O le vaiaso nei na amata aloaia ai i luma o le Fa’amasinoga Maualuga le fa’amasinoga autu o se ali’i faiaoga o lo o tu’uaia i lona faia o ni uiga mataga i se tama’ita’i aoga e 15 tausaga le matua.

E tasi le moliaga o lo o tu’uaia ai e le malo le susuga Sione Onelei Setu, o le moliaga lea o le tagofia o itutinosa o se tama’ita’i talavou i le tulaga muamua, o le vaega D lea o solitulafono mamafa, lea e mafai ona fa’asala ai se tasi i le toese mo le umi e le silia i le 5 tausaga, pe fa’asala fo’i i le salatupe e le silia i le $5,000, poo le fa’asala fo’i i fa’asalaga uma ia e lua.

O sui e to’a 6 o le vaega iloilo iuga, e aofia ai se ali’i se to’atasi ma ni tama’ita’i se to’a 5 o lo o latou iloiloina mau fa’amaonia o lenei mataupu.

O le tama’it’ai loia sili lagolago ia Christy Dunn, faatasi ai ma le ali’i loia sili lagolago ia Jason Mitchell mai le Ofisa o le loia sili, o lo o tula’i mo le itu a le malo. O le susuga i le ali’i loia tua ia Marcellus T. Uiagalelei o lo o tula’i mo Setu, lea o lo o tatala i tua i lalo o tuutuuga mai le fa’amasinoga.

O le mae’a ai o ulua’i folasaga a loia, na valaau ai loa e le malo la latou ulua’i molimau, o le tama’ita’i lea e 15 tausaga le matua o lo o tu’uaia na a’afia i lenei mataupu.

Na taua e Dunn i lana ulua’i folasaga e fa’apea, o le tagi a le malo o loo autu i se ali’i faiaoga na fai si mamao o lana alu, ma i’u i lona faia ai o uiga mataga i le tama’ita’i na a’afia. O Setu e pei ona taua e le malo, o se ali’i faiaoga i le aoga maualuga a Tafuna mo le mataupu o le Numera poo le Matematika.

I le aso 26 Aperila 2017, o le aso Lulu lea, sa faia ai le vaega o le Geometry a le ali’i o Setu, lea fo’i sa i ai le tama’ita’i na a’afia i totonu o lea vasega. O le mae’a ai o le vasega, na manatu ai loa le tama’ita’i na a’afia e fa’amuli se’i fesili i le faiaoga i ni isi o mataupu e fia malamalama atili ai.

Sa na o le ua molia ma le tama’ita’i na a’afia i totonu o le potu i le taimi na tula’i mai ai le fa’alavelave e pei ona tu’uaia ai e le malo le ua molia.

A o taumafai le tama’ita’i na a’afia e talanoa atu i le ua molia i mataupu o loo fia malamalama ai, sa ese gaioiga sa faia e le ua molia e pei ona taua e le malo. E le gata sa alu atu ma nofo i luga o le nofoa e pipii lona tino i le tino o le tama’ita’i na a’afia, ae sa amata fo’i ona tago ma milimili le vae o le tama’ita’i, ma fa’asolo atu ai i lona fatafata.

Na taofi fa’afuase’i e le ua molia ana gaioiga sa faia, ae tu i luga ma savali atu ua loka le faitoto’a pito i tua. Sa ia tago fo’i i le laupapa e tusitusi ai mataupu ua sii atu ma pupuni ai le fa’amalama o le potu ina ia faigata ai ona iloa mai e nisi totonu o le potu.

Sa toe aga’i atu loa le ua molia ma toe nofo i luga o le nofoa, e latalata i le ua molia, ma amata ona ia fesili i ai poo a mataupu e fia malamalama atili ai. A o la talanoa, na taua e le malo le tago atu o lima o le ua molia i le ogavae o le tama’ita’i na a’afia, ma toe sosolo atu ai fo’i lona lima i luga o lona fatafata.

Ina ua sauni le tama’ita’i na a’afia o le a alu ese, sa punou i lalo e piki mai i luga lana api aoga, ae te’i ina ua ia faalogo ua tago atu le ua molia i lona nofoaga.

Na fa’amatala e le tama’ita’i na a’afia gaioiga a le faiaoga i ana uo, o le sui pule aoga ma lona Tina, ma la aga’i atu ai loa ma lona Tina i le ofisa o leoleo ma faila ai le tagi faasaga ia Setu.

Ae na taua e le loia a Setu ia Uiagalelei e fa’apea, o le autu atoa lava o le tagi a le malo, e le fa’atatau i se faiaoga ua mamao lana alu, ae fa’atatau i se faiaoga ua faia i ai ni tu’uaiga sese ma le le sa’o.

Na fa’ailoa e Uiagalelei i le vaega iloilo iuga e fa’apea, soo se tala lava e 2 ona itu. A mae’a ona fa’ailoa atu e le malo mau fa’amaonia e lagolago ai le latou tala, ona maua fo’i lea o le avanoa e valaau ai e le itu tete’e a latou molimau e lagolago ai le latou tala.

Na taua e Uiagalelei e fa’apea, atonu o le a manatu le vaega iloilo iuga, o uiga sa faia e le ua molia e le talafeagai lea ma totonu o potu aoga.

“E faapena fo’i le talitonuga a le itu tete’e, o amioga e pei ona tu’uaia ai e le malo ia Setu, e le tatau ona tupu i totonu o se potu aoga. O le mea moni lava, e leai ni gaioiga faapenei na tutupu i totonu o le potu aoga,” o le fa’afinauga lea a Uiagalelei.

“A o le i faia la outou faaiuga, ia fa’amatala pea o outou finagalo ma fa’afofoga ma le toto’a i mau uma lava o lenei mataupu, ina ia mafai ai ona outou tuuina mai le fa’aiuga, e le nofosala Setu i lenei mataupu.”

O le itula e 9:00 i le taeao nei lea ua fa’amoemoe e toe fa’aauau ai lenei mataupu.

O le afioga i le ali’i fa’amasino sili ia Michael Kruse o lo o fa’afofogaina lenei mataupu, lagolagosua i ai afioga i ali’i Fa’amasino Lagolago ia Fa’amausili Pomele ma Muasau T. Tofili.