Ads by Google Ads by Google

Fa’ailoa tama’ita’i Filipino nisi tulaga fa’atatau galuega sa galue ai


[ata: SN]
ausage@samoanews.com

O le tusi a le tama’ita’i mai Filipino lea sa tu’uina atu i le Taitaifono o le Komiti Fa’afoe a le Ofisa o Femalagaaiga i le masina na te’a nei, o lo o ia taua ai ni isi o tulaga sa tutupu i totonu o le kamupani sa galue ai.

 

O ia tulaga e pei ona taua e Joselyn M. Intila, e aofia ai le ese o fa’amatalaga sa fa’ailoa atu ia te ia ao i ai i Filipaina e fa’atatau i le tele o penefiti o le a ia mauaina, ae oo mai i Amerika Samoa e le o le tulaga lea sa la fetaia’i.

 

Na fa’amaonia mai e le Taitaifono o le Komiti Fa’afoe a le Ofisa o Femalagaaiga, afioga Fanene Edda Wyberski i le Samoa News, na te le i mauaina le kopi o le tusi a Intila.

 

O Intila, lea ua poloaina e le Komiti Fa’afoe na te tuua Amerika Samoa i lona lava loto malie i le aso Faraile nei, na mae’a le aoga o lona pepa nofomau i Amerika Samoa i le aso 31 Me, 2018. Lona uiga i se isi fa’aupuga, o ia o se tagata o loo nofo fa’asolitulafono i Amerika Samoa i le taimi nei.

 

O le tusi a Intila ua tuuina atu i le Komiti Fa’afoe, o sana tali atu lea i le tusi a lana sponsor, o le pule fo’i lea o le kamupani sa galue ai o le Siniva and Armellia’s Sewing Shop, le afioga i le tama’ita’i faipule ia Vui Florence Saulo.

 

Na taua e Intila i lana tusi e fa’apea, o tala sa tuuina atu ia te ia a o i ai i Filipino, o le a sau e galue i le pisinisi a se fafine e sili ona faaaloalogia e tagata ma malosi lona tamaoaiga i Amerika Samoa. E leai fo’i se tulaga e popole ai, o le a maua fua mea uma e aunoa ma le tau totogiina.

 

“Na fa’ateia a’u ina ua ou taunu’u mai i iinei, e le o le tulaga lena sa ou vaaia i totonu o le galuega. O le tupe lea na fa’atupe ai la’u malaga mai Filipaina i Amerika Samoa, na toe tipi uma mai i lo’u totogi. E leai ma se mea na ofo fua mai e le kamupani mo a’u, ae sa ou totogiina lava le fale ou te nofo mau totogi ai, o se tasi lea o fale e i lalo o le pulega a la’u sponsor ia Vui,” o se vaega lea o le tusi a Intila.

 

Sa ia taua fo’i e fa’apea, o le tele o taimi na te talosagaina ai le tele o manaoga e pei o le fa’aleleia lea o fa’amalama o le fale ua fa’aletonu, peita’i, e pei lava o se talosaga e pau i taliga o se tagata tutuli na te le lagonaina se mea.

 

Sa faailoa atu ia te ia, o le a saunia e le kamupani masini su’isu’i fou mo ia faapea ai ma isi tama’ita’i o loo latou galulue fa’atasi, peita’i na iloa mulimuli ane, e fa’aleleia lava e le tagata lana masini su’isu’i, atoa ai ma le fa’atau e le tagata lava ia o isi mea e mana’omia i le su’iina o ofu e pei o sipi, fa’amau ma le anoanoa’i o isi mea e mana’omia i le fa’atinoina o le galuega.

 

“O le tulaga e sili ai ona mata’utia lea ituaiga si’osi’omaga, o ni isi o taimi e taua’i misa le aufaigaluega, toe gaoi fo’i e le isi tagata meatotino a le isi tagata. O le tele o taimi o taimi pe a alu atu Vui i le fale faigaluega, e le gata e leotele atu ia tei matou, ae na te faia fo’i folafolaga tau fa’afefe ia matou e aofia ai le toe fa’afo’i o matou i Filipaina,” o se vaega lea o le tusi.

 

O se tasi o taimi e pito sili ona tele ai le atuatuvale i le galuega, o le taimi e mana’omia ai le fa’amae’a o galuega, ona ua oo i le taimi e o atu ai tagata e piki a latou ofu.

 

“Afai e le mae’a le galuega i totonu o le taimi faigaluega, e totogi e matou o le aufaigaluega su’isu’i le tupe mo le failautusi lea ua alu atu e fa’atalitali le taimi e tapuni ai le fale faigaluega, pe a oo ina mae’a ona piki ofu o tagata fa’atau. Ona o lea tulaga, e manaomia ai lo’u faigaluega i le ta’i 20 itula i le aso e tasi, 7 aso o le vaiaso, ina ia mafai ai ona lava sa’u tupe e totogi ai a’u pili ua matua tele naua,” o se vaega lea o le tusi a Initila.

 

O se tasi o itu na matua lagona ai e Intila lona fa’anoanoa, o le taimi na maliu ai si ona Tama i Filipaina, ae avatu lana talosaga ia Vui e mana’omia se tupe tele mo ia ma le tuutuuga e uma ona toe totogi atu lea, ae avatu na o lana tupe aitalafu e $800.

 

Na taua e Intila, e le i alu i toe sauniga o si ona Tama i Filipaina, ona o le tulaga fa’aletonu o le itu tau tupe, ma o iina lea na mafua ai loa ona tula’i mai lona manatu e le toe fia galue mo Vui.

 

Ona o lea tulaga, sa ia talosagaina ai loa se fesoasoani mai le ulugali’i e pulea le pisinisi o le Off-the-Rock, ma mafai ai loa ona fesoasoani atu le to’alua o le ali’i e pulea le pisinisi ia te ia, e ala i le la’u atu o le tele o galuega su’isu’i na te fa’atinoina, ina ia maua ai ana tupe e tele e fesoasoani ai i le falelauasiga o si ona Tama.

 

I le fa’aiuga o le tusi, na fa’ailoa ai e Intila ia Fanene e fa’apea, i lona talitonuga, e leai ma se tulafono a le ofisa o Femalagaaiga ua ia soliina.

 

Ae fia faamanatu atu e le Samoa News e faapea, o le iloiloga a Intila sa faia i luma o le Komiti Fa’afoe i le aso Lulu o le vaiaso na te’a nei, na ta’utino ai Intila i luma o le Komiti Fa’afoe, ua ia le usitaia tulafono a le Ofisa o Femalagaaiga a Amerika Samoa.

 

Ona o lea ta’utinoga atoa ai ma mau fa’amaonia ua tauaao e le Komiti Fa’afoe, na tuuina atu ai loa e le Komiti Fa’afoe aso e 10 ia Intila na te tuua ai Amerika Samoa i lona lava loto malie. Afai e leai, o le a aveese fa’amalosi loa o ia mai totonu o Amerika Samoa, e tusa ai ma ala o le tulafono.