Ads by Google Ads by Google

Fa’ai’u i le falepuipui se vevesi na tula’i mai i fale mautotogi


[ata: foa'i]
ausage@samoanews.com

Na faai’u i le falepuipui i Tafuna le vevesi lea na tula’i mai i le va o se tama’ita’i e ana le fale mautotogi, ma le Tina na mautotogi ma lana fanau i le fale, ina ua molia e le malo le tama’ita’i e ana le faletotogi i le moliaga o le faaoolima.

 

O le mataupu lenei na tula’i mai i le aso 7 Iuni 2018, peita’i o lea faatoa faila e le malo le tagi fa’asaga i lea tama’ita’i i le vaiaso nei, i le tuana’i ai lea o masina e 2 talu ona tula’i mai lenei fa’alavelave.

 

O le tama’ita’i ua molia e le malo o Melody Afoa, lea na ulua’i tuuaia e le malo i le moliaga mamafa o le faaoolima i le tulaga lua, atoa ai ma le moliaga mama o le faaoolima i le tulaga 3.

 

Ae i le mae’a ai o le ulua’i iloiloga o le mataupu a Afoa sa faia i le vaiaso nei i luma o le afioga i le ali’i Fa’amasino ia Fiti Sunia, na solofua ai loa e le faamasinoga le tagi sa faaulu e le malo faasaga ia Afoa, ina ua le mafai e le malo ona valaau ni a latou molimau e faamaonia ai le moliaga mama.

 

O le maea ai ona solofua e le faamasinoga o le moliaga faasaga ia Afoa, na toe faila ai loa e le malo le latou tagi fou, ma faailoa ai le moliaga fou o le faaoolima i le tulaga tolu faasaga ia Afoa.

 

E $6,000 le tupe na fa’atulaga e le fa’amasinoga e totogi ona fa’atoa mafai lea ona tatala Afoa i tua, ae i le maea ai ona solofua e le faamasinoga o le moliaga mamafa fa’asaga ia te ia, na tatala ai loa e le fa’amasinoga le ua molia i tua e aunoa ma se tupe e totogi, i lalo o tuutuuga e ao ona ia usita’i ai, ao faagasolo ai taualumaga o lana mataupu.

 

O ni isi o ia tuutuuga e aofia ai le faasa lea ona ia toe taumafai e faafesootai le Tina na aafia ma lana fanau, faasa ona ia toe solia se tulafono a le malo, a ia avea o ia ma tagatanu’u faamaoni e tausisi i tulafono uma a le malo.

 

O le ali’i loia fautua ia Ryan Anderson o loo tula’i mo Afoa, ae o le ali’i loia sili lagolago ia Woodrow Pengelly o loo tula’i mo le malo.

 

O loo taua e le malo i le latou tagi e fa’apea, pe tusa o le itula e 6:44 i le afiafi o le aso 7 Iuni 2018, na vili ai e Afoa le Ofisa o Leoleo i Leone mo se fesoasoani, ina ua faaleaga e le Tina sa mautotogi i lona fale ma lana fanau le faitoto’a o lona fale. Na aga’i atu Leoleo ma latou faatalatalanoaina loa Afoa e uiga i le faalavelave.

 

Na faailoa e Afoa i Leoleo e faapea, talu mai lava le masina o Oketopa, e le i totogiina lava e le Tina lea ma lana fanau se tupe o le rent. Ona faia lea o se latou tuutuuga, o le a latou fesoasoani i le faamamaina o le fanua ma faaleleia nisi o vaega o le fale. Sa latou malilie foi e totogi le $50 i le masina mo le tau o le eletise ma le suavai.

 

Ae talu ai e le i totogiina lava e le Tina lea se $50 mo le eletise ma le vai, na mafua ai loa ona ia tipiina le eletise aga’i i le potu sa latou nonofo ai. Na taua atili e Afoa i Leoleo e faapea, na avea lea gaioiga ma itu na ita ai le Tina ma ia faaleagaina ai loa le faitoto’a o lona fale.

 

Na taua fo’i e Afoa i Leoleo e fa’apea, o lona ita tele i le gaioiga ua faia e le Tina i le faitoto’a o lona fale, na ia tago ai loa i se laau ma sasa ai le Tina lea.

 

Ina ua mae’a le talanoaga a Leoleo ma Afoa, na aga’i atu ai loa Leoleo ma fesiligia le Tina na a’afia.

 

Na taua e le Tina i Leoleo e fa’apea, na aga’i atu e aveese mai a latou meatotino o loo i ai i le fale, ina ua tipi e Afoa le moli. Na avea le ita o lana tama i le tipi o le moli ma itu na tago ai ua faapao solo laulau.

 

Na lagona mai e Afoa lea tulaga ma alu ane ai loa ma le laupapa ma sasa ai o ia. Na taua e le Tina i Leoleo e fa’aapea, e 2 ta a Afoa na tau i lona lima ma unoa uma ai, ae ina ua sasau atu e Afoa le ta lona 3, o le taimi lea na oso atu ai loa lana tama teine (Tama teine a le Tina sa mautotogi) ma sapo le laupapa.

 

Na avea le sapo e lana tama teine o le laupapa ma itu na unaoa uma ai lona lima ma lona mata.

 

Na fesiligia e Leoleo le tama teine a le Tina na a’afia, ma ia faamaonia ai fo’i le faamatalaga a lona Tina. Na taua e le tamata’i lea i Leoleo e fa’apea, na avea lona oso atu e sapo le ta i le taimi na osofai ai e Afoa lona Tina ma itu na aafia ai lona lima ma lona mata.