I le fonotaga a le kapineta i le aso Gafua, sa fa’aalia e Kovana Lolo le laua toe fuafuaga ua mae’a fa’atulaga ina ia sailia mai tagata faigaluega a le Malo o lo ua leva le latou tautua, peita’i o lo’o maulalo lava le latou totogi, ina ia fa’ae’e ia i latou ni totogi e talafeagai ma le latou tautua ua loa.

Ua ia fa’ailoa, o le to’atele lava o nei tagata ua leva ona galulue i totogi maualalalo, o lo’o i ai latou totogi i le $12,000 se’ia o’o i le $14,000 i le tausaga atoa, ae ua latalata pe ua o’o foi i le 30 tausaga le umi o le latou tautua i le malo.

Ua fa’ailoa e Lolo i fa’atonusili, e fa’ao’o atu le lisi o nei ituaiga o tagata faigaluega Matagaluega o Tagata Faigaluega a le Malo.

Sa ia fa’amalamalama atili lea tulaga i lona fa’ailoa mai e pei o ali’i ave pasi aoga a le Matagaluega o Aoga. Ua leva ona faigaluega i latou ae le o si’tia lava lo latou totogi e sili atu i le $14,000 i le tausaga.

“Afai la e le o lava o latou totogi ua le mafai ai lava ona maua se latou malologa lelei ma ua le usupo mai ai e fa’atino latou tiute e la’u le fanau a’oga i latou a’oga, ae oo isi fanau a’oga i le ta o le 9:00. O lona uiga, e tatau ona siitia o latou totogi, ia talafeagai fo’i ma le latou galuega ua loa o faia, e fa’afiafiaina ai i latou e tatau ona faigaluega e fa’atino tiute ma le fiafia,” o se tala lea a Lolo.

Ua fa’ailoa fo’i i Fa’atonusili ta’itasi, “Ina ia faia lea tiute mo tagata faigaluega uma ua talafeagai ona fa’ae’e i ai lea manuia, ae le o faia o latou fa’aiuga fa’a’au’au i nisi ae le faia mo tagata uma ua aofia i lea fo’i taumafaiga. Fai le mea sa’o, ae le o le mea ua e manatu e te fia faia.”

Ua ia faliu fo’i i le vasega o matagaluega o le malo o lo’o fa’atupe mai e le Malo Tele, e pei o le Matagaluega o le Puipuiga o le Saogalemu Fa’alotoifale o le tatou Malo, “Afai o le a tatou manaomia ona faia le mea sao, va’ai toto’a i totogi o a outou supavaisa, e le talafeagai le $58,000 totogi o nisi ae na’o le $30,000. mo nisi. E tatau ona toe va’ai toto’a i nei ituaiga totogi e le talafeagai ma lagona o isi tagata faigaluega.”

“O le fa’amoemoe atoa lena o lenei faigamalo, ina ia siitia totogi o tagata uma ua loa le tautua ina ia si’itia ai le latou fo’i olaga saogalemu i le li’o o latou lotoifale.”

O le ala e fa’atupe ai lenei si’itaga, ua fa’ailoa mai o le tiute lena o le malo.