mo oe, pe leai se masina, leai se pepa, aua ne'i tu'ua i ai le MSG po'o le masina saina, aua le tu'ua ai ai se ga'o, ae gaosia mai le Olive Oil, e mafai lava onaf aia mo oe. A e manatu fo'i e fa'aitiitia mai lau 'auga, pe maua ai sau tau pa'u mo lau mea'ai, fesili mai e maua lava le tali. Afai e te fia talanoa fo'i ia i matou pe mafai ona faia se suiga i lau 'aiga, e mafai lava ona fai mea uma i le fetufa'i,” o le tala lea a le tama'ita'i mai le fale'aiga o le Famous.