Ads by Google Ads by Google

AMATALIA FONOTAGA KOMESINA & TA’ITA’I LEOLEO MALO O LE PASEFIKA


O se vaaiga i le afioga le Komesina o Leoleo, Le’i Sonny Thompson (ogatotonu), Taitai Leoleo o lo’o i ona itu e lua, ma le vasega o Leoleo lautogia o le Matagaluega o le Saogalemu Lautele o le tatou malo. Ua auai i latou i le polokalama e tatala aloa’ia ai le fonotaga a le PICP lea tatou te talimalo ai Amerika Samoa i lenei vaiaso. [ata: Leua Aiono Frost]

O nisi o ali’i Komesina o Leoleo ma isi malo o le tatou atuvasa ua fa’atasi mai uma ma ua nofoia o latou nofoaga ua mae’a lautogia mo i latou. O lea fonotaga e faia mo le 3 aso soso’o. O suafa ma malo e o mai ai ua tusia ma faailoa mai i o latou luma. [ata: Leua Aiono Frost]

O le taeao ananafi na amatalia ai le fonotaga lona 48 a le Pacific Islands Chiefs of Police (PICP) lea ua talimalo ai Amerika Samoa mo le tolu aso, sa tatala i le aso ananafi i le Ottoville Professional Building i Tafuna.

 

O le ali’i fa’atonu o le PICP na tula’i e fa’alauiloa le polokalama atoa, ae maise lava i le sauniga fa’apitoa e tatalaina ai le fa’amoemoe, ma o le a taua’aoina aloaia ai fo’i ma le samala o le tofi Taitaifono i le  Komesina o Leoleo Le’i Sonny Thompson, na te tau’avea lea tofiga o le 2019-2020.

 

Saunoa le pulesili - executive director - o le PICP, Carl McLennan e fa’afeiloa’ia le  fonotaga.

 

“O le fiafiaga o le agaga, ona afai ua mae’a saunia totino ta’itasi o le PICP e so’ofa’atasi i le puipuiga o le Saogalemu Lautele o tatou tagatanu’u ma i latou o soifua fa’atasi i le tatou atuvasa, o le fa’amoemoe lava lenei e tasi e mafai ai ona tutu fa’atasi i tatou uma ma atia le pa o le saogalemu lea, ina ia le maluelueina, ae ia tumau ma mautu lona malosi,” o se tasi o lea o ‘auga o lana saunoaga.

 

“O le tutu fa’atasi, so’ofa’atasi i le fa’amoemoe o le puipuia o tatou atunu’u ta’tiasi ma le tatou atuvasa, ia malamalama ma manino faiva o tatou o fa’atinoa, ia tutusa fo’i tagata uma i le auaunaga, o ala ia e mafai ai ona ausia le tatou fa’amoemoe ua tatou fono ai i tausaga ta’itasi. Ia manuia le fonotaga,” o se toe fa’aopoopo lea a McLennan.

 

O le Loia Sili o Amerika Samoa, Talauega Eleasalo Alo sa fai ma sui o le Kovana.

 

“O faafitauli ua sofa’ia o tatou malo, pe laiti pe tetele, ua tutusa pau ai i tatou uma. Ua tutusa soligatulafono ua lutia ai Niu Ioka ma mea fo’i ua fesaga’i ma Tokelau, Samoa, Tuvalu ma Solomona, po’o i tatou uma lava. O le so’otaga o tatou fetufa’iga ma taumafai e soalaupule ni vaifofo e mafai ai ona fa’afoea tatou faigamalo ma le saogalemu o tatou tagata lautele, le tatou tofi ua fa’atino nei, o se ala lea e mafai ai ona tatou tutu fa’atasi ina ia fa’ao’o lea auaunaga i nai o tatou tagatanu’u, ma ausia ai le sini o le malu puipuia o le soifua ma meatotino i o tatou malo uma,” o le tala lea a Talauega.

 

“Faafetai i le agaga ua tatou o mai fa’atasi ai, aua o la vaitau a’o tatou laiti mai ma avea o fanau sa malupuipuia i galuega fo’i a ta’ita’i o tatou Malo i o tatou vaitau o talavou, ua le taitai ona tutusa ma le tele o mea ua fetuleni mai i o tatou vaitau. Ua tupu tele le malamalama, ua tuputele ma televave ala i feso’ota’iga, ua sau fa’atasi ai ma le fa’ateleina o ala e a’afia ai le soifua ma le ola ma’ale’ale o le tgata ola, ona o soligatulafono e fa’atino e a’afia ai e nisi ua avea ma terarisi. Ua vaivai ai le puipuiga o le saogalemu lautele i totonu o tatou malo fa’alotoifale.”

