Ads by Google Ads by Google

Anoanoa’i fana ma pulufana na maua e Leoleo i se fale i Kokoland


[ata: foa'i]
ausage@samoanews.com

E anoanoa’i fana e le fa’atagaina i Amerika Samoa nei atoa ai ma le faitau afe o pulufana na maua e Leoleo ina ua latou osofaia se fale i Kokoland i le 2 vaiaso talu ai. E ese mai ai i a’upega sa maua i Kokoland, na maua fo’i e Leoleo se vaega o fualaau fa’asaina o le aisa ma le mariuana ina ua latou sailia le Ofisa e galue ai le ali’i e ana le fale sa maua i ai a’upega malolosi.

 

O le fa’aiuga o lea osofaiga a Leoleo, ua molia ai nei e le malo le ali’i o Samuel Gaisoa i moliaga o le umia faasolitulafono o fualaau fa’asaina, aupega malolosi faapea ai ma pulufana.

 

E pei ona taua e le malo i le latou tagi, e osofa’i e Leoleo le fale o Gaisoa ae o le taimi lea o loo i ai o ia ma lona faletua i Hawaii e asiasi i nisi o la aiga.

 

O le po o le aso Tofi, aso 15 o Novema na toe malaga mai ai i le atunuu ia Gaisoa, ma aga’i sa’o atu loa i le Ofisa o Leoleo mo le tuu aloaia atu o ia i aao o malu o le malo. O le aso Faraile na sosoo ai, na tula’i ai loa Gaisoa i luma o le Fa’amasinoga Fa’aitumalo, ma fa’atulaga ai loa e le tama’ita’i Fa’amasino le Tumau ia Gwen Tauiliili-Langkilde le tupe e $50,000 e tatala ai o ia i tua.

 

O le ali’i loia ia Marcellus T. Uiagalelei o loo tula’i mo Gaisoa, ae o le tama’ita’i loia sili lagolago ia Christy Dunn o loo tula’i mo le malo i lenei mataupu.

 

Na teena e le Fa’amasinoga le talosaga ina ia faaitiitia i le $30,000 le tupe e tatala ai i tua Gaisoa. Saunoa Tailiili-Langkilde e fa’apea, o le tupe ua mae’a ona fa’atulaga e le fa’amasinoga, ua talafeagai lelei ma le tulaga matuia o lenei mataupu, aemaise ai lava le tele o a’upega fa’asaina sa maua i le fale a le ua molia.

 

Na finau Uiagalelei ina ia fa’aitiitia le tupe e tatala ai i tua Gaisoa. Sa ia finau e fa’apea, e tatau i le malo ona silasila toto’a i le gaioiga sa faia e lenei ali’i, o le malaga sa’o mai lava lea i Hawaii ma tuuina atu o ia i lima o Leoleo e aunoa ma le tau o atu o Leoleo e saili mai o ia. O mea uma fo’i o loo tu’uaia sa maua i lona fale, ua mae’a ona taofia uma e Leoleo, e le o toe maua fo’i se avanoa o le ua molia na te umia ai a’upega ma pulufana e pei ona finau mai ai le malo.

 

Na tete’e malosi le loia a le malo ia Dunn i le talosaga a Uiagalelei. Na taua e Dunn e fa’apea, o fana, pulufana ma fualaau fa’asaina sa maua i le fale o Gaisoa, ua atagia mai ai, o ia o se tagata mata’utia, e ono lamatia fo’i le saogalemu o le atunu’u ia te ia. Na finau Dunn i le fa’amasinoga ina ia fa’atumau pea i le $50,000 le tupe e tatala ai Gaisoa i tua, lea fo’i na talia e le fa’amasinoga.

 

O Tesema 14, 2018 lea ua fa’atulaga e faia ai le ulua’i iloiloga mo lenei mataupu.

 

TAGI A LE MALO

 

O le aoauli o le aso 14 o Novema na aga’i atu ai se vaega faapitoa o Leoleo e Suesueina Fualaau Fa’asaina e fa’ataunu’u se poloaiga a le Fa’amasinoga, e sailia ai le fale o Gaisoa i Tafuna ma Kokoland.

