Ads by Google Ads by Google

"E Faigofie ona A'oa'o Fanauiti......


O le fofoga o le Polokalama fa'apitoa o "Le La'au o Vaifofo" na malaga mai Kalefonia i Amerika na te fa'atautaia le semina mo faia'oga, "Fa'aosofia le naunau o fanau e fia iloa ma saili le atamai!" [ata: Leua Aiono Frost]

....nai lo le toe taumafai e fa'asa'osa'o tagata ua matutua!!"

 

I le fonotaga fa'aleaoaoga o lo'o fa'atautaia mo aso e lua mo aia'oga uma o a'oga a le Malo, ua auina mamao mai ai le susuga Marcus Johnson o le Solution Tree, po'o Le La'au o Vaifofo.

 

O ia lea e malaga mai Kalefonia mo le fa'amoemoe ina ia fa'aa'ogaina e le Matagaluega o A'oga i a latou galuega tima'i mo Faia'oga, le polokalama ua fa'aigoaina Professional Learning Community. Ia galulue fa'atasi Faia'oga uma, Pulega o Aoga uma, ma le Matagaluega o A'oga ina ia ausia le fa'amoemoe tupito, "ia laugatasia fanau a'oga uma i avanoa e aoaoina lelei ai!"

 

Na fa'amatala e Johnson le itu o Kalefonia o loo ia malaga mai ai, ma sa lu'ia o ia e fa'aulufale i ai lenei ituaiga fa'atinoga i a'oga a le fanau ina ia toe agava'a ai a'oga nei, ona e pa'u maulalo le faitau aofai o fanau a'oga e gafatia ona ausia togi maualuluga. Ua tutusa lelei a latou pasene na folasia ma pasene o va'ai i totonu o a'oga i Amerika Samoa nei.

 

E tolu tausaga ae ua avea lea a'oga i Jefferson i Kalefonia ma se tasi o a'oga i le to'asefulu maualuga i le setete o Kalefonia. O ai na suia togi o le fanau?

 

Ua suia ina ua loto i ai faia'oga uma i totonu o lea a'oga, e galulue fa'atasi toe faia suiga i a latou ala o a'oa'oga, va'ai toto'a i mana'omia o fanau o vaivai i mataupu, ma taumafai e fa'aosofia lo latou naunau e fia iloa ma ausia ai togi maualuluga, ina ia le i ai se tamaititi e to'atasi e vaivai mai i a'oa'oga.

 

Sa ia talanoa e fa'amalosi i faia'oga. "Aua ne'i e manatu fa'apito ia te oe ma se mea ua e iloa, ae ao ina e fa'asoa se mea lelei i isi ou uso a faia'oga, fesiligia fo'i se latou manatu i ni mea ua e mana'omia ai le fesoasoani. Amata mai ia te oe le faia'oga, soso'o ai ma lou fa'asoa atu i isi faiaoga, soso'o ai ma le fefa'asoa'i ma le pulega o le tou a'oga, ma o'o atu ai le fa'asologa i le Matagaluega."

 

"E mautinoa, e mana'omia ona faia suiga! Suiga tetele fo'i i nisi a'oga, fa'ato'a amatalia ai se faiga fou e lelei ai le aoa'oga o le fanau a'oga. A'o lea ua tatou fa'atasi nei i lenei fa'alauiloaga o se faiga fou, e le toe tatau ona fa'asili sou manatu fa'apito ia te oe, ae tatala lau va'ai, tatala lou taofiofimamau, ae fa'aulufale le lagona lelei, e te fia faia se mea lelei mo le vasega o fanau, lea e tu'ua lou potu a'oga, ae ete le o gafatia ona o'o i ai lau fa'asoa, ia poto ma a'oa'oina e saunia ai mo le isi vasega o le a ulufale atu i ai,” o le saunoga lea a Johnson i le semina muamua ananafi.

 

"E sili atu ona faigofie o le aoao o le fanauiti ina ia atamamai, e o'o ina matutua o lo'o gafatia e i latou ona faia filifiliga ma fa'ai'uga tatau i o latou soifua i le avea ai ma tagata matutua agava'a, nai lo le taumafaiga o lo'o fa'atinoina nei e le Vaega o Fa'amasinoga ma le lautele o isi tagata o ola feso'ota'i ma tagata matutua ua fesasia'i a latou filifiliga ma fa'ai'uga, ua le i'u lelei ai i lenei olaga, ae ua solituina tulafono.”

