Ads by Google Ads by Google

Fa’ailoa e le Tina na a’afia i le mataupu a Fiu lagona mafatia


[ata: foa'i]
ausage@samoanews.com

O le fa’ateia ai o le Tina o lo o a’afia i le mataupu o lo o tu’uaia ai le tofa a Fiu Johnny Saelua i le tulaga ua oo i ai lenei mataupu i luma o le Fa’amasinoga, na mafua ai loa ona ia filifili e fa’ailoa i le Samoa News lana fa’amatalaga e fa’atatau i le fa’alavelave na tula’i mai, ina ia silafia ai e le atunu’u le mafua’aga tonu na ala ai ona alia’e lenei mataupu.

 

O se avanoa na mafai ona maua e le Samoa News i le vaiaso na te’a nei, na fetufaa’i ai loa ma le Tina e 33 tausaga le matua o lo o tu’uaia na a’afia i lenei mataupu.

 

O se tasi o itu o lo o tu’u fesili ai le finagalo o lenei Tina, o le le toe i ai lea o se latou fesootaiga ma le Loia a le malo o lo o taulimaina lenei mataupu, atoa ai ma le ali’i Leoleo sa autu i ai le suesuega.

 

O le ali’i Loia tua ia David Vargas na filifilia e le Fa’amasinoga i le tausaga na te’a nei e avea ma Loia Tuto’atasi na te suesueina le mataupu fa’asaga ia Fiu, lagolago i ai ma le ali’i Leoleo ia Capt. P. Clemens. O le susuga i le ali’i Loia tua ia Marcellus T. Uiagalelei o lo o tula’i mo Fiu i lenei mataupu.

 

O fa’asalalauga na lomia i luga o le Samoa News i le vaiaso na te’a nei, na mafua ai ona iloa e le Tina o loo a’afia, ua mae’a ona faila le tagi a le malo fa’asaga ia Fiu.

 

O ni isi o fesili o loo fia malamalama ai lenei Tina, poo ai na sainia le pepa e aveese fa’amalosi ese ai o ia ma lona to’alua mai Amerika Samoa i le tausaga e 2016 ina ua alia’e lenei mataupu,

 

O le tausaga e 2014 e pei ona taua e le Tina i lana fa’amatalaga na amata ai ona ia vaaia suiga i uiga o Fiu e fa’aali atu ia te ia.

 

“Ou te ta’uina o ia o lo’u Tama, ae i se tasi o po i le tausaga e 2014, na ou te’i ai ina ua tatala fa’afuase’i atu e se tagata le faitoto’a o lo’u potu ao ma i ai i luga o le moega ma si a’u tama, ma ou vaaia ai Fiu ua tu atu i le faitoto’a ma sioa atu ia te a’u e aunoa ma se tala. Sa ou te’i ina ua ia tatala fa’afuase’i atu le faitoto’a e aunoa ma se tu’itu’i, ae le masani ai,” o le fa’amatalaga lea a le Tina.

 

E pei ona taua e le Tina i le Samoa News, o le po lava lea na amata ai loa ona ia vaaia suiga i uiga o Fiu na fa’aali atu ia te ia. O ni isi o taimi e tago atu ai Fiu i ona itutinosa, ae o isi o taimi na te lafo atu fa’amatalaga e atagia ai lagona tu’inanau.

 

“I le taimi atoa e 2 tausaga na tutupu ai lenei fa’alavelave, e lei fa’atasi lava ona ou talanoa i lo’u to’alua poo o’u matua e fa’atatau i uiga o Fiu na fa’aali mai ia te a’u. Sa ou popole ina ne’i iloa e lo’u to’alua ona i ai lea o se isi mea matuia e ono tula’i mai, aua ou te iloa, e feololo atu le fua o le fafine i le fua o le tamaloa,” o le molimau lea a le Tina na a’afia.

 

O le taimi lava na ta’u ai e le Tina na a’afia i lona to’alua lea mea atoa sa tula’i mai, na tula’i ese ai loa le la aiga mai le aiga o Fiu, ae aga’i atu ma nonofo i le isi aiga o le nu’u. O le taimi fo’i lea na aga’i atu ai loa le la sponsor ma fesili atu ia tei laua, pe aisea ua la o ese ai ma le fale o Fiu.

 

E pei ona taua e le Tina i lana molimau, o le la sponsor o le tuafafine o Fiu. Na fa’amatala e le ulagalii i le sponsor le mafua’aga o le la tula’i ese. Mulimuli ane, na toe filifili ai loa le ulugali’i e toe fo’i i le aiga o Fiu e fa’afetai i ai mo le latou mafutaga, ma maua ai loa ma le avanoa o le Tina na a’afia e fa’ailoa ai ia Fiu ma lona faletua ma le mafua’aga o le la tula’i ese, ona o uiga e pei ona faia e Fiu ia te ia.

 

O le vaiaso lava lea ao nonofo pea le ulugali’i ma le la fanau e to’alua i le fale o le isi aiga o le nu’u, na aga’i atu ai loa ali’i faigaluega e to’alua mai le Ofisa o Femalagaaiga, ma fa’atonu i laua ina ia latou aga’i atu i le Ofisa mo se fonotaga ma le Pule o le Ofisa o Femalagaaiga atoa ai ma le la sponsor.

 

Mulimuli ane ina ua aumai i laua, na la fa’atoa iloa ai, e le o se fonotaga, ae o lea ua fuafua e fa’afo’i fa’amalosi ese i laua mai le atunu’u ae toe fa’afo’i atu i Samoa.

 

O ni ali’i faigaluega se to’alua mai le Ofisa o Femalagaaiga na la fesiligia le mafua’aga ua ala ona tau fa’afo’i fa’amalosi i laua i Samoa, na la faia le faaiuga ma taofia ai loa le fa’afo’iina o i laua i Samoa.

 

Na sosoo ai loa ma le tuuina atu o le mataupu i le Ofisa o Sulufaiga mo tagata Puapuagatia, lea o loo ta’iulu ai le faletua ia Ipu Lefiti ma mafua ai loa ona tofu atu lenei mataupu i le ofisa o Leoleo mo suesuega.

 

O le taeao ananafi na toe valaau ai le mataupu a Fiu i luma o le Fa’amasinoga Fa’aitumalo. Ma ua toe tolopo le mataupu e toe fofogaina i le aso 15 o Oketopa i le itula e 10:30 i le taeao.