 

“Fa’afetai i fonotaga fa’apenei a ta’ita’i o Leoleo ma o latou soatau, aua e mafai ai ona so’ofa’atasi i manatu ma vaifofo e fa’atino ai tiute, ma felagolagoma’i ai i le galuega o le puipuiga o le saogalemu lautele i le tatou atuvasa. Fa’afetai i a tatou galuega fa’apenei, e ono maua ai le to’omaga e tua i ai i tatou i lenei taumafaiga e tete’e ma tali atu i le tele o soligatulafono ua lutia ai o tatou malo.”

 

Sa ia fa’afetaia sui uma i le susu mai i Amerika Samoa mo lenei fonotaga, ma ia fa’ailoa atu ia i latou, “Afai e maua sou taimi paganoa mai lenei tauaofiaga taua, ia maua sou avanoa lelei e te fiafia fa’atasi uma ai ma i matou i se matou taligamalo ua tapena mo outou i lenei tausaga.”

 

Sa saunoa foi le Peresetene o le Interpol, Kim Jong Yang. Pe’itai, o le aotelega o lea folasaga sa tula’i ai le sui Peresetene o le Interpol ma o se tasi fo’i o tagatanu’u mai le Atu Asia.

 

Sa ia fa’ailoa ai, “O soligatulafono i so’o se vaitau o le soifuaga, e leai ni ona tuaoi, e le malu puipuia fo’i o tatou atumotu ma atunu’u tetele ona o le loloto ma le lautele o le tatou moana o si’omia ai. E sofa’i lava i tatou uma i so’o se taimi e i latou ua loto ina ia solitu tulafono e aiaia ai nofo saogalemu fa’avaomalo.”

 

“O le vave fo’i ona fa’ateleina o fela’ua’iga o fuala’au fa’asaina ma elemeni fa’aniukilia i lenei vaitau i le va o malo, ua avea ma fa’amanatu maumaua’i, ua leai se vaipanoa o le lalolagi o toe saogalemu mai nei faiga solitulafono, ma ua le tatau fo’i ona tatou nofoa’i, ae galulue fa’atasi e soalaupule ala e mafai ai ona maua i latou o matua’ina nei faiga, ma fa’amalosia tulafono e fa’asala ma taofia ai.”

 

“O le tatou atuvasa, ua sili ona tele ma vavamamao o tatou atumotu ma malo, ua le faigofie ai ona aotelega i tatou i se taupulega e saogalemu vave ai, e ao ai ona fa’amalosia faigapa’aga fa’apenei e i ai le PICP ina ia mautu ai lo tatou galulue fa’atasi ia malosi le a’ao o le tulafono nai lo i latou e sofa’i mai.”

 

Na fa’ailoa fo’i nisi o galuega ua fua mai a le Interpol, ua fai si leva o tulimata’i ma taumafai ia maua ma saisaitia. ”E to’a ono nisi ua saisaitia nei mai Ausetalia ma Niu Sila ona o i latou ia ua mae’a saunia se ala e mafai ai ona fela’ua’i le tele o fuala’au fa’asaina e tusa ma le 766kg MDMA, ma e feso’ota’i ma le isi o latou lala i Peretania tele, ae faia fefa’ataua’iga i le vasa pasefika. O lea mea na fa’ato’a maua lava nei sui i le vaiaso na te’a nei.”

 

Ua saunoa fo’i Kim Jong Yang e tusa o ala o soligatulafono ua faia i tulaga o femalaga’iga ma feoa’i i tusi folau taufa’asese. “O le amataga o lenei tausaga, ua saisaitia mai ai se tasi mai Syria, ua ulufale i le Malo o Filipaina e fa’aaogaina ai se tusi folau o lo’o avea ai o ia ma tagatanu’u o Kiripati, ae na fa’atau mai mo ia e se tasi mai Ioritana, ae fa’auia mai se tasi mai Cambodia. E le faigofie ona maua i latou e faia nei ituaiga o feso’ota’iga ma feuiuia’iga fa’asolitulafono fa’avaomalo, ae fa’afetai ua maua ma ua fa’asalaina nei sui uma.”

 

O le auga o lana tima’i, “Ia outou ma tatou iloa lelei, e le malosi le tulafono, pe afai e vaivai ona faia tiute e fa’amalosia le tulafono.”