Ads by Google Ads by Google

E le fa’amaonia moliaga mamafa na tu’uaia ai e le malo le ali’i Faifeau


[ata: foa'i]
ausage@samoanews.com

E le i mafai e le malo ona latou tuuina atu uma mau faamaonia e lagolago ai le latou tagi sa faila fa’asaga i se ali’i Faifeau e 56 tausaga le matua, lea sa tu’uaia i lona faia lea o ni uiga mataga i lona afafine na vaetama e se isi aiga.

 

I le fa’atamala ai o le malo e tuuina atu i luma o le fa’amasinoga mau e lagolagoina ai le latou tagi, na le mafai ai loa e le vaega iloilo iuga e to’a 6 ona latou fa’amaonia moliaga mamafa e 3 sa tu’uaia ai le ali’i Faifeau.

 

O ia moliaga e aofia ai le faia o uiga mataga faasotoma, tagofia o itutinosa o se tama’ita’i e le aiga i ai, atoa ai ma le fai’aiga i se tama’ita’i e tau toto i ai.

 

Sei vagava ai le moliaga mama e tasi o le faia lea o gaioiga e lamatia ai le saogalemu o fanau laiti ua ta’usala ai le ali’i Faifeau. Ma ua fa’amoemoe o le aso 2 o Novema o le tausaga nei lea ua fa’atulaga e lau ai le fa’asalaga a le ali’i faifeau.

 

O le ali’i loia fautua ia Rob McNeill na tula’i mo le ali’i Faifeau, ae lagolago i ai le isi loia fautua ia Ryan Anderson ma le ali’i suesue ia Paepaetele Suisala Jr. O le itu a le malo na tula’i ai le ali’i loia sili lagolago ia Robert Morris, ae lagolago i ai le isi loia sili lagolago ia Jason Mitchell.

 

FAAFINAUGA FAAI’U A LOIA

 

Na taua e le loia a le malo ia Mitchell i lana fa’afinauga fa’ai’u e faapea, o mau faamaonia na folasia e le malo i le taimi atoa sa iloilo ai lenei mataupu, ua faamaonia ai le latou tagi fa’asaga i le ua molia, i lona faia lea o uiga mataga i lona lava afafine i le vaveao o le aso 6 o Tesema, 2016.

 

O le faamaoniga o lea faafinauga e pei ona taua e Mitchell, e fa’afitu ona fa’amatala e le teineititi na a’afia le mea sa tupu ia te ia. E le gata sa ia faamatala i lona Tina o loo tausia o ia, ae sa ia faamatala fo’i i Leoleo, o lona Tama o loo tausia o ia, o sui o le Ofisa o Auaunaga Lautele, o le Foma’i, o le fa’amasinoga, atoa ai ma lana fa’amatalaga tauto.

 

E ese mai i tagata na fa’ailoa i ai e le teineititi na a’afia le fa’alavelave sa tula’i mai, ae sa maua fo’i le avanoa e molimau ai i luma o se iloiloga sa faia i le Fa’amasinoga Fa’aitumalo i le masina o Me o le tausaga na te’a nei, e pei ona taua e le loia a le malo.

 

I lea iloiloga, na maua ai fo’i lona avanoa e fa’asoa ai lagona mafatia e uiga i le fa’alavelave sa tula’i mai.

 

“E faapefea ona tatou iloa sa fa’atino e le ua molia lenei solitulafono,” o le fesili lea a le loia a le malo.

 

“E le gata e fa’atele ona fa’amatala e le teineitiiti na a’afia le mea sa tupu, ae le i fa’atali fo’i o ia i se isi lava taimi, ae na taunu’u loa i lona aiga ona ia fa’amatala ai loa lea i lona Tina ma lona aiga, ma i’u ai loa ina logo le Ofisa o Leoleo.”

 

I le fa’aiuga o le fa’afinauga a le malo, na talosagaina ai e le ali’i loia ia Mitchell le vaega iloilo iuga ina ia iloilo ma le toto’a mau faamaonia, ma ia latou fa’afo’iina mai le fa’aiuga e nofosala le ua molia i moliaga uma ua faia fa’asaga ia te ia.

 

Na taua e le loia a le ua molia ia McNeill e fa’apea, o le tagi lea ua faila e le malo fa’asaga i le ali’i Faifeau, o se tagi e pito sili ona matuia, e sili atu ona matuia nai lo le fasioti tagata.

 

Afai e pito sili atu ona matuia tu’uaiga ua faila e le malo fa’asaga i le ali’i Faifeau, e tatau fo’i la i le malo ona latou aumaia mau faamaonia e sili atu ona lelei ma mautu e lagolago ai le latou tagi.

 

“E ui i le matuia o le tagi ua faila e le malo fa’asaga i le Faifeau, e leai ma se mau faamaonia na latou tuuina mai e lagolago ai lenei tagi,” o le saunoaga lea a McNeill.

 

“Latou te lei pu’eina le taimi na faatalatalanoa ai e Leoleo le ali’i Faifeau, latou te lei aumaia se ata o le fale e faailoa mai ai foliga o le siosiomaga o le nofoaga na tula’i mai ai le solitulafono, latou te lei aumaia fo’i matua o le teineititi e molimau i lenei mataupu.”

 

Na taua e McNeill e fa’apea, na oo lava i le  Leoleo sa amataina le suesueina o lenei mataupu, e le i mafai fo’i e le malo ona aami e molimau i lenei mataupu.

 

Na pau le molimau na mafai e le malo ona tuuina mai e pei ona taua e McNeill, o le molimau a le Leoleo sa fesoasoani i le suesueina o le mataupu, faapea ai ma le Foma’i sa ia faia le suega i le teineititi na a’afia.

 

Ae o ia molimau, e le i taitai mafai ona lava e lagolago ai le tagi a le malo fa’asaga i le ua molia.

 

I le faaiuga o le fa’afinauga a le itu tete’e, na talosagaina ai loa e McNeill le vaega iloilo iuga, ina ia latou fa’afo’iina mai le fa’aiuga, e le nofosala le ua molia i tu’uaiga uma a le malo fa’asaga ia te ia.

 

O le afioga i le Fa’amasino Sili ia Michael Kruse na fa’atautaia le fa’afoeina o lenei fa’amasinoga autu, lagolagosua i ai afioga i ali’i Fa’amasino Lagolago ia Faamausili Pomele ma Muasau Tasina Tofili.