Ads by Google Ads by Google

Amata fa’amasinoga ali’i Faifeau tu’uaia faia uiga mataga i lona afafine

ausage@samoanews.com

O le vaiaso nei lea ua fa’agasolo ai i luma o le Fa’amasinoga Maualuga le fa’amasinoga autu o se ali’i Faifeau o loo tu’uaia i lona faia o uiga mataga i lona lava afafine moni.

 

Talu ai puipuiga i le ono mafai lea ona silafia le tama’ita’i o loo aafia i lenei mataupu, o le a le mafai ai e le Samoa News ona fa’alauiloa le igoa o le ua molia. Ae pei ona faaalia i taualumaga o lenei mataupu, e 13 tausaga o le teineititi na a’afia i gaioiga faasolitulafono o loo tu’uaia ai lona tama i le aso 6 o Tesema 2016. O le teineititi na a’afia, o le afafine moni lava lea a le ua molia, peita’i na vavae tama lava o ia ina ua fa’atoa fanau mai i lenei olaga.

 

O loo tu’uaia e le malo le ali’i Faifeau i moliaga mamafa e 4 e aofia ai le faia o amioga faasotoma, tagofia o itutinosa o se teineititi e le fa’aipoipo i ai, faia o gaioiga mataga faafeusuaiga, atoa ai ma le faiaiga i se tama’ita’i e tau toto i ai. O lo o molia fo’i o ia i le moliaga mama e tasi o lona faia lea o ni gaioiga e ono lamatia ai le saogalemu o fanau laiti.

 

E to’a 6 sui o le vaega iloilo iuga o loo latou fa’afofogaina mau faamaonia o lenei mataupu. O i latou nei e aofia ai tama’ita’i e to’a 3 atoa ai ma ali’i e to’a 3.

 

O le ali’i loia fautua mo tagata lautele ia Rob McNeill o loo tula’i mo le ali’i Faifeau, ae o le ali’i loia sili lagolago ia Robert Morris o lo’o tula’i mo le malo.

 

ULUA’I FOLASAGA A LOIA

 

Na taua e Morris e fa’apea, o le teineititi na a’afia na nofo lava i ona matua fai, peita’i i le aso 6 o Tesema o le tausaga e 2016, na alu ai loa o ia e tafao i ona matua moni, o le ali’i Faifeau lea ma lona faletua.

 

I le po o le aso lea, na momoe uma ai le aiga e aofia ai le ua molia ma le teineititi na a’afia i le potu e tasi. Ae i se taimi o le vaveao pe tusa o le itula e 3:00, na aga’i atu ai loa le Tina o le aiga ma se tasi o ana tama e faigaluega, ae tuua ai na o le ua molia ma le teineititi i totonu o le potu.

 

Fai mai le finau a le malo, o iina lea na tula’i mai ai loa le fa’alavelave e pei ona tu’uaia ai le ali’i Faifeau, ina ua ia toe faia ni uiga mataga i loa lava afafine a o moe o ia i luga o le moega. O le te’i o le teineititi i gaioiga sa fai atu ia te ia, na mafua ai loa ona ala i luga ma tete’e atu i gaioiga a le ua molia.

 

Ina ua malama lelei le taeao, na toe alu ai loa le teineititi i lona aiga o loo i ai ona matua fai, ma ia fa’ailoa i lona Tina le fa’alavelave sa tupu, ma logoina ai loa le Ofisa o Leoleo e uiga i lenei mataupu.

 

Ae i le fa’afinauga a le itu tete’e, na taua ai e le ali’i loia ia McNeill e fa’apea, o le mataupu fa’asaga i le ali’i Faifeau, e le o se mataupu e fa’atatau i le faia o ni uiga mataga fa’asaga i lona afafine, ae o se mataupu e fa’atatau i se teineititi ua omia o ia i le va o ni lagolago eseese se 2, o lona aiga moni lava atoa ai ma lona aiga fou lea ua nofo ai nei.

 

Na taua e McNeill e fa’apea, e eseese ituaiga olaga na vaaia e le teineitiiti na a’afia i aiga ia e lua. O lona aiga fou e pei ona i ai ona matua fai, e fai ma latou malaga i Kalefonia i Amerika e nonofo ai ma toe fo’i mai i Amerika Samoa nei, ae o lona lava aiga moni, e nonofo pea lava i latou i Amerika Samoa nei.

 

O le po e pei ona finau le malo na tula’i mai ai le fa’alavelave, na taua e McNeill e fa’apea, sa i ai uma lava le ua molia, o lana fanau e to’a 3 faapea ai ma le teineititi na a’afia i totonu o le potu, ina ua aga’i atu le Tina o le aiga ma le isi ona afafine e faigaluega i se taimi o le vaveao.

 

Na taua e McNeill e fa’apea, e leai se taimi o le vaveao na tuua ai na o le ua molia ma le teineititi na a’afia i totonu o le potu. Na oo lava i le taimi n aga’i ese atu ai le fanau a le ua molia i le aoga, fa’atasi ai ma le teineititi na a’afia, e lei fa’alogoina lava e le fanau a le ua molia se fa’amatalaga e uiga i se faalavelave sa tula’i mai i le va o le latou Tama ma le teineititi na a’afia.

 

O le afioga i le Fa’amasino Sili ia Michael Kruse o loo fa’atautaia lenei mataupu, ae lagolagosua i ai afioga i Fa’amasino Lagolago ia Faamausili Pomele ma Muasau Tasina Tofili.