Na faai’u puta le inuga pia a ni ali’i faigaluega se to’a 3 mai le Kamupani i’a i le fa’aiuga o le vaiaso na te’a nei, ina ua tau fa’aolaola i le potu Tigaina (ICU) i le Falema’i o le LBJ le isi ali’i ona o ni manu’a tuga i lona manava e mafua mai i se naifi, ae taofia i le Falepuipui i Tafuna isi alii e to’alua e fa’atali ai le taimi e tutula’i ai i luma o le Fa’amasinoga.

O ali’i e to’alua na taofia e Leoleo i le falepuipui e aofia ai Laupepa Toto ma Fafau Filipi.

O le aso Gafua na te’a nei na tula’i ai Toto i luma o le Fa’amasinoga Faaitumalo, ae taofia ai pea Filipi i le Toese mo le 48 itula.

Na toe tatala i tua Toto i le aso lava lea, ina ua le manatu le malo e le faila se latou tagi fa’asaga ia te ia.

Na faailoa e le Tama’ita’i Fa’amasino o Gwen Tauiliili-Langkilde ia Toto e fa’apea, tusa lava pe ua leai se tagi a le malo fa’asaga ia te ia, ae mafai lava ona toe faila mulimuli mai se isi tagi faasaga ia te ia, pe afai e maua ai i suesuega o lo o fa’aauau a Leoleo le aafia o ia i lenei mataupu.

O le aso Lua na sosoo ai na faatoa tula’i ai loa Filipi i luma o le Fa’amasinoga. O le ali’i loia fautua lagolago ia Bob Stuart na tula’i mo ia, ae o le ali’i loia sili lagolago ia Jason Mitchell na tula’i mo le malo.

Ua molia nei Filipi i le moliaga o le faaoolima i le tulaga lua. E $5,000 le vaega tupe lea ua fa’atulaga e totogi ona fa’atoa mafai lea ona tatala o ia i tua.

Na teena e le Faamasinoga le talosaga a le loia a Filipi ina ia faaitiitia le tupe e tatala ai i tua le ua molia i le $1,000. Na taua e le Fa’amasinoga, o le tupe lea ua fa’atulaga, ua talafeagai lelei ma le mamafa o le solitulafono ua tu’uaia ai le ua molia.

TAGI A LE MALO

E pei ona taua e le malo i le latou tagi e fa’apea, o le taeao o le aso Toonai na te’a nei, Setema 13, 2019 pe tusa o le itula e 9:47, na logoina ai e se Tina le Ofisa o Leoleo i Fagatogo, e fa’atatau i se vevesi sa tula’i mai i luma o se Faleoloa i Pago Pago i le taimi lava lea.

O lea vevesi e pei ona taua e le Tina lea i Leoleo, e to’atasi le ali’i o lo o manu’a ae to’alua isi ali’i o lo o fufusu.

E le i umi se taimi ae taunu’u Leoleo faatasi ai ma sui o le EMS, ma fa’atinoina loa a latou galuega masani. Sa faia fo’i togafitiga mo le ali’i na manu’a ma faanatinati atu ai loa o ia i le Falema’i mo togafitiga.

O le taeao lava lea na taofia ai loa i le potu tigaina le ali’i na a’afia, ona o le tulaga o le manu’a sa a’afia ai le pito i luga o lona manava.

Ina ua aveese atu le ali’i sa manu’a i le falema’i, sa taofia ai loa e Leoleo ali’i e to’alua sa fufusu i le taimi o le fa’alavelave, ma auina atu loa i laua i le Ofisa o Leoleo i Fagatogo mo suesuega e uiga i lenei mataupu.

O molimau sa i ai i le taimi o le fa’alavelave, sa taua ai lo latou vaaia o ni ali’i se to’alua o lo o fufusu, ae o le isi to’atasi o loo tu i autafa o le container ma uu lona manava, a o sisina mai le toto i lona tino.

