Ads by Google Ads by Google

Fa’ailoa fa’aiuga e le aloaia le toe filifilia o Aumua Amata mo le Konekeresi


O se va'aiga i le tama'ita'i Faipule o Amerika Samoa i le Konekeresi a le Malo tele ua toe filifilia e lona atunu'u e fa'aauau lana nofoaiga, Aumua Amata. - O ou mama na, fa'afetai mo le toe fa'afetai mai i lou malo i le taeao timuga ma le aupouli. "Afai e te iloa a'u i Togamau, ou te manatua fo'i oe i Siulepa.” [ata: Leua Aiono Frost]
ausage@samoanews.com

I le mae’a ai o le sailiga tofi a le atunu’u i le aso ananafi, ua tula’i mai ai i le fa’aiuga e le aloaia le toe filifilia o le afioga i le Tama’ita’i Faipule, tofa Aumua Amata mo le nofoa o le atunu’u i le laumua i Uosigitone, i le aofa’i o palota e 7,194 na maua, tusa lea o le 83.3% o palota sa mafai ona faitauina.

 

O lea faaiuga ua atagia mai ai le malolo o isi sui to’alua sa latou tauva mo le nofoa o le atunu’u, e aofia ai Meleagi Suitonu-Chapman ma Tuika Tuika.

 

I le toe filifilia ai o le tofa Aumua i le nofoa i le Konekeresi mo le isi 2 tausaga, ua tula’i mai ai lona nofoia o le nofoa o le atunu’u mo le taimi lona 3 i le umi e ta’i 2 tausaga i le nofoaiga.

 

O le tapunia ai o fale palota uma e 35 i totonu o le atunu’u i le itula e 6:00 i le afiafi ananafi, na amata galulue ai loa sui o le ofisa o Palota mo le amata faitauina lea o le faaiuga o le palota.

 

O fale palota mai Manu’a na muamua lava tapunia ma faitauina le fa’aiuga o le latou palota i le aoauli ananafi, ma atagia mai ai le mamao o le manumalo a Aumua mai isi sui tauva. O le manumalo ai o Aumua mai fale palota uma mai Manu’a, o se tulaga masani lava fo’i lea sa tula’i mai i isi faiga palota e 2 ua mavae atu, lea fo’i na ia manumalo ai i isi fo’i sui tauva sa latou tausinio mo le nofoa o le atunu’u.

 

Na faafetaia e le tofa Aumua le atunu’u atoa, e afua mai i Ao Fa’alupega, o Ta’ita’i fa’alemalo aemaise ai Ta’ita’i faaleaganu’u, le mamalu o le aufaipisinisi, o Toa o Samoa ma Fitafita Tuai, e tusa ai o le lagolagoina o lona fa’amoemoe.

 

Sa ia faafetaia fo’i lana Komiti aemaise ai le Komiti o Tupulaga Talavou i le lagolago malosi e sapasapaia lenei fa’amoemoe.

 

O le fa’aiuga la o le tausinioga mo le nofoa i le laumua i Uosigitone, ua tula’i mai ai Aumua i le manumalo i le aofa’i o palota e 7,194, tusa lea o le 83.3%, o Meleagi e 659 ana palota, tusa lea o le 7.6%, ma Tuika e 785 ana palota na maua, tusa lea e 9.1%.

 

O le aofa’i o palota sa mafai ona faitauina i le tausinioga i le konekeresi, tusa lea e 8,638.

 

SUIGA O LE FA’AVAE

 

Mo le palota i le suiga o le Fa’avae, e to’a 2,605 le aofa’i o i latou na palota ioe mo le suiga o le Fa’avae, tusa lea o le 30.4%, ae to’a 5,957 i latou na palota leai, tusa lea o le 69.6%.

 

O le faaiuga o le palota mo le Fa’avae ua atagia mai ai le toe teena fo’i e le atunu’u o taumafaiga a le malo e aofia ai le Fono Faitulafono ina ia faia ni suiga i le Fa’avae o le atunu’u.