Ads by Google Ads by Google

Aso mo tagata faigaluega - Auauna le fa'atuaoia, Mo Se Lumana'i manuia!


O se va'aiga i le solo mai a le Arts Council ma ua fa'aalia fo'i la'ei Samoa moni a le tama'ita'i o Bernie Fruean. [ata: Leua Aiono Frost]l

Lina Petaia Samuelu ma ana soa i le latou matagaluega o le DOC i le aso o tagata faigaluega i le aso Faraile ua te’a. [ata: Leua Aiono Frost]

Fa'atonu o le Ofisa Paketi a le malo Mrs Cathryn Aigamaua Saelua ua ta'ita'ia maia fo'i le latou solo fa'aaloalo. [ata: Leua Aiono Frost]

E nao le to'alua lava sui faigaluega a le Ofisa o Turisi a le tatou malo ma sa fiafia i la'ua e fa'alauiloa le la'ua fo'i Ofisa taua tele i tulag ao atina'e a le Malo Amerika Samoa. [ata: Leua Aiono Frost]

O le taeao o le Aso Faraile ua te’a na fa’amanatuina ai le Aso Mo Tagata faigaluega i le atunu’u, Workforce Day i le Veterans Memorial Stadium i Tafuna, e taualoa ai le latou tautua i le atunu’u.

 

O le 'auga o le aso, ‘Auauna le Fa'atuaoia  mo se Lumana'i Manuia’ lea ua iloga lava le taumafaiga a tagata faigaluega uma i lenei tausaga tausaga.

 

O se tima'i a le afioga le Kovana Sili, Lolo Matalasi Moliga, i lana saunoaga, i le mamalu o le aufaigaluega, "Ia avea lau auaunaga i se mea itiiti ua fa'atuatuaina ai oe e fa'atinoa i sau galuega ua faia i lau matagaluega, ma puna'oa ia te oe mulimuli ane ona o lou fa'amaoni e faia. Ia fai lou faiva, amata ia te oe ona fa'ataunu'u lelei ou tiute, ona fa'afaigofie fo'i lea ona faia e nisi o lo'o matamata mai ia te oe. Ia matua fa'ai'uina o outou faiva."

 

"Ua i ai nisi ua le o'o mai i lenei fa'atasiga le soifua, ae ua afemoe le faigamalaga ae o lo'o latou galulue lava, amuia i latou na ua vala'au mai le Tama, ae o loo fa'apea ona fai. O i latou sa i ai fo'i le tula'i fa'aaloalo mo i latou, ma o nisi ua sa tutula'i i tofiga taiulu o matagaluega tetele i le Malo. Fa'afetai mo le latou tautua."

 

O le tama'ita'i iloga i le atunu'u na tofia fa'apitoa mo le folasaga e tima'ia ai tagata faialuega i le atunuu, Lydia Faleafine Nomura, ma sa ia saunoa fo'i e tusa ai o lona sao, "Auauna le fa'atuaoia, mo se lumana'i manuia."

 

“Ua tu'ua nisi mea lelei, ae ua faia le auaunaga mo mea silisili, o le uiga tonu lea o le 'au'auna le fa'atuaoia. Ua iloga lelei o lea ituaiga auaunaga e i'u ina maumau ai le ola, ae fa'amaumau le ola ina ia manuia ai le to'atele o tagata."

 

"O ituaiga auaunaga ia e matele ina tatou fa'ailo ai le Maliu Tiga o Iesu Keriso e magalo ai agasala a tagata ola uma, ma toe  fa'aolaina ai, ua le muta ai i le oti o le tino lea togiola, ae ia maua le ola e fa'avavau."

 

"Lona lua o ia ituaiga o ia tautua le fa'atuaoia, o le ofo atu a alo o le atunu'u ina ia avea ma fitafita o taua o vaega au a le Malo tele. Ua tatou iloa lelei, e i'u ina uma ai le soifua, peita'i o tiute e ao ina faia, ma e iloga ai fo'i se sao o Amerika Samoa i le Iunaite Setete o Amerika. O se sao ua fa'ailo i le tautua toto ma le tautua tuavae."

 

"O i tatou o tagata faigaluega i le Malo ma Kamupani po'o pisinisi tumaoti fo'i, ua alagatutusa i tatou ma nei fo'i tautua ua mae'a fa'ailoa. Aua o outou uma ua ofo atu o outou olaga mo le manuia o le atunu'u ma ona tupulaga fai mai."

