O le aso Faraile ua te’a sa amata ai ona tufatufaina e le Matagaluega o Tupe a le malo siaki o lafoga mo i latou e agava’a e maua ia siaki tupe.

Ae peitai, o ia siaki ua na o lafoga o lo’o totogina i tupe lotoifale, ae e le o aofia ai le lafoga tupe e toe maua mo fanau laiti - le Aditional Child Tax Credit (ACTC) - lea e fa’atupe ina e le malo fetarale.

E to’atele, e agava’a e maua siaki o le lafoga, o lo’o fa’atalitali i le taimi e maua ai lafoga, ma tulai mai ai ma tuuaiga fa’asaga i le malo ona o le tuai ona maua siaki o lafoga. Ae maise  lava i latou sa faila i le masina o Ianuari. O a latou fa’asea ona o le aso 15 o Aperila, o le taimi fa’atapula’a lea i le tulafono e faila ai lafoga, ae o lea lava e le’i maua a latou siaki. I tausaga ua mavae e amata ona maua siaki o lafoga i le amataga o le masina o Mati.

I se pepa o fa’amatalaga i le aso Tofi o le vaiaso ua te’a, sa fa’ailoa ai e le Teutupe a le malo, Ueligitone Tonumaipe’a, e fa’apea o le aso Faraile ua te’a, Aperila 12, e tufatufa ina ai siaki muamua o lafoga, mo i latou na faila a latou lafoga i le va o Ianuari 10 ma Ianuari 25.

Ae peitai, o ia siaki ua na o lafoga o lo’o fa’atupeina e tupe lotoifale, ae le o aofia ai le ACTC - mo i latou o lo’o agava’a i le fa’amanuiaga.

Fa’ailoa e Tonumaipe’a e fa’apea, o lo’o taofia i le taimi nei le ACTC, ona o lo’o fa’atalia se fa’aiuga mai le Matagaluega o Tupe a le fetarale. Sa ia fa’amalamalama e fa’apea o le tulafono a le fetarale - 2017 Tax Cut and Jobs Act - o lo’o aofia i ai suiga e aafia ai tulafono lafoga i Amerika Samoa, e pei o le ACTC.

“O nei suiga o lo’o iloiloina i le taimi nei” e le Matagaluega o Tupe a le fetarale, o se tala lea a Tonumaipe’a, ma ia fa’amalulu i le atunu’u ona o lenei tulaga ae maise o le tuai ona maua siaki o lafoga o le 2018.

O se tasi o suiga o tulafono fetarale, e aofia ai le siitaga o le ACTC mai le $1,000 i le $3,000 mo i latou e agava’a.

E ui i le tuai ona maua lafoga, ae sa fa’ailoa e nisi i le Samoa News, lo latou fa’afetaia o lenei vaega tupe ua maua, e fesoasoani ai i nisi o manaoga o aiga, ae o tupe totoe ua fuafua mo fa’atauga o aso fiafia o le Sisigafu’a i lenei tausaga, ae maise le fa’aiuga o le vaiaso lenei mo le Eseta.

E toe fa’amanatu atu e le Ofisa o Lafoga a Amerika Samoa i le mamalu o le atunu’u, e fa’asa i le tulafono a Amerika Samoa ma le fetarale ona faila lafoga a tagata Amerika Samoa i Amerika. O lo’o i ai pea nisi o le au totogi lafoga o lo’o ave i Amerika a latou lafoga e faila ai.