Ads by Google Ads by Google

Amata aloaia le fa’amasinoga autu o Joseph Yandall


[ata: SN]
ausage@samoanews.com

O le vaiaso nei lea na amata aloaia ai le fa’amasinoga autu o se Tama e 87 tausaga le matua, lea o lo o tu’uaia i lona faia o uiga mataga i ni tama’ita’i se to’alua i se taimi o le masina o Novema 2016.

 

O lo o tu’uaia e le malo ia Joseph Yandall i moliaga mamafa e 3 e aofia ai lona faia o uiga mataga i fanau e laiti i lalo o le tulafono, o se solitulafono e mafai ona fa’asala ai se tasi i le falepuipui pe a faamaonia mo le umi e oo atu i le 30 tausaga, o le moliaga o le taumafai e tagofia ituatinosa o se tama’ita’i i le tulaga muamua, atoa ai ma le taumafai e taofia faasolitulafono se tasi.

 

O le tama’ita’i loia sili lagolago ia Christy Dunn o loo tula’i mo le malo, ae lagolagosua i ai le tama’ita’i sui loia sili ia Lornalei Meredith. O lo o tula’i mo Yandall ia le tama’ita’i loia ia Gwen Tauiliili-Langkilde, ae lagolagosua i ai le ali’i loia ia Marcellus T. Uiagalelei.

 

E to’a ono sui o le vaega iloilo iuga o loo iloiloina se fa’aiuga o lenei mataupu, lea e aofia ai se tama’ita’i se to’atasi ma ni ali’i se to’a 5.

 

O ulua’i molimau e to’alua na valaau e le malo, o tama’ita’i ia e to’alua o lo o tu’uaia na a’afia i gaioiga a Yandall.

 

Na taua e le ulua’i  molimau e fa’apea, sa i ai taimi na tuu atu ai e Yandall ia te ia tupe pe a mae’a ona ia faia uiga mataupu ia te ia. Sa ia taua atili fo’i e fa’apea, o lana fa’amatalaga sa tuuina atu i Leoleo e uiga i lenei mataupu ina ua fesiligia o ia i le tausaga e 2016, e le o ni fa’amatalaga pepelo poo ni tala fatu, ae o tala na faavae mai i mea moni lava sa tutupu.

 

O le mae’a ai o le molimau a le tama’ita’i muamua, na valaau ai loa e le malo le tama’ita’i lona lua i luga o le nofoa molimau. O ia o se tama’ita’i e 17 tausaga le matua

 

Na taua e le tama’ita’i lea e fa’apea, o lana uo tama’ita’i lea sa avea ma ulua’i molimau a le malo, o ia lena na mafua ai ona la masani ma Yandall. Ma, na avea lea mafutaga ma itu sa masani ai ona alu atu le ta’avale a Yandall ma piki o ia ae momoli i le aoga.

 

Sa ia faailoa i le vaega iloilo iuga se tasi o aso sa alu atu ai Yandall ua piki mai o ia, o lana uo tama’ita’i lea sa molimau muamua, atoa ai ma lana uo tama, ma latou aga’i atu i se tafaoga sa faia i le Two-Dollar Beach. E leai se fa’alavelave na tula’i mai ai i lea tafaoga.

 

Sa ia taua fo’i se tasi o aso na tu atu ai le ta’avale a Yandall ao fa’atali sana pasi e alu ai i le aoga, ma ofo atu le auala e momoli ai o ia i le aoga. Ina ua oso atu i totonu o le ta’avale, o loo ti’eti’e to’alua mai ai Yandall ma lana uo tama’ita’i lea na avea ma molimau muamua. Na alu Yandall ma momoli i laua i le aoga.

 

Ae o le aso lea na tula’i mai ai le fa’alavelave e pei ona ia fa’amatala i Leoleo, na alu atu ai le ta’avale a Yandall ma piki mai o ia ao fa’atali pasi i luga o le auala i le latou nu’u i Iliili. Na taua e le tama’ita’i lona ioe ina ua ofo atu e Yandall le avanoa na te momoliina ai o ia i le aoga, ma la ti’eti’e loa i le ta’avale.

 

A o alu le ta’avale, sa fa’afuase’i ona tago atu Yandall i lona vae, ma taumafai e tago atu i lona itutinosa. Sa ia taumafai fo’i e fa’akisi o ia, atoa ai ma lona fai atu ia te ia pe mafai ona la feusua’i.

 

Sa ia fai ia Yandall e le mafai ona ia faia ia tulaga. Sa ia fai fo’i i ai e taofi le ta’avale ae se’i alu i fafo. Ina ua tu le ta’avale, na taua e le molimau lona tatalaina o le faitoto’a ma alu loa i fafo ma le ta’avale.

 

O lo o fa’aauau pea lenei iloiloga i luma o le fa’amasinoga.

 

O le afioga i le ali’i Fa’amasino Sili lagolago ia Elvis P. Patea o lo o fa’afofogaina le mataupu a Yandall, lagolagosua i ai le afioga i le ali’i Fa’amasino Lagolago ia Satele Lili’o Satele ma Tunupopo Alalafaga.