Ads by Google Ads by Google

Asiasi mai pulesili fou o le Hawaiian Airlines, fonotaga ma le kovana

fili@samoanews.com

O le po anapo sa fa’amoemoe e taunu’u ai i Amerika Samoa le peresitene o le kamupani va’alele a le Hawaiian Airlines, fa’apea ma nisi o sui sinia o le kamupani mai Honolulu. Ma o lo’o fa’amoemoe i sa latou fonotaga ma le afioga i le kovana sili, Lolo Matalasi Moliga i lenei vaiaso.

 

Fa’aalia e se so’oupu a le Hawaiian Airlines, le tamaita’i ia Ann Botticelli,  e fa’apea o le peresitene ia Peter Ingram, ma nisi o sui sinia o le kamupani va’alele sa fa’amoemo e taunu’u i Pago Pago i le po anapo, mo le fa’amoemoe e auai i se sauniga e fa’apaia ma tatala aloaia ai le fale mo oloa (cargo) a le Hawaiian Airlines i le malae va’alele i Tafuna.

 

O nisi o sui sinia o le kamupani va’alele o lo’o malaga mai e aofia ai Brent Overbeek ma Debbie Nakanelua-Richards. O lo’o malaga mai foi se tasi o tagatanu’u Hawaii, Richard Kamanu, mo lea fa’amoemoe, fa’atasi ai ma Botticelli - lea na taunu’u mai i le po o le aso Gafua.

 

E pei ona masani ai le Hawaiian Airlines, i soo se taimi e asia ai Amerika Samoa e ona ta’ita’i, e faia foi sa latou asiasiga i le afioga i le kovana. Ae peitai e le’i mafai ona fa’ailoa mai e Botticelli nisi o mataupu e talanoina ma le kovana sili, i se fonotaga i le aso Tofi.

 

Sa maua e le Samoa News ni fa’amatalaga e fa’apea o se tasi o mataupu e talanoaina i lea fonotaga e aofia ai le tu’utu’u i lalo o le tau o pasese i malaga a le Hawaiian Airlines i le va o Honolulu ma Amerika Samoa.

 

Sa fesiligia e le Samoa News le tofa ia Iulogologo Joseph Pereria, o se tasi o sui sinia a le kovana, i le tulaga o mataupu e talanoaina i le fonotaga a le kovana ma sui o le Hawaiian Airline. Ua le gata i lea, se fesiligia foi pe aofia ai i lea fonotaga le tau o pasese i le va o Honolulu ma Pago Pago.

 

Saunoa le tofa Iulogologo e fa’apea,  o se tasi o mataupu taua lava o lea fonotaga, o le sootaga lelei ma le galulue fa’atasi o Amerika Samoa ma le Hawaiian Airlines e sailia auala e atina’e ai turisi i totonu o le atunu’u, ina ia mafai ona tulaga lelei le tamaoaiga ae maise nisi o atina’e i le lumana’i tau turisi

 

Ua le gata i lea sa saunoa foi le tofa Iulogologo, o le atina’e ina o turisi i Amerika Samoa e mafai ona fesoasoani mai ai le tau o pasese ae maise le tele o aso e malaga mai ai le Hawiian  Airlines i le teritori.

 

I le taimi nei, i le taumafafana, e tolu malaga a le Hawaiian Airlines i le vaiaso, ae i ai le talitonuga o ta’ita’i o le atunu’u afai e tu’utu’u i lalo le tau o pasese o le a toatele tagata malaga mai i Amerika Samoa, ona mafai foi lea ona fa’aopoopo nisi malaga a le kamupani va’alele.

 

O le po o le aso Tofi e toe taliu ai i Honolulu sui uma o le Hawaiian Airlines. Ua maua tala le Samoa News fa’apea o le tatalaina o le nofoaga o oloa a le Hawaiian Airlines i le malae va’alele i Tafuna e aofia ai ma fa’afiafiaga, e fa’afoeina e le au faigaluega a le Hawaiian Airlines i Amerika Samoa.