Ads by Google Ads by Google

Aloaia le soifua o le teineititi aoga na maliu i le tula’i fa’aaloalo


Le taimi na tutu ai e le faiaoga le moli ga’o o loo i luma o le ata o le teineititi aoga o le Vasega 8 mai le aoga Tulaga Muamua a Pava’ia’i, i le taimi o le sauniga o le fa’auuga i le aso Faraile o le vaiaso na te’a nei. Na maliu le teineititi ina ua malemo i le taimi o le tafaoga a le aoga sa faia i le Pala Lagoon Swimming Pool i le aso Lulu o le vaiaso na te’a nei, a o lumana’i ai le fa’auuga i le aso Faraile na te’a nei. [ata AF]
ausage@samoanews.com

Na aloaia le soifua o le teineititi aoga o le Vasega 8 mai le Aoga Tulaga Muamua a Pava’ia’i lea na maliu ina ua malemo i le taimi o le tafaoga a le aoga i le vaiaso na te’a nei, i se tula’i fa’aaloalo sa fa’atinoina i le taimi o le faauuga a le Aoga i le aso Faraile na te’a nei, i le nofoaga autu a le aoga i Pava’ia’i lava.

 

Na molimauina le laulau tutu uma o le aofia e aofia ai matua, uo ma aiga, aemaise ai fanau aoga, o matua o le tama’ita’i ua maliu, faapea ai faiaoga ma malo valaaulia sa auai atu i le molimauina o le aso faapitoa a le fanau.

 

E ui o se aso pito sili lea ona fiafia mo fanau o le vasega faai’uaso o le Vasega 8 atoa ai ma o latou matua, ona o le aso lea ua taualuga ai le ola aoaoina mai le aoga tulaga muamua, peita’i o se aso pito sili lea ona fa’anoanoa i matua o le teneititi aoga ua maliu, ina ua le mafai ona la molimauina le sauniga e taualuga aloaia ai le ola aoaoina o si o laua alo.

 

Sa faatumulia le sauniga o le faauuga i matua, uo ma aiga, aemaise ai le mamalu lautele o le atunu’u na fa’amalo’ulo’u atu e fia molimauina lea aso fiafia. Sa i ai fo’i ma matua o le teineititi aoga ua maliu.

 

O le tama’ita’i faiaoga o le vasega sa i ai le teineititi ua maliu na ia tula’i ma fa’alauiloa aloaia lona suafa. O ia o Tinian Tuileto’a Toese. Na taua e le tama’ita’i faiaoga e fa’apea, o Tinian, o se teineititi aoga e loto fesoasoani, alofa ma tausa’afia. E laufofoga fiafia lava o ia i taimi uma. O le a misia ona uiga tausa’afia.

 

O ni isi o vaega o le sauniga e manatua ai le soifua aoaoina o lenei teineititi aoga, e aofia ai le tutuina lea e lana faiaoga o le moli ga’o sa i luma tonu lava o lona ata, lea sa ogatotonu i ai le vasega fa’auu, atoa ai ma le fa’aleleina lea o paluni papa’e i luga o le ea, fa’atasi ai ma le tula’i fa’aaloalo e fa’ailoa ai le amanaia o lona olaga talavou ma aso sa avea ai o se totino o le aoga tulaga muamua a Pava’ia’i.

 

Na fa’amatalaina e ni isi o le vasega le tama’ita’i o Tinian o se tagata e fiafia e fa’auo ma lau fofoga fiafia i soo se taimi. Na taua e se tasi o ali’i o le vasega e fa’apea, na te taua Titian o se tuafafine ia te ia, o se tasi fo’i e vaai maualuga i ai i fa’agaioiga a le vasega.

 

Na taua e ni isi o matua o latou lagona fa’avauvau ona o le misia ma le misi alofa i matua o lenei teineititi, ona o le faigata o le tulaga ua fetaia’i ma le laua aiga, ona o le motusia fa’afuase’i o le mafutaga ma si a laua tama, o le ulumatua o le fanau.

 

Na taua e se tasi o Tama e aoga lona alo i Pava’ia’i lona tu’uaia o faiaoga i le fa’atamala i le fa’atinoina lea o latou tiute, o le vaaia lea o le saogalemu o fanau aoga sa auai i le tafaoga i le aso.

 

O le aso lava na tula’i mai ai lenei fa’alavelave, na tapunia ai loa ma le nofoaga o lo o i ai le vai taele mo se taimi le tumau, a o fa’agasolo ai su’esu’ega a Leoleo e fa’atatau i lenei mataupu.