Ads by Google Ads by Google

E LE O OE O SE SULI MONI

Vaega 121

 

“O ai ua ia ave fa’amalosia lou afafine ma lona to’alua”. O le fesili fiailoa lea a le ali’i o loo fa’auluulu i ai le vaega o Leoleonana o loo faia le osofaiga i le taimi lea. Na fiu le alii Leoleo e fa’alogo se toe tali ane a le tamaloa o Meki i luga o le telefoni, ona ia tapuni lea o le telefoni ae fa’aauau a latou fetauiga ma sui o le vaega leaga lea o loo taumafai e osofa’i atu i latou. E lei umi se taimi talu ona amata fetauiga ae fa’afuase’i loa ona le toe fa’alogoina ni fana mai le itu a le fili. O le taimi fo’i lea na tau fai taofi ai gaioiga a Leoleonana. O le ali’i e to’atasi lea sa galue i le tau eliina i luga o le vaega o loo masalomia o loo tanumia ai le tamaloa meauli, ua ia faailoa ane i lana vaega lona tau i se u’amea i lalo o le palapala. “Taofi ai iinei lau gaioiga o loo fai, ae sei tatou fa’atalitali i se isi gaioiga mai le itu ‘au a le fili”.O le fa’atonuga lea na tuuina atu e le ali’i o loo taitaia le vaega o Leoleonana. E lei umi ae vaaia e Leoleonana le aga’i ese atu o Van uli e 3 sa paka mai i luma o le malae o le fale o Mekala ma lona to’alua, ona fa’atonu lea o ali’i e to’alua e aga’i i luma e siaki le nofoaga sa paka mai ai ta’avale, poo i ai ni isi tagata o totoe ai pe leai. E lei umi ona aga’i ese atu ali’i e toalua ae toe faailoa ane i le vaega, ua kilia atoa le lotoa ma le malae, e le o i ai ni tagata o i ai, se’i vagana ai luga o le fale o loo vaaia ai se tagata o loo fealua’i mai ai.

 

“Siaki ma luga o le fale ina ia mautinoa e le o lalafi ai ni ‘au a le fili”, o le faatonuga lea mai le Ta’ita’i o le vaega. Na pei o le emo o le mata gaioiga a ali’i Leoleonana e to’alua lea ua aga’i atu nei i luga o le fasitepu o le fale e siaki poo ai o loo fealua’i atu ai. E taunu’u atu Leoleonana e to’alua ma la vaaia ai, o Mekala ma lona to’alua o Pulusi lea o loo feofeoa’i solo i totonu o le la fale, e pei oni tagata ua leaga ulu. O loo avaavau lava le fafine o Mekala i lona to’alua i lona fa’amatala i le puipuia o le fafine meauli ma lana fanau lea ua aveese atu e Leoleonana o le malo, ma e i ai le talitonuga e ono molia i laua i le tulafono ona o nei mau mea ua tutupu i le aiga. Na ona logo atu lava o le vaega o Leoleonana e na o Mekala ma lona to’alua lea o loo i totonu o le fale, aumai loa ma le fa’atonuga ina ia saili se nofoaga malu o le fanua la te lalafi ai, ae se’i fa’agasolo isi gaioiga ina ia mautinoa e pu’e faapagota uma i latou ua sosola ese atu pe afai ae toe aga’i ane i totonu o le lotoa.

 

Sei o tatou liliu atu lava i le tamaloa o Meki. O le taimi lava na uma ai ona logo e Meki lana vaega e fa’atatau i lana fanau, na ia faafesootai ai loa le Ta’ita’i o le Vaega Faapitoa o Leoleo a le malo, ma talosaga i ai mo se fesoasoani ina ia sailia lona afafine ma lona to’alua i se taimi vave lava, manu e le’i umi ona leiloloa i laua. O le vavave o gaioiga a Leoleo faapitoa o le malo na pei ai o le emo o le mata gaioiga ae taunuu loa i le nofoaga o loo i ai le ofisa loia a le alii o Laneselota, ma vaaia ai le gasu o totonu o le ofisa, o nisi o tioata ua taei ma foliga mai sa i ai ni gaioiga e faamaonia ai na aveese faamalosi Ianeta ma Laneselota. Ua amata ona saili e Leoleo faaptoa masini pueata o loo siomia ai totonu o le fale, ma iloa ai e 2 Van uli sa aga’i atu ma paka i le isi itu o le fale, ae o se tama’ita’i na aga’i i totonu o le ofisa. Na maua uma e Leoleo faapitoa i masini pu’eata gaioiga sa faia, amata mai lava i le taimi na aga’i atu ai le tagata sa teu fa’atama’ita’i i totonu o le ofisa, seia oo i le taimi na aveese faamalosi ai Ianeta, sosoo atu ai ma lona to’alua ma aga’i ese loa Van uli nei e lua. Na tau nofo le ta ta o le fatu o le tamaloa o Meki ina ua logo atu i ai, o lona afafine ma lona to’alua na ave faamalosi e ni tagata, ae eseese fo’i Van na aveese atu ai i laua. Na faigata i le tamaloa o Meki ona talia le tala fa’anoanoa ua auina atu ia te ia, ae sili ai ona faigata pe faapefea ona ia fa’ailoa i si ona to’alua o Lucy lenei tala fa’anoanoa e fa’atatau ia Ianeta.