Na taua e le Tina na ia faafesoota’iina Leoleo mo se fesoasoani, a o aga’i ane le la ta’avale ma lona to’alua, sa la vaaia ni ali’i o loo fufusu i luma o se Faleoloa i Pago Pago. Na faatu le la ta’avale ae tamo’e lona to’alua e vaovao le fusuaga. O le taimi fo’i lea sa ia vaaia ai le isi ali’i o lo o manu’a o ia.

Na mafai ona fesiligia e Leoleo le ali’i na manu’a e tusa ai o lenei fa’alavelave. Na taua e le ali’i lea i Leoleo e fa’apea, o le mae’a ai o galuega i le vaveao o le aso Toona’i lea, na amata ai loa le latou inugapia ma ana uo ia e to’alua ia Toto ma Filipi.

Na amata mai le inuga i le kamupani i’a ae faai’u mai i autafa o le Faleoloa i Pago Pago. Sa manaia lava le latou inuga, sa fiafia fo’i ma talie, ae ina ua latalata i le itule e 10:00 i le taeao lea, sa ia vaaia ai loa Filipi ua ova lona ‘ona, ma ia fautuaina ai loa o ia e sili pe a alu i le fale.

Na tula’i Filipi ma savali i le itu o le auala, ona la mulimuli atu ai fo’i lea ma Toto e siaki poo fea o le a alu i ai, atoa ai ma le manatu ina ia saogalemu o Filipi. Ina ua la taufetuli atu ma Toto, na tamo’e atu Toto ma faauouo ia Filipi, ae o le taimi lea o loo ia mulimuli atu ai i le pito i tua.

Na taua e le ali’i na a’afia le faateia tele o ia ina ua ia faalogoina lona manava e pei e gase i le taimi na tuu mai ai e Filipi lona lima i lona manava. Sa ia autilo atu ma iloa ai, o le tu se tama’i naifi i lona manava, ma ia iloa ai loa iina o ia ua manua. Na vave ona ia se’i ese le naifi ma ia taumafai ai loa e taofi le sau o le toto i fafo.

O le taeao o le aso Sa na sosoo ai na faatoa mafai ai loa ona fesiligia e Leoleo le ua molia e tusa ai o lenei mataupu, lea fo’i na ia faamatalaina ai i Leoleo le latou inuga ma ana uo ina ua manava galuega mai le kamupani i’a.

Na tauae Filipi i Leoleo e fa’apea, sa i ai le taimi o le latou inuga pia na ia vaaia ai Toto ua le fiafia ia te ia. Na faateia o ia ina ua togi e Toto o ia i le apa pia, peita’i na misi le togi ina ua vave lana alo.

O le taimi lea na tula’i ai loa i luga ma alu ese mai loa ma le nofoaga o lo o faia ai le inuga pia. A o ia savali aga’i atu i le isi itu o le auala, sa ia vaaia Toto ma le ali’i ua manu’a o lo o mulimuli atu i ona tua, ma e foliga mai o loo televave atu le la savali e fasi o ia. O le taimi lea na ia tago ai loa ua se’i mai le tama’i naifi sa nana i lana ato ma uu loa i lona lima.

Na alu atu Toto ma faauouo o ia, ae o le taimi lea na ia vaaia ai le taumafai o le ali’i ua manu’a e fafa atu fo’i i ona tua. Sa ia popole ma manatu faapea, o le a fasi nei e le au alii ia o ia. O le taimi lea na ia tago ai loa i le tama’i naifi ma tui ai loa le manava o le ali’i na a’afia, ae ona faalogoina loa le tau o tu’i i ona foliga ua fasi o ia e Toto.

Na taua e Filipi lona taumafai e tali atu i gaioiga a Toto, peita’i sa fai lava si malolosi o gaioiga a lea ali’i ma manu’a tigaina ai ona foliga.

Sa maitauina ni manu’a i foliga o Filipi i le taimi na tula’i ai o ia i luma o le Fa’amasinoga Faaitumalo i le vaiaso nei.

O le aso Faraile o le vaiaso fou lea ua fa’atulaga e faia ai le ulua’i iloiloiga a Filipi i luma o le Fa’amasinoga Fa’aitumalo.