Ads by Google Ads by Google

Epifania Petelo — Tausala Lalelei O Amerika Samoa 2019-2020


O se va’aiga i tausala lalelei o Amerika Samoa 2019-2020, Epifania Petelo (ogatotonu); Tausala Lalelei mo le 2018-2019 Magalita Philomena Johnson; ma le Tausala Lalelei o Amerika Samoa 2017-2018 Matau’aina Gwendolyn Toomalatai. [ata: foa’i]

O sui o le Samoa News sa auai ina ia maimoaina le tauvaga Tausala Lalelei i le afiafi o le aso Faraile na te’a nei. Le tina o Vera Ho-Ching Annesley ma Heavenly Annesley-Letuli. [ata: foa’i]

O le auau o le tauvaga Tausala Lalelei o Amerika Samoa 2019-2020, “Opogi, Fa’amalosi’au, ma Fa’aauau!” O le fa’amoemoe sili fo’i lea o le Miss American Samoa Inc. (MASi), le sosaiete e fa’atautaia le tauvaga.

 

I le tauvaga sa faia i le ASCC Multi-Purpose Center i le aso Faraile ua te’a sa manumalo ai le tamaita’i o Epifania Petelo, sa sapaia e le Iron Crew Health & Fitness.

 

O lana taleni sa malosi tele ai lana folasaga i lea po, aua sa ia tapena mai o se tama’ita’i e to’aga i ta’aloga fusu ma le pi’i, lelei i le fa’amalositino.

 

O le tauvaga sa fa’amasinoina tausala i le Ofu Taele; Taleni, La’ei Samoa ua e fiafia, ma le Fesili ma le Tali. Pau lea o mea e aoga i le fa’amasinoina o Tausala tauva. O isi mea uma e aofia ai le Ta’avale Teuteuina, tausala o Laina Feso’ota’i a le Initeneti, e le maua ai ni togi e tauvaga.

 

O le tauvaga e le’i faigofie ona fa’amasinoina, aua ua emo ane le ata, ua malomaloa le aofia na fa’atasi i le fa’amoemoe i lea afiafi, o i latou sa manatu o a latou tausala e manumalo i le tulaga muamua pe lua, ae ua tete’i le to’aele i le tausala na tulaga lua, e le’i maua se fa’ailoga i mea uma na fa’atauva ai i lea po.

 

O le tulaga lua, sa maua e le tausala lalelei lea mai Vatia, Menora-Justine M. Samia, na sapaia to’atele o ia e lona afioaga; Tulaga tolu Jo-Nica Tuiteleleapaga; Tulaga fa Brenda Foleni ma le tulaga lima o Tala Leasiolagi.

 

Ona o lenei fo’i tausaga ua i ai tausala sa sapaia fa’apitoa e latou afioaga, e aofia ai le Tausala mai Utulei ma le Tausala lalelei mai Vatia, o le tetele fo’i lea o tapua’iga na fa’alogoina i lea afiafi matagofie o le fa’amoemoe.

 

E to’alima fa’amasino o le tauvaga: Sonny Leomiti, Patricia Tautai, Fiatunase Asuega-Paaga, Alice Sea-Asalele ma Peter E Reid Jr.

 

O i latou na tauva ma latou tulaga ua mautu mai fa’amasino e aofia ai: Ta’avale teuteuina ua togisilia - Epifania Petelo; Tausala Tausa’afia: Brenda Fa’afua Foleni; Tausala sili ona atalelei: Jo-Nica Ta’aitulagi Tuiteleleapaga; Fa’ailoga Fa’apitoa a le MASI: Brenda Fa’afua Foleni; Fa’atalanoaga a’o loma le Tauvaga: Epifania Petelo; Sili le Matagofie o le Siva Samoa: Brenda Fa’afua Foleni; Sili Matagofie o le La’ei Ta’ele: Brenda Fa’afua Foleni [lautogia mo togi tauva]; Sili i le Taleni - Jo-Nica Tuiteleleapaga; Sili le Matagofie o La’ei Samoa: Epifania Petelo; Togisilia i le Fesili ma Tali - Epifania Petelo; Tausala Manumalo i le Initeneti - Brenda Fa’afua Foleni [le taulia i togi e malo ai].

 

E faafetaia le sao o i latou na sapaia tausala na tauva i lenei tausaga, fa’afetaia fo’i le vasega o Kamupani ma i latou uma na foa’i mo le fa’amoemoe. Fa’afetaia fo’i le tautua matavela a le tama’ita’i tausala lalelei ua mae’a nei lana nofoaiga, Ms Magalita Philomena Johnson, ma sa matagofie fo’i lana lauga fa’amavae, ma lana toe sa’asa’a i lona tofi, fa’afetai le tautua.