Ads by Google Ads by Google

E le fa’amaonia le moliaga sa tu’uaia ai Sione Setu


[ata: SN]
ausage@samoanews.com

E le i mafai e le malo ona tuuina atu mau fa’amaonia e lagolago ai le latou tagi fa’asaga i le susuga a Sione Setu, ina ua tuuina mai le fa’aiuga a le vaega iloilo iuga, e le fa’amaonia le moliaga mamafa o le tagofia o itutinosa sa sa tu’uaia ai o ia e le malo.

 

E tusa ma le 2 itula na iloilo ai e le vaega iloilo iuga la latou fa’aiuga, ae tuuina mai loa le faaiuga e le nofosala Setu i tu’uaiga fa’asaga ia te ia.

 

Na fa’afetaia e le afioga i le ali’i fa’amasino sili ia Michael Kruse ali’i ma tama’ita’i iloilo iuga, e tusa ai o le galuega fita sa latou fa’atinoina.

 

O le tama’ita’i loia sili lagolago ia Christy Dunn na tula’i mo le malo, ae o le ali’i loia ia Marcellus T. Uiagalelei na tula’i mo Setu.

 

O Setu, o se ali’i faiaoga i le aoga maualuga a Tafuna na tu’uaia i lona tagofia o itutinosa o se tama’ita’i aoga e 15 tausaga le matua i le aso 26 Aperila 2017 i totonu o le potu aoga.

 

A o le i tuuina atu le mataupu e iloiloina e ali’i ma tama’ita’i iloilo iuga, na maua le avanoa o loia mai itu e lua e tuuina atu ai a laua fa’afinauga mulimuli e tusa ai o le mataupu fa’asaga ia Setu.

 

FA’AFINAUGA FAAI’U

 

Na taua e le loia a le malo i lana fa’afinauga faai’u e fa’apea, e tumau lava le talitonuga o le malo, o le mataupu e pei ona latou finauina nei, e fa’atatau lea i se ali’i faiaoga ua ova atu ma le tulaga e tatai ona i ai amioga sa ia faia.

 

O ia amioga o lona tagofia lea o itutinosa o le tama’ita’i na a’afia, ao taumafai le tama’ita’i e fa’amatala atu ia te ia tulaga e le o malamalama ai i le mataupu o le Numera.

 

E le gata sa ia faia lea tulaga, ae sa ia toe ala usu i le taeao na sosoo ai ma fa’atoese i le tama’ita’i na a’afia, atoa ai ma lana talosaga, ina ia natia pea lava i lo la va le mea sa tula’i mai.

 

Na finau Dunn e fa’apea, ua lava ma totoe mau sa tuuina atu e le malo e lagolagoina ai le latou tagi fa’asaga ia Setu. E le gata sa ia faia ma lona iloa le gaioiga sa ia faia, ae sa ia fa’aaogaina fo’i lona tulaga fa’a faiaoga e faataunuuina ai nei uiga le manuia.

 

I le faaiuga o le fa’afinauga a Dunn, na ia talosaga atu i ali’i ma tama’ita’i iloilo iuga ina ia fa’afo’i mai le fa’aiuga e nofosala Setu i le tagi fa’asaga ia te ia.

 

Na taua e Uiagalelei i lana fa’afinauga e fa’apea, e leai se faamaoniga o le tagi a le malo fa’asaga ia Setu, poo se molimau e atagia mai ai sa ia tagofia le itutinosa o le tama’ita’i na a’afia.

 

Na fa’amamafa e Uiagalelei i lana fa’afinauga e fa’apea, na pau le fa’amatalaga a le tama’ita’i na a’afia, sa tago Setu i lona fatafata ma lona vae. E le o i ai se molimau faapea sa tago Setu i lona itutinosa.

 

O le fa’afinauga a le malo fai mai e na o le tama’ita’i na a’afia sa faamuli ina ua mae’a le vaega, na teena e le itu tete’e. Saunoa Uiagalelei e fa’apea, e to’a 5 isi tamaiti aoga fa’atasi ai ma le tama’ita’i na a’afia na nonofo ina ua mae’a le vaega e fesili i le ali’i faiaoga i mataupu e le o malamalama ai.

 

Ina ua mae’a ona tali e Setu fesili a isi tamaiti aoga e to’a 5, ona latou tuua lea o le potu, sei vagana ai le tama’ita’i na a’afia na fa’aauau pea ona nofo, ona sa mana’o e talosaga ia Setu pe mafai ona toe fa’afo’i atu ana earphone sa aveese atu e le ali’i faiaoga mai ia te ia i aso e 2 ua tuana’i, ina ua maua o loo faalogologo i lana telefoni i le taimi o le vasega.

 

Na taua atili e Uiagalelei e fa’apea, e leai ma se mau e laglagoina ai le tagi a le malo fa’asaga ia Setu.

 

O le taeao na sosoo ai, na alu ai Setu ma fesili i le tama’ita’i na a’afia, pe aisea ua ia fa’asalalau solo ai nei mau tala e fa’atatau ia te ia. E leai se tali a le tama’ita’i i lea fesili. Ina ua talanoa fo’i le tama’ita’i na a’afia ma le sui pule aoga i le aso na sosoo ai, na taua ai e le tama’ita’i na a’afia e fa’apea, e leai se mea na tupu i le va o ia ma le ali’i faiaoga.