 

"Ua tatou fa'aaogaina o tatou taimi taua e o mai ai e faigaluega ina ia fa'atino tiute e alagatatau ma galuega ua fa'atino ina ia aga'i i luma le fausaga o le itu i le tino o lenei atunu'u. O le taimi ua pu'upu'u ma e taua tele lou taimi, ae ua e fa'aaluina lou taimi sa tatau ai ona e mafuta fa'atasi i lau fanau, e faia ai tiute ua vala'auina ai oe, ia alualu le galuega. O le taimi lea e tau ai le olaga o i tatou uma. E taua le fa'aaoga tatau o tatou taimi e fa'atino ai galuega i tofi ua tatou galulue ai,” o sana toe fa'aopoopo mai lea.

 

"E taua le tatou fa'aalu o tatou taimi taua ma le aoga ina ia fa'atino galuega ia lelei ma tapena ai manuia e soloa'i mai mo tagata uma ma lo tatou malo, pe afai tatou te fa'aaoga tatau o tatou taimi ua fa'aalu mo le fa'atinoga o galuega ua atofa ia i tatou e faia. O le manuia lea o le lumana'i o Amerika Samoa."

 

"Auauna le fa'atuaoia, o le ola galuea lea e amata mai lava i totonu o tatou aiga, se'ia pa'ia lau galuega, toe o'o atu i galuega fa'atino mo le galuega a le Atua, o ala na o manuia mai galuega le fa'atuaoia."

 

"O ia galuega e faia e tagata loto tetele, ma ua latou fa'amalolosi e le aunoa lava! E ofo atu le Ola ina ia auauna e fa'atino tiute ia soloa'i mai manuia mo tagata uma,” o le isi lea vaega o lana folasaga.

 

"O le ola le fa'atuaoia, o le ola e faifaipea. O le ola e le fa'apito na oni vaega o tagata. O le auaunaga e faia i taimi uma, e galulue, galulue pea ia soifua manuia tagata, e le fiu e galue."

 

Ua ia soso'o mai ona manatu, "Ua tatou tufi taufao i meaalofa, i taleni, e fa'aaogaina ai lo tatou ola. Tatou galulue ma auauna mai le loto alofa, leai se ola fa'apitoa leai se fa'alogologo tiga."

 

Sa ia fa'ailoa sana taumafaiga e fa'apea, "O lou nei tagata e taumafai ona ola ma auauna le fa'atuaoia. E taumafai ona fa'aaoga lelei le taimi, e ta'uleleia ai le galuega. E taumafai ona fai le galuega ma le fa'aaloalo, aua o le fa'aaloalo o le mea taua i le tatou aganu'u. Ou te talitonu, a i ai le fa'aaloalo i mea uma tatou te faia i tatou galuega, e le mafai ona le fa'amanuia mai le Atua ia i tatou."

 

Sa ia saunoa fo'i e tusa o le tatou atunu'u ma ala o le tautua, "O Samoa o le atunu'u tautua. E Tautua i le Atua, e tautua i aiga, tautua fo'i i le Malo. Ia tatou tautua lelei, ma tatou Auauna le fa'atuaoia mo se lumana'i manuia."

 

Sa ia toe fa'afetaia lona avanoa ua tula'i ai mo se tima'iga i le mamalu lautele o Tagata Faigaluega uma a le Malo ma Kamupani ma Pisinisi tumaoti ua aofia. Ua atoa le 38 tausaga o lo'o faigaluega pea o ia mo le Malo o Amerika Samoa ma le Feterale po'o le Malo Tele o Amerika i lona Ofisa o le Initeria fa'alotoifale.

 

"E tele taimi e matou te fesaga'i ai ma tagata mai Ofisa o le Malo ma pisinisi eseese. E leai se taimi ou te v'aia ai ni o latou uiga vaivai, e o'o lava i tama ma tina matutua ma ta'ita'i o le tatou Malo. Na'o uiga tamali'i, uiga filemu ma atagia ai le alofa, o uiga na e faigofia ai ona faia la'u galuega."

 

Na tutula'i fo'i le afioga le Peresetene o le Senate, le afioga le Tama'ita'i o le Ao, Gaoteote Pala'ie ma ia tima'i e fa'amatafi ai le taeao toto'a ma alofaiva ai le aiga o le aoauli ma le toe tatalo na si'itia e le susuga le Tiakono Malaki Timu ma mae'a ai le aso tu'upoina mo tagata faigaluega uma i le malae ta'alo i Tafuna.