Vaega 123

O le fa’ateia tele o le fa’alogo a le fafine o Lucy i le tala a lona to’alua o Meki, na faigata ai ona gagana i se upu, ae se’i vagana ai ona loimata na e pei o le timu to le maligi ifo i lalo, ua lava lea e ta’u mai ai ona lagona mafatia. “ .. vaai oe si o’u to’alua, aua e te loto vaivai, ou te talitonu atoatoa i sailiga a le vaega o Leoleo Faapitoa a le malo lea ua galulue e saili mai si o’u afafine ma lona to’alua. Ia e lototele ma fesoasoani mai fo’i i lo’u mafaufau, ina ne’i avea lo ta tau fai fa’anoanoa ma auala e oo atu ai i taua i se isi tulaga faigata”. O le talatalanoa lemu atu lea a le tamaloa o Meki isi ona to’alua, ona ia aapa atu lea ua fusi mai si ona to’alua ma fa’alagolago i lona fatafata, ona ia toe musumusu atu lea i lona taliga, “Lucy si a’u pele, ia e lototele. Ou te talitonu o loo saogalemu Ianeta ma Lanselota i le taimi lenei, ou te talitonu fo’i, e le o toe umi se taimi ona ou toe vaai atu lea i o la foliga fiafia”. Na umi se taimi o fusi e le Tamaloa o Meki si ona to’alua ma taumafai e fa’alototele ia te ia, ae o le fafine o Lucy i le taimi lea, ua le matu le maligi o ona loimata, ina ua toe ave lona mafaufau i le taimi na fa’atoa la mafuta ai ma Ianeta ao laititi lava o ia, ma ia tausia mai ai lava o ia seia avea ma tagata matua. Na faigata i le fafine o Lucy ona gagana i se upu, se’i vagana ai lona aapa atu i le ata o le faaipoipoga a Ianeta ma Laneselota sa i luma o le ta’avale a Meki ua uu mai, ona la savavali to’alua lea ma lona to’alua i totonu o le fale.

Se’i tatou liliu atu lava i le tulaga lea ua oo i ai Ianeta ma Laneselota. O le mae’a ai ona fesiligia ma suesue a Meki ma ana Leoleonana o le fafine o Mekala, na logo ai loa e le fafine lana vaega ma latou ave fa’amalosi Ianeta ma lona to’alua ma tu’u i se nofoaga e le mamao ese lava mai le taulaga. Na ona taunu’u lava o ta’avale uli e 2 ia sa aveese fa’amalosi atu ai Ianeta ma Laneselota mai le la ofisa, fesoota’i mai loa ma le Ta’ita’i o le vaega fa’atupu fa’alavelave i le fafine o Mekala, lea o loo saofa’i lava i luga o le nofoa i totonu o lona fale ma vaavaai i fafo i le lotoa. Ae manatua fo’i, e i ai Leoleonana e to’alua a le vaega a Meki lea o loo lalafi i le lotoa a Mekala i le taimi lea, ona o le taumafai e mata’itu gaioiga e faia e le olomatua ma lona to’alua, le tamaloa o Pulusi. Na vaaia e ali’i Leoleonana ia e to’alua le savali mai o Mekala i fafo o lona fale ma talanoa i le telefoni. Ua silia ma le 30 minute o talanoa pea Mekala i le telefoni, ona oso lea o masalosaloga a ali’i Leoleonana ia e to’alua, pe aisea ua umi ai fa’apea ona talanoa le fafine i luga o le telefoni. O le atamai i tulaga o fesootaiga i masini faaonaponei, na vave ai ona fesoota’i masini a Leoleonana ia e to’alua ma laina telefoni o loo aga’i atu i totonu o le fale a le fafine saua o Mekala, ma mafai ai loa ona maua talanoaga o loo faia i le taimi nei.

Na matua fa’ateia ali’i Leoleonana ia e to’alua ina ua la fa’alogo atu, o loo taua i le talanoaga a Mekala ma le tatgata o loo i luga o le telefoni le igoa o Ianeta ma Laneselota. Na fa’alologo ma le toto’a ali’i Leoleonana i lo la fia mauaina o le mafua’aga ua ala ai ona ta’u Ianeta ma Laneselota i le talanoaga lea. E lei umi ae fa’apea atu loa ma le fa’atonuga a Mekala i le tagata o loo la talanoa i luga o le telefoni. “Ia fa’alogo lelei mai lava ou kaliga i la’u kala, aua ge’i vave fasiokia Iageka ma loga ko’alua loia. Se’i vaavaai pea poo le a se kulaga e oo iai le mataupu lea o loo suesueiga ai a’u e sui o Leoleogaga a le malo, e fa’akakau i le Kamaloa meauli lea o loo kagu i kokogu o le fagua. Afai loa e molia a’u i le makaupu lea, oga avaku loa lea o le faakoguga e fasioki ai i laua ga, ua e fa’alogo mai”. O le fesili atu lea a le fafine o Mekala, ae na tali mai le tagata o loo i luga o le telefoni, “O lea lava lau susuga a le Ta’ita’i. Pau le isi mea lea e fia faailoa atu, o lea ua sauni la matou osofaiga e aumai fa’atagata o taua ai fo’i matua o le ali’i milionea, ae afai e faigata ona aumai faamalosi i laua, ona oo ai loa lea o le oti”.