 

"Tatou te ioe fa'atasi, ina ua le faia lelei la tatou vaega o le aoaoina lelei o fanau, ua matele ai ina fa'aletonu a'ia'i le to'atele o fanau, ua le ausia e i latou avanoa lelei e tautua ai i ni faiva sa tatau ona agava'a ai.”

 

Na fesiligia e ia le vasega o faia'oga, "E to'afia outou faia'oga, ua o ese mai vasega sa outou a'oa'oina i le tausaga a'oga ua tuana'i, ae ua e silafia lelei, e i ai fanau a'oga o lo'o ua fa'asolo atu i le isi vasega fou i lenei tausaga, ae le'i lava tapena i latou? O le a sou lagona o ia te oe i lenei taimi?"

 

“I totonu o lau vasega ua e silafia lelei le tamaititi ua gafatia e i latou le vasega ua e aoaoina, o i latou na e faigofie ia i latou mataupu o le vasega, peita'i o lo'o i ai le isi vaega, ua e silafia lelei lava le faigata ia i latou o mataupu tau'ave i lau vasega, o i latou na e ao ina e fa'ataua lelei, ma e taumafai ia laugatasia ona popoto i latou uma e pei o isi o maualuluga togi.”

 

E 23 tasuaga e ao ina fa'aaogaina ai se polokalama e aoga tele mo le fa'aleleiga atili o togi o le fanau a'oga i tulaga tau le fua fa'alea'oa'oga i totonu o se atunuu, peita'i e 13 tausaga e aoaoina ai le fanau mai lona la'ititi se'ia o'o ina mae'a le a'oga maualuga. O lona uiga e 10 isi tausaga lea e tatau ona fa'aofi uma i lea fuafuaga fa'ataoto ia fa'atautaia e tusa ma le alafua ua mae'a fuafua mai.

 

O lo ua fa'ailoa mai fo'i i lenei semina le aoga o le va'ai toto'a i le fua o le galuega, ae le o le na'o le va'ai ma fa'aalu le taimi aoga e fa'atino ai le galuega i le taumafaiga e maua'a le autu o le galuega. I le taga'i atu i le vasega o faia'oga na auai, ua ese lo latou naunau ua i ai, sa matua iloga le fa'alologo, o'o i le taimi o fetufa'iga, ua amata ona fa'atalanoa mafuaga e tuai ai ona tino mai se taumafaiga, pe maua ni fua lelei o se taumafaiga e fa'aulufale faiga fou e fa'aosofia ai le naunau o le fanau ia a'oa'oina, fa'alogo ma usita'i i fa'atonuga.

 

"A ulufale le tamaititi a'oga i lou potu a'oga, o oe ua i ai le pule ma le malosi'aga e fa'atino ai le a'oa'oga, ae le o le toe tu'ua'i mai i Matua ona ua le faia le galuega a matua, e amata a'oa'o latou fanau. Faia'oga o oe le ki ma le tatala i lou taimi atoa i lo latou olaga a'oa'oina. E ese latou aiga, e le o iloa fo'i e i tatou lu'iga o feagai ai ma matua ma fanau i totonu o latou aiga, ae o lou lava taimi. O oe le faia'oga, ua e pule ai, ua i ai ma le malosi atoatoa e fa'atino ai le a'oa'oga mo tamaiti uma lava, ae le na'o sina vaega ua e fiafia i ai o lau vasega.”

 

E tu'usa'o faamatalaga, ma e 'aitonu fo'i fa'amatalaga na fa'afofogaina e le vasega o faia'oga, pulea'oga, sui pulea'oga, ma so'o se ituaiga tagata e fai o latou vaega i le a'oa'oga o tatou fanau, ma ua avea ma mea e matala ai o latou loto i le galuega o le a'oa'o atu i le vasega atoa, ae maise ia i latou o fanau e sili lo latou mana'omia.

 

O le vasega o le semina i le aso ananafi, i le Lee Auditorium, o Faia'oga o A'oga Maualuluga ma Faia'oga o le SPEd.