Ads by Google Ads by Google

Avea le ‘ava malosi ma fa’apogai o le tele o solitulafono eseese


[ata: foa'i]
ausage@samoanews.com

Ua maitauina le i ai o le sao o le ‘ava malosi i le fa’apogai o le tele o solitulafono eseese o lo o tofu atu i luma o le Fa’amasinoga Fa’aitumalo i aso ta’itasi.

 

E tusa ai ma fa’amaumauga a le fa’amasinoga, toeitiiti o mataupu uma e tofu atu i luma o le Fa’amasinoga mo le ulua’i taimi, e a’afia ai lava le ‘ava malosi.

 

I galuega fa’atino a le Fa’amasinoga Faaitumalo i lenei vaiaso, sa maitauina ai i ripoti mai le Ofisa o Leoleo, o le to’atele o i latou na taofia ma molia i solitulafono eseese, sa tagofia le ‘ava malosi i le taimi na fa’atino ai le solitulafono.

 

O se tasi o mataupu sa molimauina le a’afia ai o le ‘ava malosi, o le mataupu lea a le susuga a Anesi Aukusitino, lea na taofia faapagota e Leoleo i le po o le aso Gafua o le vaiaso nei, ona o tu’uaiga i lona tu fua i le fanua o le isi aiga ma fa’atupu ai se vevesi.

 

I le tula’i ai o Aukusitino i luma o le fa’amasinoga mo le taimi muamua i le aso Lua o le vaiaso nei, sa ia teena ai moliaga mama e 2 ua tu’uaia ai o ia e le malo. Ae talu ai o le matuia o le tu’uaiga fa’asaga ia te ia, na fa’atulaga ai loa e le Fa’amasinoga le tupe e $500 e tatala ai tua.

 

E pei ona taua i fa’amaumauga a le fa’amasinoga e fa’apea, o se vevesi na tula’i mai i le afioaga o Vaitogi i le po o le aso Gafua na te’a nei, na talosagaina ai loa e aiga na a’afia se fesoasoani a le Ofisa o Leoleo i Tafuna.

 

Na taunu’u Leoleo ma latou vaaia ai le tumu tumu o tagata i luma o le fale o le aiga na tula’i mai ai le vevesi, ae o le taimi lea o lo o taumafai ni tagata e fa’ato’a filemu se ali’i e foliga mai o lo o ‘ona. O ia lea o Aukusitino, le o lo o molia i lenei mataupu.

 

Na taua e nisi o le aiga i Leoleo e fa’apea, na fa’ateia le to’atele sa i ai i le fiafia ina ua latou faalogoina le faaumuumu o le ua molia ma laulauvavale solo. Na taumafai lona Tama e fa’afilemu le ua molia peita’i na atili ai ona pisa ma vevesi solo o ia.

 

Na tuli e le Tama le ua molia e alu i le fale, peita’i e le’i umi ona alu ese atu o ia, ae toe vaaia loa e tagata ua aga’i mai o ia ma se agaese i lona lima. Na aga’i atu ni ali’i o le aiga ma tuli ese le ua molia, ma faafesoota’i ai loa Leoleo mo se fesoasoani.

 

Ina ua fesiligia e Leoleo le ua molia, sa fa’alogoina le malosi o le manogi ‘ava malosi sa sau mai lona tino.

 

Afai ae tatala i tua Aukusitino, ua faatonuina o ia e le Fa’amasinoga e aua ne’i toe oo i le fanua ma le fale o le aiga na tula’i mai ai le fa’alavelave. Ua faasa fo’i o ina ia taumafai e fa’afesoota’i molimau a le malo, pe na te toe tagofia fo’i le ‘ava malosi.

 

O le isi mataupu na tofu atu i le Fa’amasinoga i le vaiaso nei na a’afia ai fo’i le ‘ava malosi, o le mataupu fa’asaga i se ali’i ua tu’uaia i lona faaoolima lea i lona to’alua i Fagatogo.

