Vaega 129

E fusi lava e le tamaloa o Meki lona afafine ae o ona loimata e le matu i le maligi. Na tago atu fo’i le tamaloa o Meki ma fusi mai le ali’i o Laneselota ma faapea atu i ai lana tala, “Malo le loto tele, malo fo’i le onosa’i.” Na ona uma lava o tala ia a le tamaloa o Meki, fai atu loa i Leoleonana e to’alua sa tutu i ona tafatafa e ta’ita’i lana fanau i totonu o se tasi o Van tele lava, ma aga’i ese loa ma le nofoaga lea manu e lei taunu’u ane ni isi o le vaega fa’atupu fa’alavelave. Na ona uma lava ona tuu atu e Meki o lana fa’atonuga i lana vaega, savali loa i lana ta’avale, ma aapa atu i le uaealesi o loo i ai ma vili ai loa le isi ana tama fa’amoemoeina o loo i ai i totonu o le lotoa o le fanua a le fafine o Mekala, e siaki pe i ai ni isi talanoaga ua mafai ona ia maua. “Sole, o lea ua matou mauaina Ianeta ma lona to’alua, o lo o saogalemu i laua uma, ma o lea ua auina atu i totonu o le isi Van e momoli ai loa i le ofisa autu. E i ai nisi talanoaga ua e faalogo i ai”. O le fesili atu lea a Meki i lana tama fa’amoemoe lea. Ae sa ata lana tama lea ma fa’apea atu i ai, “Pau le tulaga lea ou te fa’alogo atu i ai, o lo o matamata le fafine o Mekala ma ana tama faamoemoeina i le ata o loo pue mai e se latou masini pu’e ata o loo faaopeopea i luga o le ea, i gaioiga uma o loo outou faia i le Paka i le taimi lenei. Pau le tulaga ia e silafia alii Boss, e leai se mea e ono popole ai fua, e le o i ai se manatu a le fafine faatupu faalavelave ma lana vaega e faia se osofaiga faasaga ia te outou. Pau lona faanaunauga o loo i ai, ia mafai ona toe maua mai si ona to’alua o Pulusi.”

E lei tali Meki i se upu, ae sa toe oso i fafo ma taumafai e autilo solo i luga o le vanimonimo pe na te tau iloa atu ai se masini pu’eata o loo fa’alele i luga i le taimi lea. Na umi se taimi o autilo le tamaloa o Meki i luga, na te le iloaina atu lava se masini, ona toe oso loa lea i totonu o lana ta’avale ma mulimuli atu loa i tua o le Van lea o loo momoli atu ai lana fanau. Na latalata loa le ta’avale i le ofisa, vili loa e Meki lona to’alua. “Vaai oe si a’u pele, aua e te popole ae fiafia, o lea ua toe maua mai si au fanau, o loo saogalemu i laua uma, e leai se mea o fa’aletonu.” E lei gagana le fafine o Lucy i se upu, sei vagana ai le faalogoina o lona tagi masusu i le fiafia ina ua toe maua mai si ana tama aemaise si ona to’alua. Sei o tatou liliu atu lava i le nofoaga lea o loo taofia faapagota ai e le Vaega a Meki le tamaloa o Pulusi. Talu ai ua matua ma ua ma’i fo’i le tamaloa o Pulusi, na mafua ai ona manatu le tamaloa o Meki ina ia fai faalelei pea o ia, pau le itu sa fia maua, o le fesiligia lea o ia e tusa ai o ni isi o fa’amatalaga o loo latou fia maua.

Na avatu sa’o lava le tamaloa o Pulusi momoli sa’o loa i le nofoaga lea e taofia ai e Meki ma lana vaega tagata faatupu faalavelave, e sauni ai e faaoo i ai le oti. O le fefe tele o le tamaloa o Pulusi ina ua saisai o ia e Leoleonana, na ia talosaga ai loa i se tasi o ali’i Leoleonana, ina ia faailoa i le latou ta’ita’i, ni isi o fa’amatalaga o loo ia sauni e faailoa atu pe afai ae mananao e toe faasaoloto o ia. “O a ituaiga faamatalaga o loo e nofo ma oe.” O le fesili lea a le isi tama fa’amoemoeina a Meki ia Pulusi. “O fa’amatalaga e fa’atatau i tau pulepulega a Mekala ma lana vaega e pu’e fa’apagota le ulugali’i milionea lea o loo nonofo le la tama le afafine o la outou Pule.” Na tali e le au ali’i ia o loo faatalatalanoaina Pulusi, ona o le tulaga palaai ua i ai le tamaloa ma lana talanoa lea ua talanoa atu ai ia tei latou. “O a uma ma isi fa’amatalaga o loo e naunau e fia tuuina mai.” O le isi lea fesili sa tuuina atu ia Pulusi. “O fa’amatalaga e fa’atatau i le tamaloa lea na fasiotia e Mekala ma lana vaega ma tanumia i tulimanu o le pa o loo siomia ai le fanua. O le tamaloa lea sa faamoemoe i ai le Vaega o Leoleo Faapitoa a le malo i le fa’amasinoga sa faia fa’asaga i le faapologaina o tagata uli, ae ua solofua lea faamasinoga ina ua maliu le molimau autu a le malo.”