Ads by Google Ads by Google

Faafesuia’i oloa na gaoia ma fualaau faasaina mai Le Aute

ausage@samoanews.com

Na taua e le ali’i mai Pago Pago lea ua molia nei i lona gaoia o meatotino mai le fale o lona aunty, o le tele o oloa na ia gaoia na alu ma faafesuia’i ma fualaau fa’asaina o le aisa mai le nofoaga o Le Aute, ae o isi meatotino sa faatau i luga o le Facebook i le polokalame e taua o le “American Samoa Dealz and Stealz”.

 

O le vaiaso na te’a nei na pue faapagota ai e Leoleo le susuga a Faiaoga Satele, lea fo’i e iloa i le igoa o Fred Satele, ma tula’i ai os ia i luma o le afioga i le ali’i Fa’amasino ia Elvis P. Patea.

 

Ua molia nei o ia i le moliaga mamafa o le talepe fale i le tulaga 2; faapea ai ma moliaga e 2 o le gaoi, o le vaega C lea o solitulafono mamafa, lea e mafai ona fa’asala ai se tasi i le toese mo le umi e le silia i le 7 tausaga, pe fa’asala fo’i i le salatupe e le silia i le $5,000, pe faasala fo’i i fa’asalaga uma ia e lua.

 

E $15,000 lea ua fa’atulaga e tatala ai i tua Satele.

 

O le aso lea na tula’i ai Satele i luma o le Fa’amasinoga Faaitumalo mo lana ulua’i iloiloga, na faailoa ai loa e lana loia fautua ia Ryan Anderson le mana’o o Satele, ina ia tuu sa’o atu loa lana mataupu i luma o le Fa’amasinoga Maualuga e fa’ataunu’u ai sona fa’amasinoga autu.

 

Na teena e Satele moliaga fa’asaga ia te ia ina ua tula’i i luma o le Fa’amasinoga Maualuga i le aso Lulu na te’a nei. O lo o taofia pea o ia i le toese i Tafuna e fa’atali ai le aso 25 o Oketopa lea ua fa’atulaga e faia ai lana ulua’i iloiloga i luma o le afioga i le ali’i Fa’amasino Sili lagolago ia Fiti Sunia.

 

TAGI A LE MALO

 

O lenei mataupu na tofu atu i le Ofisa o Leoleo i Fagatogo, ina ua talosagaina e se Tina le fesoasoani a Leoleo e tusa ai o lona fale na osofa’i ma talepe e ni tagata, ao toesea ai lo latou aiga i Apia mo se tafaoga e 3 vaiaso i le masina o Iulai na te’a nei.

 

O le aso 18 o Aokuso na aga’i atu ai Leoleo i le fale o le Tina na a’afia i Pago Pago, mo le suesueina. Na molimauina e Leoleo ina ua latou taunu’u i le fale pine faamau e faamaonia ai vaega o le fale na talepe, e aofia ai ma nisi o meatotino sa paepae solo i luga o le fola faapea ai ma vaega eseese o le fale.

 

Na taua e le Tina e ana le fale i Leoleo e fa’apea, na faateia lo latou aiga ina ua latou toe fo’i mai i le atunu’u i le aso lava lea, Aokuso 18, ae latou molimauina ai loa le vaaiga mata’utia i totonu o le latou fale.

 

O meatotino na taua e le Tina i Leoleo na gaoia e aofia ai laptops e 3; o mea faigaluega e alu i le uila e pei o le Grinder, Skill-saw ma le Drill; o pea tautaliga auro; o le laau su’isu’i e tasi; o le mama auro e tasi; o pea seevae; o se fana o le ituaiga o le 22 caliber rifle; o ietoga tetele e 2; tasi le vacuum, faapea ai ma se pelu o le ituaiga o le ‘samurai sword’.

 

O le aso lava lea a o galulue Leoleo i le tau tuu faatasia o mau faamaonia o lenei mataupu, ae aga’i atu loa se ali’i mai Pago Pago ma faailoa atu i Leoleo, o lo o i ai ni fa’amatalaga na te fia ofoina atu e fesoasoani i le latou suesuega.

 

Na taua e le ali’i lea i Leoleo, a o fai lana tagamea i le Fale Ta Lavalava i Pago Pago, na alu atu le ali’i o Fred Satele ma fai atu ia te ia, pe mana’o e fa’atau lana laptop i le $40. Sa toe fai atu fo’i Satele ia te ia, e 3 ana laptops o lo o i ai o loo fia faatau i le ta’i $100 i le laptop e tasi. Na taua e le ali’i lea i Leoleo lona teena o le manaoga o Satele.

