Ads by Google Ads by Google

Amata aloaia le fa’amasinoga autu o Tautua Letasi


[ata: foa'i]
ausage@samoanews.com

O le aso Lua o le vaiaso nei na amata aloaia ai le fa’amasinoga autu o se ali’i mai Aoloau, lea o lo o tu’uaia i lona umia fa’asolitulafono o fualaau fa’asaina o le aisa ma le mariuana ma le fa’amoemoe e tulei pe fa’atau atu i isi tagata, atoa ai ma isi moliaga e 2 o lona umia fa’asolitulafono o ni fana e le i lesitalaina.

 

O le ali’i Loia Fautua lagolago ia Ryan Anderson o lo o tula’i mo Tautua Letasi, ae o le ali’i Loia Sili lagolago ia Woodrow Pengelly o lo o tula’i mo le itu a le malo.

 

E to’atolu tama’ita’i faapea ai ma ali’i e to’atolu o le vaega iloilo iuga na filifilia i le aso Gafua latou te iloiloina mau fa’amaonia o lenei mataupu. O le tama’ita’i loia sili lagolago ia Bianca Lherisson o lo o lagolago ia Pengelly i lenei mataupu, ma le ali’i Leoleo Suesue ia Det. Savelio Vaofanua sa autu i ai le suesueina o le mataupu fa’asaga ia Letasi.

 

O le afioga i le ali’i fa’amasino sili ia Michael Kruse o lo o taulimaina lenei mataupu, ae lagolago i ai afioga i ali’i Fa’amasino Lagolago ia Fa’amausili Pomele ma Muasau Tasina Tofili.

 

O le mae’a ai ona tu’uina atu e le fa’amasino sili o fa’atonuga mo le vaega iloilo iuga, na maua ai loa le avanoa o loia mo a laua ulua’i fa’afinauga. O ulua’i fa’afinauga, o le avanoa lea e folasia ai e le loia a le malo se ata fa’ata’ita’i o le latou tagi fa’asaga i le ua molia, ae o se avanoa fo’i lea mo le loia a le itu tete’e e fa’ailoa ai le auala ua mafua ai ona latou teena le tagi.

 

Na taua e le loia a le malo e fa’apea, o le tagi fa’asaga ia Letasi, na tula’i mai i le taeao o le aso 21 o Me, 2017, i le taimi a o tiute ai le ali’i Leoleo o Justin Thomsen i luga o le auala i Futiga i le mata’ituina lea o ta’avale fegasoloa’i i luga o le auala.

 

A o aga’i atu le ta’avale a le ali’i Leoleo, na fa’afuase’i ona ia vaaia se ta’avale o lo o aga’i atu i le isi itu i se saoasaoa uiga ese. Na taofi e le ali’i Leoleo ia Thomsen le ta’avale na alu saoasaoa ma iloa ai, o le ua molia o lo o fa’afoeina le ta’avale.

 

A o fa’amanino e le ali’i Leoleo ia Letasi le mafua’aga ua taofi ai lana ta’avale, na iloa atu e le Leoleo i le nofoa pito i tua o le ta’avale se mea e pei o se fana lona foliga mai. Na fesili Leoleo ia Letasi poo le a le mea o loo i tua o le ta’avale, ae na tali le ua molia, o le fana o loo ave e fai.

 

Na avea le masalosalo o le ali’i Leoleo ma itu na fa’atonuina ai loa Letasi la te o i le Ofisa o Leoleo i Tafuna e fa’atalatalanoa atili ai le mataupu.

 

Ina ua saili e Leoleo le ta’avale a le ua molia, na maua i ai se fana. Sa i ai fo’i i totonu o le ta’avale se ato faafafa. I totonu o lea aso fa’a fafa, sa maua i ai pepa iila o lo o i ai vaega o le pauta o le aisa faapea ai ma le mariuana. Sa maua ai fo’i ma isi vaega e fa’aaoga e i latou e tuleiina fualaau fa’asaina.

 

Na fa’aauau le sailiga a Leoleo i le fale a Letasi i Aoloau, ma latou maua ai i lalo o lona moega le isi fo’i fana e le i lesitalaina, faapea ai se paipa e ula ai le aisa o loo to’a ai vaega o le pauta o le aisa. Sa maua ai fo’i isi mea e fa’aaoga e tagata e tuleiina fualaau fa’asaina.

 

Na taua e Pengelly i le vaega iloilo iuga e fa’apea, o mea uma sa maua e Leoleo i le fale o Letasi ma lana ta’avale, ua lava lea e fa’amaonia mai ai o ia o se tagata o loo tuleiina fualaau fa’asaina.

 

Ina ua maua le avanoa o le loia a Letasi e folasia ai lana ulua’i folasaga, sa ia fa’ailoa ai i le vaega iloilo iuga e fa’apea, o le a fa’amaonia i mau o le a tuuina atu e le latou itu i luma o le fa’amasinoga, o le ta’avale na alu atu ai Letasi i le aso lea, e le o sana ta’avale. E o o fo’i i le ato fa’a fafa sa i tua o le ta’avale, e le iloa e Letasi poo ai e ana lea ato.

 

Na talosaga le loia a le itu tete’e i le vaega iloilo iuga, ina ia fa’afofoga toto’a lelei pea ao fa’agasolo taualumaga o lenei mataupu, ina ia mafai ai ona latou malamalama i le aamo moni o le tagi fa’asaga ia Letasi.