Ads by Google Ads by Google

E LE O OE O SE SULI MONI

Na ona uma atu lava o le tala a le tama’ita’i o Ianeta i lona Tama, oso loa ma le tamaloa o Meki i lana ta’avale ma aga’i atu loa i le vaega tonu o le paka lea ua fa’ailoa atu e lona afafine ia te ia, ae o le taimi fo’i lea na ia fa’afesoota’iina ai loa ma lana vaega ina ia aga’i sa’o atu loa i le paka lea o loo fa’atali mai ai lona afafine. O le salalau o le tala i luga o le uaealesi i totonu o ta’avale uma lava o loo fa’aaoga e isi sui o le Vaega o Leoleonana, na fa’afuase’i ai ona toe feso’ota’i mai le sui o loo i totonu o le lotoa a le fafine o Mekala ma fa’apea mai i le tamaloa o Meki, “Lau susuga a le Ta’ita’i, pe mafai lava ona fa’ateletelegese teisi la outou fuafuaga e pei ona outou aga’i atu ai nei i le paka, ina ne’i vave teisi ae tula’i mai ai se fa’aletonu ona afaina uma ai lava lea o le fa’amoemoe, ae sili ai le ma’imau o le ola o si ou afafine ma si ona to’alua”. Na lagona e le tamaloa o Meki le valaau ona ia toe tali mai lea i le sui o lana vaega lea sa valaau atu. “Fa’afetai atu mo le fautuaga, ae fa’amolemole la tatou vaega, ia faateletelegese teisi lava le faamoemoe ae sei toe aumai se isi fautuaga mai lo tatou sui o loo i totonu o le lotoa a le fili i le taimi nei.” Na faapea atu loa ma le ali’i lea o loo lafi i totonu o le lotoa o le fale o Mekala, “O lea e tau fa’alologo atu i le uaealesi o loo fesoota’i ai Mekala ma lana vaega sa latou momoliina atu Ianeta ma Laneselota, poo le a tonu le autu o le latou fuafuaga. Ona o lea ua maua mai tala, o loo lalafi le vaega a le fafine o Mekala i se nofoaga e le mamao ese ma le paka lea o loo i ai Ianeta ma Laneselota, ae lelei pea ona fa’ateletelegese te isi.”

 

Na usitaia e le tamaloa o Meki ma lana vaega le fautuaga, ona fa’ateletelegese ai loa lea o le aga’i atu o sui o Leoleonana e aveese mai Ianeta ma lona to’alua. Pau le tulaga lea ua faia nei, ua aga’i atu nei le vaega a le tamaloa o Meki ma fa’alatalata atu i le nofoaga lea o loo sosoo ma le paka, e fuafua ai le taimi e aga’i atu ai mo le fa’asaoina mai o Ianeta. Ao faatali Meki ma lana vaega mo se isi faatonuga, ae fa’afuase’i loa ona faalogoina e le sui o le vaega o Leoleonana o loo lafi i totonu o le loto a Mekala le isi talanoaga a le fafine o Mekala ma lana vaega. “O le a se tala mai ia Ianeta ma lona to’alua,” O le fesili fia iloa lea a le fafine o Mekala. Ae na tali ane i ai le ta’ita’i o lana vaega, “O lea ua mae’a ona momoli i laua i le paka lea e tu tasi lava i le itu i sisifo o le taulaga, ae o matou lea ua toe malaga ese mai, e le o i ai se isi o i matou o latalata i ai i le nofoaga lea.” E lei leva ae toe faapea atu le fafine o Mekala, “Ia aua lava ne’i i ai se mea e tupu mai iina, ia toe fa’afo’i le ulugalii ae fa’atalitali pea pe maua ane se fesootaiga ma Pulusi poo se fa’amatalaga fo’i mai le vaega a le tamaloa o Meki pe vave one latou toe faasaolotoina mai si Toeaina, ona o lena ua toe fa’afo’i atu lona afafine ma lona to’alua.”

 

E le i toe fa’atali loa le ali’i lea i se isi mea ae ua toe fesootai atu loa ia Meki ma fa’apea atu i ai, “O lea ua manino mai i fesootaiga a Mekala ma lana vaega, e leai ma se isi o lana vaega tete’e o latalata atu i le nofoaga o loo i ai Ianeta ma Laneselota, o lea ua toe fo’i uma i latou i le latou nofoaga autu ma le fa’amoemoe tatou te fa’asa’olotoina atu le toeaina o Pulusi i se taimi o i luma.” E lei toe fa’atali Meki ma lana vaega i le taimi lea, ae ua latou fa’anatinati atu loa i le paka e saili si ona afafine ma lona to’alua poo fea o i ai. Na ona iloa mai lava e Ianeta o ta’avale a le ofisa a lona Tama o loo aga’i atu, tamo’e ane loa i le auala ma talotalo atu i ai. O isi ta’avale e lei latalata ane i le taimi lea, ae sa paka mamao mai vaavaai poo i ai lava nisi o le fili o loo lalafi i se vaega o le paka ina ne’i lamatia ai lo latou saogalemu. O le ta’avale lava a le tamaloa o Meki na mulimuli paka, oso loa i fafo le tamaloa ma fa’anatinati atu loa ma fusi mai si ona afafine fa’apea ai ma lona to’alua.