 

E tasi le vaiaso talu ona amata le suesuega a Leoleo, ae latou mauaina loa nisi faamatalaga. O ia faamatalaga na tuuina atu lea e le Tina e ana le fale na osofaia, ina ua ia faailoa i Leoleo ata o oloa o lo o faatauina i luga o le Facebook a le “American Samoa Dealz and Stealz” , lea e masalomia o oloa uma nei sa gaoia mai i lona fale.

 

O le vaega lea o le American Samoa Dealz and Stealz, o se faalapotopotoga latou te fa’aaogaina le Facebook e faia ai fefaatauaiga mo soo se oloa lava i se tau talafeagai ma gafatia e ni isi o le atunu’u lautele.

 

O se tasi o ata sa pu’e e le Tina e ana le fale na osofaia ma lafo i Leoleo, o le ata o le susuga a Satele o loo ia uuina le fana o le ituaiga o le 22. Na taua e le Tina lea i Leoleo, o foliga uma lava ia o le fana lea na gaoia mai i le latou fale.

 

Ina ua fesiligia e Leoleo ia Satele e tusa ai o lenei mataupu, sa ia ioeina ai loa i Leoleo lona osofaia o le fale a lona aunty ae ave faagaoi le tele o meatotino mai totonu i le masina o Iulai, a o toesea ai lona aunty ma lona aiga i Apia mo se latou tafaoga.

 

Na taua e Satele e fa’apea, o le tele o meatotino sa ia gaoia na alu ma ave i Le Aute ae faafesuia’i ma fualaau faasaina o le aisa, ae o isi meatotino sa ia gaoia na tuuina atu i luga o le Facebook a le “American Samoa Dealz and Stealz” e fa’atau tu’i ai.

 

Ina ua fesiligia o ia i le fana o le ituaiga o le 22. lea na vaaia sa maitauina i se ata i luga o le Facebook o lo o ia uuina, na tali le ua molia, e le o le fana lea sa ia gaoia, ae o le fana lea a se tasi o ana uo.

 

I le fa’amatalaga tusitusia a Satele sa tuuina atu i Leoleo, sa ia taua ai igoa o i latou e toa’tolu sa ia alu ma fa’atau i ai isi meatotino sa ia gaoia.

 

Na mafai e Leoleo ona latou fesiligia i latou nei e to’atolu e fa’atatau i meatotino sa gaioia e Satele.

 

Na taua e se tama’ita’i e fa’apea, e tasi le mea faigaluega e alu i le uila na ia faatau mai ia Satele i le $40, atoa ai ma le laptop e tasi i le $80. O ia meatotino na toe faafo’i i Leoleo.

 

Na taua e se alii, na faateia o ia ina ua taofi e Satele lana ta’avale i luga o le alatele i Pago Pago, ma fesili atu pe na te fia faatauina lana laptop ma le uaea e fafaga ai le ma’a i le $200, faapea ai ma le mea faigaluega e alu i le uila e tasi i le $40.

 

Na taua e le ali’i lea lona taliaina o le talosaga a Satele ma ia faatauina mai ai meatotino e pei ona taua. O ia meatotino ua toe faafo’i uma atu i Leoleo.

 

Na taua atili e le ali’i lea i Leoleo e fa’apea, na mafua ona ia faatauina meatotino nei mai ia Satele, ona sa talosaga atu o ia, o lo o matua mana’omia lava se tupe e tausi ai si ona Tama o loo tigaina i le Falema’i.

 

O le alii mulimuli na fesiligia e Leoleo, o le ali’i lea sa ave i ai e Satele le tele o meatotino na gaoia. Na taua e le ali’i lea i Leoleo e fa’apea, na te le iloaina o ni meatotino sa gaoia ia na alu atu ma Satele ma fai atu ia te ia e faatau i luga o le Facebook a le “American Samoa Dealz and Stealz”.

 

O le tupe na maua mai i meatotino sa fa’atauina e pei ona taua e le ali’i lea i Leoleo, na la vaelua afa ai ma Satele.

 

Ina pu’e faapagota e Leoleo ia Satele, sa latou maua ai fualaau fa’asaina ia te ia. Na taua e le loia a le malo ia Jason Mitchell i luma o le afioga i le ali’i Fa’amasino ia Elvis P. Patea, o le a faila e le malo le isi tagi fa’asaga ia Satele, ona o fualaau fa’asaina sa maua ia te ia.