E ui i le tele o fa’afitauli ma lu’itau o lo o alia’e mai i le toese i Tafuna i le tele o taimi, peita’i e le o taofia ai fo’i le taumafai pea o le ali’i Pule ma le pulega atoa ina ia faia fo’i mea lelei ina ia mautinoa o lo o saogalemu le nofoaga mo le mamalu o le atunu’u o lo o aumau ai mo le tuliina o a latou fa’asalaga.

O le vaiaso na te’a nei na maua ai e le Samoa News le tele o fesootaiga mai ni isi o pagota, o latou aiga atoa ai ma ni isi o Leoleo, i le tele o suiga lelei ua molimauina i totonu o le nofoaga o le Toese i Tafuna i le taimi nei.

O ni isi o ia suiga e aofia ai le fausiaina lea o pa uaea i totonu ina ia puipuia ai le saogalemu o leoleo mai pagota, siitia o le auala o lo o tausia ai pagota e aofia ai ma le tulaga lelei o taumafa, aemaise ai o le fesoasoani mai le vaega e Sailia Fualaau Fa’asaina (Vice & Narcotics Units).

Na asia e le Samoa News le nofoaga o le toese i Tafuna i le vaiaso na te’a nei, ma molimauina ai suiga e pei ona taua i ripoti. O ni isi o ia suiga e aofia ai se faaopoopoga fou i luma o le faitoto’a tele e ulufale atu ai tagata i totonu, lea ua fausia ina ia mafai ai ona saogalemu le ulufale atu i totonu o le lotoa o le toese.

O totonu o le Ofisa ua mae’a ona toe fa’atele atoa ma ua sui fo’i le vaaiga i totonu, ona o le taumafai lava o le ali’i Pule ia Tauese Vaaomala Sunia ma le aufaigaluega, ia saogalemu tulaga uma mo le atunuu fegasoloa’i aemaise ai le aufaigaluega.

O totonu o le lotoa, ua fausia ai isi pa uaea e 2, e va ai le nofoaga e feoa’i ai pagota ma le vaega e i ai le ofisa mo Leoleo. O lo o fa’agasolo fo’i i le taimi nei le fausiaina o le isi pa uaea e sio ai nofoaga o loo i ai falepuipui tuai, aemaise lava le fale o le RSAT lea e latalata i le pa i le isi itu o le nofoaga, ona o iina lea o lo o masalomia, o le isi lea nofoaga o loo auala atu ai i totonu fualaau fa’asaina.

E le i maua se avanoa o le Samoa News e talanoa ai ma le tofa Tauese e tusa ai o suiga e pei ona molimauina, ae o ni isi o lo o i totonu o le nofoaga na mafai ona latou fa’asoaina mai tulaga e pei ona molimauina.

Na taua e se pagota e fa’apea, e ui o lo o tuli a latou fa’asalaga, ae latou te naunau foi ina ia saoloto le nofoaga mai le toe ofi atu i ai o fualaau fa’asaina. Na faafetaia e ni isi o pagota sa talanoa mai i le Samoa News suiga ua faia i le taimi nei, aemaise ai lava le fesoasoani mai le vaega o Leoleo mai le ‘Vice & Narcotics Units’ i le sailia lea o tagata uma e ulufale atu mo asiasiga i le faaiuga o le vaiaso.

Na taua e se tasi o Leoleo i le toese e fa’apea, o le saogalemu o tagata uma lava, o le manulauti lea o lo o ave i ai le fa’amuamua a le tofa Tauese, ina ua fa’atoa tofia o ia e fai ma Ta’ita’i o le Toese.

“O le agaga atoa o le ali’i Pule, ia lelei auala e fa’atino ai e Leoleo le galuega, ia fai ma le fa’amaoni, ia lelei le tausiga o pagota, ae silia i lo lena, ia fa’amuamua le saogalemu o tagata uma i totonu o le toese. Ia saogalemu pagota faapea ai fo’i ma le aufaigaluega i taimi uma,” o le molimau lea a le Leoleo.