Vaega 127

Na pei ni fa’atagata laau le tau fai tutu o tama leaga a le fafine o Mekala ma uu a laua a’upega, e aunoa ma se isi na gagana, ae o le fafine o Mekala i le taimi lea, ua na o le ta’avalevale i luga o le fola o le fale i le tagi ta’afilifili solo, ona o le alofa isi ona to’alua poo fea ua ave i ai. “Auoi si o’u to’alua pele poo fea ua ave i ai oe e nei tagata leaga. Ta fia vaai atu Pulusi i ou foliga. Ta fia tiga fa’atasi ma oe i lenei taimi ..” O ni isi ia o upu o le tagi tautala a le fafine o Mekala. Ua aapa atu le isi o ana tama leaga ma taumafai e fa’atu mai i luga le latou fafine, ae o le isi o loo au tilo solo i fafo, o luma ma tua pe na te tau iloa atu ni tagata e aga’i atu, poo ni gaioiga fo’i e tau vavala mai ai le mea lea ua ave aga’i i ai le tamaloa o Pulusi. “Vaai oe Mekala, ia e lototele, ia maua sina mapu o lou loto, ae se’i tatou taumafai e saili poo fea ua ave aga’i i ai le Toeaina. Ou te lagonaina lava e le o fasiotia o ia e tagata sa latou ave fa’amalosia o ia.” Ua tau maua sina mapu o le fafine o Mekala, ona nofo mai lea i luga ma savali sa’o atu loa i fafo i le vaega o loo paka ai lana ta’avale, ma tago loa i le uaealesi ma fa’afesoota’i le ta’ita’i o lana vaega fa’atupu fa’alavelave. “Vaai oe, e i ai le mea ua tupu. Ua aveese fa’amalosi Pulusi mai le fale, ma ua ou le iloa poo fea ua ave aga’i i ai si o’u to’alua ..” Na motu fa’afuase’i le talanoa a Mekala ina ua tagi ma faigata ai ona toe gagana i se upu. “O le a la se mea e te mana’o matou te faia. Ta’u mai lava e oe se mea e tatau ona matou faia i le taimi nei.” O le fesili atu lea a le ta’ita’i o le vaega fa’atupu fa’alavelave, peita’i, na ia fiu e toe fa’atali se tali ane a le fafine o Mekala ua leai se leo.

E fai uma nei mau gaioiga, ae o le taimi lea o lo o to’a lelei le lafi a le Leoleonana o le vaega a Meki lea o loo fa’apuna mai i se tasi o tulimanu o le fanua, ma lana a’upega ua uma lelei ona tapena ma seki mo soo se taimi e tula’i mai ai se osofaiga. Na manino uma i le fa’alogo a le ali’i Leoleonana talanoaga uma o loo faia i le va o Mekala ma lana vaega leaga. O fa’amatalaga uma na maua e le ali’i Leoleonana lenei, sa ia fa’asoa atu i le latou ta’ita’i ia Meki, ina ia fuafua ai fo’i sa latou fa’aiuga e faia i le tamaloa o Pulusi. “Mekala, ta’u mai poo le a se gaioiga e tatau ona matou faia. Afai e te manatu ina ia toe fa’afo’i le fafine o le Ta’ita’i o Leoleonana ma lona to’alua na matou aumaia fa’apagota, ina ia mafai ai ona toe fa’afo’i atu Pulusi i ou lima, o le a matou faia le tulaga lena.” Na fa’afuase’i ona toe oso atu le fafine o Mekala ma faapea atu i le ta’ita’i o lana vaega faatupu fa’alavelave, “Ou te le mana’o lava e fa’aola Ianeta ma lona to’alua, atoa ai fo’i ma matua o le ali’i milionea, ae talu ai o lea ua latou aveese si o’u to’alua, o le mafua’aga lena ua ou manatu ai, e tatau ona toe fa’asa’oloto i laua”. Ua logo e le sui o le vaega a Leoleonana ia Meki e tusa ai o le fuafuaga a Mekala ma lana vaega, ma fa’atonuina ai loa le vaega o Leoleonana ina ia sauni i soo se taimi e tula’i mai ai se gaioiga e ono lamatia ai se ola o se tagata.

Ua mautu uma fuafuaga a Mekala ma lana vaega. O le vaega o loo i ai le paka e tafafao ai turisi mai fafo, o iina lea ua fuafua e momoli i ai Ianeta ma lona to’alua e fa’asa’oloto ai, ona mata’itu lea e lana vaega mo sina taimi sei vaai pe fa’asaoloto atu Pulusi. Afai loa e tuana’i itula e 5 e le fa’asaolotoina atu lava Pulusi, ona toe pu’e fa’apagota loa lea o i laua ae momoli loa i le nofoaga o lo o i ai tagata pologa i tua i atumaga o le malo. E taunu’u ta’avale a le vaega leaga o loo momoli atu ai Ianeta ma Laneselota i le paka, ae o le taimi lea ua leva ona nofo ‘olo ai iina le to’atele o Leoleo Fa’apitoa a le malo atoa ai ma a latou a’upega, e sauni ai mo le osofaiga. Na te’i le tamaloa o Meki ina ua tatagi lana telefoni, ma le fa’alogo atu, o le leo o si ona afafine o Ianeta. “Dad, o lea ua fa’asa’oloto maua ma si o’u to’alua, ma o loo ma i ai nei i se tasi o paka tele lava i le isi itu o le taulaga.”