Ads by Google Ads by Google

E le nofosala Joseph Yandall i moliaga sa tu’uaia ai o ia malo


[ata: SN]
ausage@samoanews.com

E le i atoa se itula na iloilo ai e ali’i ma tama’ita’i iloilo iuga le fa’aiuga o le mataupu a Joseph Yandall i le vaiaso na te’a nei, ae tuuina mai loa la latou fa’aiuga, e le nofosala o ia i moliaga mamafa e pei ona tu’uaia ai e le malo.

 

O le afioga i le ali’i Fa’amasino ia Elvis P. Patea sa fa’atautaia lenei iloiloga, i lalo o le lagolagosua a afioga i ali’i Fa’amasino Lagolago ia Satele Lili’o Satele ma Tunupopo Alalafaga.

 

O le tama’ita’i loia sili lagolago ia Christy Dunn na tula’i mo le itu a le malo, ae lagolago i ai le tama’ita’i loia sili fesoasoani ia Lornalei Meredith. Mo le itu a Yandall, na tula’i ai le tama’ita’i loia ia Gwen Tauiliili-Langkilde mo ia, ae lagolago i ai le ali’i loia ia Marcellus T. Uiagalelei.

 

Na tu’uaia e le malo ia Yandall i moliaga mamafa e 3, lea e aofia ai moliaga pito sili ona mamafa o le faia lea o uiga mataga i fanau e i lalo o le 16 tausaga le matutua, o se fa’asalaga e mafai ona fa’asala ai o ia mo le umi e oo atu i le 30 tausaga, atoa ai ma moliaga e lua o le taumafai e ave faapagota se tama’ita’i, ma le moliaga o le taumafai e tagofia itutinosa o se tama’ita’i.

 

O ia moliaga na afua mai i se fa’alavelave sa finau le itu a le malo, na tupu i le masina o Novema 2016, ina ua piki e Yandall ni tama’ita’i se to’alua i lana ta’avale, ma ia taumafai ai loa e faia uiga e pei ona tu’uaia ai o ia e le malo.

 

Na maua le avanoa o ali’i ma tama’ita’i iloilo iuga e fa’afofoga ai i molimau a tama’ita’i e to’alua sa tu’uaia na a’afia i lenei fa’alavelave, ina ua taumafai le malo e fa’ataoto mau fa’amaonia o le latou tagi fa’asaga ia Yandall.

 

O ni isi o molimau a le malo sa valaau e aofia ai le ali’i Leoleo Suesue sa ia suesueina lenei mataupu, susuga Det. Poutoa I’amanu.

 

Na taua e tama’ita’i e to’alua i le la molimau taimi eseese na taumafai ai Yandall e faia uiga mataga nei ia te i laua.

 

Na maua fo’i le avanoa e fa’afofoga ai le vaega iloilo iuga i le molimau a Yandall, lea na to’atolu i ai molimau sa valaauina e le itu tete’e mo le taumafai e puipui aia tatau o le ua molia.

 

I le molimau a Yandall, sa ia matua teena ai tu’uaiga uma fa’asaga ia te ia. Na taua e lenei Tama matua e 88 tausaga o lona soifua e fa’apea, o tu’uaiga uma fa’asaga ia te ia, e leai ma se tu’uaiga e fa’amaonia.

 

O le isi tamaitai o loo finau le malo sa ia faia i ai uiga mataga, na taua e Yandall le tele o tausaga sa ia fesoasoani ai i lea tama’ita’i ma lona aiga e aofia ai ona matua, a o latou nonofo i se nofoaga i Nuuuli talu mai le 2005, seia oo lava i le taimi na aga’i ese atu ai le aiga ma nonofo i Taputimu, sa fa’aauau pea ona ia asiasi i ai ma ave i ai meaai mo tamaitai o le aiga e aofia ai le tama’ita’i o loo tu’uaia na a’afia, ona o lona alofa i ai, e pei lava o fanau a lana fanau i latou.

 

Ae mo le tama’ita’i lona lua lea o lo o finau mai le malo sa ia faia i ai uiga mataga, na taua e Yandall i le vaega iloilo iuga e fa’apea, sa ia fesoasoani i le tama’ita’i lea ina ua o atu ma lona uso laititi e su’e meaai i lona fale i Iliili, mulimuli ane gaoi e le tama’ita’i lea ana meatotino mai totonu o lona fale e aofia ai lana telefoni, o se tupe, faapea ai ma isi ana meatotino aoga.

 

Na fa’afetaia e Patea ali’i ma tama’ita’i iloilo iuga i le galuega fita sa latou fa’atinoina, e ala lea i le ofoina atu o latou taimi e fesoasoani ai i le fa’atinoina o le isi matafaoi a le Fa’amasinoga, o le sailiina lea o faaiuga amiotonu mo mataupu o lo o tu’uaia ai tagatanu’u o le atunu’u.