 

Na teena e le ali’i e 41 tausaga le matua moliaga mama e 3 fa’asaga ia te ia. O ia moliaga e aofia ai le faaoolima i le tulaga tolu, faatupu vevesi i totonu o lona aiga, atoa ai ma le faia o gaioiga e ono lamatia ai le saogalemu o fanau.

 

Ua toe tatala i tua le ua molia e aunoa ma se tupe e totogi, peita’i ua fautuaina o ia e le fa’amasinoga e aua ne’i ona toe taumafai e fa’afesoota’i lona to’alua ma lana fanau, ma ia saili fo’i se isi nofoaga e nofo ai, a o fa’agasolo ai taualumaga o lana mataupu.

 

Afai na te vaaia lona to’alua ma lana fanau i se vaega o le taulaga, e le tatau ona ia talanoa i ai, ae o lona tiute o le savali ese mai ai.

 

Na taua i faamaumauga a le fa’amasinoga e fa’apea, o le vevesi na tula’i mai ina ua tula’i mai se tauga upu i le va o le ulugali’i ao faalogologo ai le la fanau. O le tauga upu na mafua mai ina ua masalosalo le ua molia, o lo o i ai se isi ali’i o lo o fai ma talanoa i ai lona to’alua i luga o le telefoni.

 

O le ita tele o le ua molia, na ia po ina ai foliga a lona to’alua ao sii e le fafine le la pepe e 2 tausaga le matua. Na faaauau pea ona fasi e le ua molia lona to’alua i luma o lana fanau, atoa ai ma lona leotele i luga na mafua ai loa ona lagona e aiga tuaoi le vevesi, na logo ai loa Leoleo mo se fesoasoani.

 

Na auina atu le fafine i le falema’i i Fagaalu mo togafitiga, ona o se manu’a mitimiti sa a’afia ai lona fofoga agavale.

 

Na faailoa e le fafine i Leoleo e fa’apea, sa ‘ona lona to’alua i le taimi na la vevesi ai, ma ia tu’iina ai lona mata ma ta’e ai. Na taua fo’i e le fafine i Leoleo le fasi o ia e lona to’alua ao ia sii lana tama e 2 tausaga le matua.

 

O le mataupu lona tolu na a’afia ai fo’i le ‘ava malosi o le vevesi lea na tula’i mai i Tafuna i le va o ni ali’i se to’afa, e mafua mai i se inugapia sa faia i le fale o le isi ali’i na loka e Leoleo.

 

E to’alua ali’i na taofia e Leoleo ma ua molia i moliaga ta’i 2 o le faaoolima i le tulaga tolu atoa ai ma le faatupu vevesi i nofoaga faitele. O i laua e to’alua ua molia o Laina Wilson ma Afred Nonu.

 

E pei ona taua i fa’amaumauga a le fa’amasinoga, o se fiafia sa faia i le fale o Wilson mo le aso fanau o si ona Tina, na faapea fo’i ona valaaulia ai nisi o ana uo, e aofia ai ma le ali’i o Nonu.

 

O se feeseesega o manatu i le va o Wilson ma Nonu, na mafua ai loa ona tula’i mai se tauga upu i le va o ali’i e to’alua, ma tu’i ai loa e Nonu ia Wilson ma pau ai i lalo. Na tu mai Wilson i luga ma tu’i fo’i Nonu.

 

Na vave ona fa’afilemu le vevesi ina ua laga mai tagata sa i ai i le fiafia ma taofi le fusuaga, ae o le taimi fo’i lea na taunu’u ai ma le ta’avale Leoleo na vili e aiga tuaoi.

 

O ni isi o tuutuuga o lo o tatala ai i tua Wilson ma Nonu, e le gata ua fa’asa ona la toe tagofia le ‘ava malosi, ae ua fa’asa fo’i ona toe soli se tulafono ao fa’agasolo ai taualumaga o le la mataupu i luma o le fa’amasinoga.