 

Na muamua saili e Leoleo le ofisa o Gaisoa, lea o loo i luga o le foga falelua o le Kamupani a le TMO (Tautua mo Oe) i Tafuna, fa’atoa aga’i atu ai e saili le fale o Gaisoa i Kokoland.

 

I le taimi na saili ai e Leoleo le Ofisa o Gaisoa, sa fa’apea fo’i ona i ai ma le susuga ia Frank Gaisoa Sr, o ia lea o le Pulesili o le Kamupani o le TMO.

 

Na fa’amaonia e Gaisoa Sr i Leoleo, o Sam Gaisoa ma lona faletua o loo i ai i Hawaii e asiasi i nisi o aiga o loo i ai. Sa ia faamaonia atili fo’i i Leoleo, pau tagata e i ai le ki o le Ofisa o loo fia sailia, o ia (Gaisoa Sr), o Sam Gaisoa faapea ai ma lona faletua.

 

O le mae’a ai o talanoaga sa faia, na fa’ataunu’u aloaia ai loa le sailiina o totonu o le Ofisa o Sam Gaisoa e se vaega to’atele o Leoleo. I lea sailiga, na maua ai se pepa iila o loo i ai se vaega o le pauta pa’epa’e i totonu e tusa ma le 3 kalama lona mamafa. Sa faapea fo’i ona maua ai ma se pepa iila o loo i ai lau laau mamago e foliga o lau o le mariuana, e tusa lona mamafa ma le 1 le kalama. Na maua ai fo’i e Leoleo i totonu o le ofisa ni paipa tioata se 2 e ula ai le aisa, o loo i ai vaega o le pauta o le aisa i totonu.

 

O le mae’a ai ona sailia e Leoleo o le Ofisa o Sam Gaisoa, na latou aga’i atu ai loa i lona fale i Kokoland, le fale e nonofo ai le ua molia ma lona aiga.

 

Na aga’i atu Leoleo i totonu o le fale ma latou sailia ai totonu o le potu a le ulugali’i, ma latou maua ai i luga o le vaega e teu ai lavalava se ato o loo fa’aputu ai se vaega tele o laau malosi.

 

Na aveese mai e Leoleo lea ato ma vaaia ai ituaiga laau malosi eseese o loo i ai, ma o nisi o nei laau malosi e le fa’atagaina i Amerika Samoa nei. E pei ona taua i fa’amaumauga a le fa’amasinoga, e tusa ma le 10 ituaiga laau malosi eseese na mafai ona maua e Leoleo i le latou osofaiga, ma le silia i le 2 afe pulufana i soo se ituaiga na maua ai fo’i i totonu o le fale.

 

O nisi o laau malosi na maua e aofia ai le MP5 submachine gun; tasi le fana o le ituaiga o le ‘12 gauge shot gun; 2 fana o le ituaiga o le Sig Sauer, poo le fana .22 otomeki; 2 fana o le ituaiga o le M4 rifles, ma le fana o le ituaiga o le CX4 (9mm).

 

O mea uma na maua e Leoleo i le latou osofaia e aofia ai laau malosi, o pulufana, aemaise ai fualaau fa’asaina, na aveesea uma mai ma tuuina atu i le potu e teu ai mau fa’amaonia i le Ofisa autu o Leoleo i Fagatogo.

 

Sa faia fo’i se suega i pauta papa’e ma laau mamago lanumeamata sa maua i le Ofisa o Sam Gaisoa, ma fa’amaonia ai, o le pauta pa’epa’e sa maua, o vaega ia o le aisa fa’asaina o le ‘methamphetamine’, ae o lau mamago lanumeamata na fa’amaonia i le suega, o vaega ia o le laau fa’asaina o le mariuana.

 

SUESUEGA FA’AAUAU A LEOLEO

 

E pei ona taua e le malo i le latou tagi, o le suesuega i fualaau fa’asaina ma a’upega malolosi na amata mai i le 2017, ina ua fa’ailoa e se molimau fa’atuatuaina i Leoleo nisi o nofoaga o loo tulei ma fa’atau ai fualaau fa’asaina i le atunu’u, atoa ai ma fefa’atauaiga o laau malolosi ma pulufana.

 

O le osofaiga a Leoleo na alu i le nofoaga e taua o Logotala ma le fa’amoemoe e sailia ai fualaau fa’asaina ma fana, sa lei manuia i le 2 vaiaso na te’a nei.