Ads by Google Ads by Google

Fa’ai’u i le Falema’i inugapia a tupulaga sa faia i Pago Pago


[ata: SN]
ausage@samoanews.com

Na fa’ai’u puta se inugapia a tupulaga o le afioga o Pago Pago i le vaiaso na te’a nei, ina ua taofia i le falema’i i Fagaalu le isi ali’i ona o manu’a tuga sa a’afia aii o ia, e mafua mai ina ua fa’ao’olima i ai se isi ali’i e fa’aaoga ai se fasi atigi fagu, ae o le isi to’alua o loo fuafua le malo e taofia ma molia i se taimi o le vaiaso nei, ona o tu’uaiga i le fa’aoolima.

 

Na faamaonia mai e se molimau fa’atuatuaina mai le falema’i o le LBJ i Fagaalu i le Samoa News, le i ai o se ali’i talavou pe a ma le 24 tausaga le matua na fa’anatinati atu i le vaveao o le aso Sa na te’a nei, Iuni 10 pe tusa o le va o le itula e 1:00 ma le 2:00 i le vaveao, ona o se manu’a tuga sa a’afia ai lona ua.

 

Na taua atili e le molimau e fa’apea, o le tulaga matuia o le manu’a sa a’afia ai le ua o le ali’i na manu’a, na mafua ai ona mana’omia se taotoga fa’anatinati i le taimi lava lea e tapuni ai le manu’a. E ui e le o se manu’a e ono ma’imau ai se soifua, ae na taua e le molimau le tulaga matuia tele o le manu’a sa a’afia ai le na manu’a.

 

O le mae’a ai o le taotoga e tapuni ai le manu’a, na toe te’a ai loa le ali’i na manu’a i tua i lona aiga. E tusa ai o se molimau sa tuuina mai i le Samoa News, e 28 filo na mana’omia e su’i ai le manu’a sa i le ua o le na a’afia.

 

O ni isi o tagatanu’u o Pago Pago sa i ai i le taimi o le fa’alavelave na latou fa’afesootaiina le Ofisa o Leoleo mo se fesoasoani, e tusa ai o ni tupulaga talavou o loo laulau vavale ma fufusu i luga o le alatele, atoa ai ma isi o loo tauai solo atigi fagupia i luga o le alatele.

 

E 2 ta’avale Leoleo na aga’i atu e tali i le valaau, peita’i o le itu fa’anoanoa e pei ona taua e ni isi o le afioaga o Pago Pago i le Samoa News, e le i mafai e Leoleo ona pu’e fa’apagota tupulaga talavou na a’afia i lenei vevesi.

 

Na taua e se molimau e fa’apea, o se inugapia sa faia i le va o tupulaga talavou a le afioaga i le po o le aso To’ona’i, na fa’ai’u ai loa i se fusuaga i le va lava o ali’i na inupia, ma i’u ina fa’aaoga ai loa e le isi ali’i se fasi atigi fagupia ta’e ma tui ai le ua o le ali’i na a’afia.

 

O le malomaloa o nei tupulaga talavou i le leva o le po na mafua ai ona feala ni isi o aiga ma mafua ai ona latou silafia le fa’alavelave o lo o tupu.

 

Na taua e se tasi o matai o le afioaga o Pago Pago e fa’apea, e lagona le fa’anoanoa ona o tulaga e pei ona tula’i mai i tupulaga o le afioaga. Sa ia taua e faapea, o le fa’alavelave e pei ona tula’i mai, ua atagia mai ai le tatau lea i le Pulega a Alii ma Faipule ona toe fa’amalosia tulaga o Vavao ma Leoleoga i le afiafi ma le po, ina ia mautinoa e le toe i ai ni inugapia e faia solo i nofoaga eseese i totonu o le nu’u.

 

Na faamaonia mai e se molimau mai le Ofisa o Leoleo, le galulue pea lea o Leoleo i le tu’u fa’atasia o le latou ripoti, ina ia mafai ai ona tuuina mai se poloaiga mai le fa’amasinoga e pu’e fa’apagota ai ali’i talavou na fa’aoo manu’a i le ali’i na a’afia.

 

O lo o i ai le fuafuaga o se taimi lava o le vaiaso nei e tatau ai ona mae’a le ripoti, ma tuuina atu ai loa i le Ofisa o le Loia Sili, mo le tapenaina lea o se talosaga e tuuina atu i le Fa’amasinoga, mo se tusi saisai e sailia mai ai i laua o le a molia i lenei fa’alavelave.