A o alo atu Amerika Samoa mo lana sailiga tofi i le aso, Novema 6, 2018 mai le itula e 6:00 i le taeao seia oo atu i le itula e 6:00 i le afiafi, ua toe fa’amanatu mai e le Komesina o le Ofisa o Palota a le atunu’u, susuga Dr. Lealofi Uiagalelei i le mamalu o le atunu’u ua mae’a ona lesitala, ina ia fa’ailoa lou leo e ala i tulaga o sailiga tofi a le atunu’u, aemaise ai o lou aia tatau e ala i lau palota i le aso.

E silia i le 30 Fale Palota eseese i totonu o le atunu’u o le a mafai ona e aga’i atu i ai ma fa’atino ai lau palota mo le umi e 12 itula i le aso atoa lenei. O le itula e 5:30 i le taeao e tatala ai Fale Palota eseese, ae o le itula e 6:00 e amata aloaia ai loa ona fa’agasolo faiga palota a le atunu’u.

E tusa ai ma le ripoti ua tuuina mai i le Ofisa o Palota, e tusa ma le to’a 15,542 le aofa’i o i latou ua mae’a ona lesitala mo le faiga palota o lenei tausaga. Ua faailoa mai fo’i e le Ofisa o Palota, e na o le tasi lava le pepa palota mo le sailiga tofi i Faipule o le Maota o Sui, faapea ai ma le Tofi Faipule mo le Konekeresi ma le suiga o le fa’avae.

Ua i ai le fa’amoemoe e vave ona tapunia Fale Palota mai Manu’a, i le taimi lava e mae’a ai ona faia palota a tagata palota. O le taimi lava e mae’a ai le faiga palota a le itumalo, ona amata ai loa lea ona galulue le Ofisa o Palota mo le faitauina lea o palota taitasi.

Mo Tutuila nei, o le a amata ona faitauina palota taitasi i le taimi e mae’a ai le faiga palota a le atunu’u, ma tauaao atu pusa palota ta’itasi i le Ofisa Palota i Tafuna i le afiafi o le aso.

Ua fautuaina fo’i le atunu’u ina ia fa’atali i le taimi e fa’ailoa aloaia atu ai le fa’aiuga o le palota i luga o le tautua a le KVZK-TV.

O le a faapea fo’i ona fa’ailoa atu e le Samoa News i luga o lana auaunaga masani i fesootaiga faaonaponei faaiuga o le palota mo le silafia e le atunuu.

Mo palota a i latou ua malaga ese atu ma le atunu’u, o le taimi muamua lenei o le a le toe mafai ai ona toe faitauina le faaiuga o lea palota i le Ofisa o Palota i Tafuna, ae ua tufatufaina atu e fa’atulaga ma faitau i totonu o Fale Palota eseese a itumalo ta’itasi.

Mo sui o le itumalo o Swains e palota mo le tofi Faipule i le Konekeresi, o le a fa’atinoina la latou palota i le Ofisa autu o Palota i Tafuna. E tusa ai ma le ripoti mai le Ofisa o Palota, e to’a 50 sui o Swains ua mae’a ona lesitala mo le palota.

O le a galulue fa’atasi le Ofisa o Palota ma le Ofisa o Leoleo, ae maise pulenu’u, ina ia saogalemu le palotaga mo lenei tausaga.

Ina manuia le alo atu o le atunu’u mo lana faiga palota i lenei tausaga.