Ads by Google Ads by Google

Aloaia pea e le Fa’amasinoga le auaunaga a le Ofisa Nofovaavaaia


[ata: foa'i]
ausage@samoanews.com

O le fa’aiuga tusitusia a le Fa’amasinoga Maualuga lea na tu’uina mai i le vaiaso na te’a nei fa’asaga i le mataupu a le ali’i o Iosefo N. Sagote, ua atagia mai ai le matua aloaia e le Fa’amasinoga o le auaunaga o lo o tuu’uina atu e le Ofisa Faanofovaavaaia, i soo se taimi e galulue ai e mata’itu tagata uma o loo nofovaavaaia poo latou usitaia poloaiga a le fa’amasinoga.

 

O le masina o Ianuari o le tausaga nei na faia ai le iloiloga faapitoa a Iosefo N. Sagota i luma o le afioga i le ali’i fa’amasino sili ia Michael Kruse ma ana fa’amasino lagolago, ona o tu’uaiga i lona le usitaia lea o tuutuuga o lana nofovaavaaia.

 

O le mae’a ai o lea iloiloga, na tuuina ai ai loa e le afioga a Kruse lana faaiuga, e ta’usala ai Sagote i lona le usitaia lea o tuutuuga o lana nofovaavaaia, faatasi ai ma le saunoaga a le Fa’amasinoga, o se taimi o i luma e tuuina mai ai lana faaiuga tusitusia e tusa ai o lenei mataupu.

 

O le vaiaso la na te’a nei na fa’atoa tuuina aloaia mai ai loa e le Fa’amasinoga lana faaiuga tusitusia.

 

O le taeao ananafi na tula’i ai Sagote i luma o le Fa’amasinoga Maualuga mo le tuuina atu o le faaiuga a le fa’amasinoga, e tusa ai o lona le tausisi i tuutuuga o lana nofovaavaaia.

 

I le faaiuga tusitusia a le fa’amasinoga o loo taua ai e fa’apea, o le tausaga na te’a nei na ta’usala ai e le fa’amasinoga Sagote i le moliaga o le umia fa’asolitulafono o vaega o le laau fa’asaina o le mariuana, ma faasala ai loa o ia e le fa’amasinoga e taofia i le toese i Tafuna mo le umi e tasi le tausaga i le aso 26 o Oketopa, 2018.

 

O nisi o tuutuuga o le nofovaavaaia a Sagote, o le aua lea ne’i ona toe tagofia le ava malosi poo fualaau fa’asaina, e mafai fo’i ona faia se suega i lona tino ina ia faamaonia ai na te le o toe tagofia ia tulaga. I se suega sa faia e se sui o le Ofisa Faanofovaavaaia ia Sagote i le masina o Novema o le tausaga na te’a nei, na fa’amaonia ai lona tagofia o fualaau fa’asaina o le aisa ma le mariuana.

 

I le iloiloga faapitoa a Sagote sa faia i le aso 24 o Ianuari o le tausaga nei, sa ia fa’aalia ai i le fa’amasinoga e fa’apea, ina ua mae’a le suega sa faia e le Ofisa Faanofovaavaaia, lea na tu’uaia ai lona fa’aaogaina o fualaau fa’asaina, sa alu ai loa i le Falema’i o le LBJ ma faia ai le isi ana suega i le aso lava lea, pe moni o lo o i ai vaega o fualaau fa’asaina i lona tino.

 

I lana suega sa faia i le Falesu’e Toto a le LBJ, na aumai ai le faaiuga, e le o i ai ni vaega o fualaau fa’asaina o le aisa ma le mariuana o i ai i lona tino.

 

Na maua le avanoa o le fa’amasinoga e iloilo ai le eseesega o suega e lua sa faia ia Sagote.

 

Saunoa Kruse i le faaiuga a le fa’amasinoga e fa’apea, tusa lava pe na faia se suega a le ua molia i le LBJ, o le itu e sili ona taua e pei ona mata’itu e le fa’amasinoga i le taimi o le nofovaavaaia a Sagote, o le faia lea e le ofisa faanofovaavaaia o se suega i lona tino.

 

“I le talitonuga o le fa’amasinoga, e le o se isi tagata e faia le suega fa’asaga ia Sagote, ae o le ofisa faanofovaavaaia e pei ona poloaina e le fa’amasinoga. E le mafai fo’i e le seuga sa faia i le LBJ ona aveesea mai ai le talitonuga atoatoa o le fa’amasinoga i suega o loo tauaveina e le Ofisa Faanofovaavaaia,” o se vaega lea o le faaiuga a le fa’amasinoga.

 

Saunoa Kruse e fa’apea, e i ai eseesega o suega e lua sa faia ia Sagote. I le suega sa faia e le Ofisa Faanofovaavaaia, e le gata sa molimauina e le sui o le Ofisa Faanofovaavaaia le taimi atoa sa fa’atino ai le suega, e aofia ai le taimi na aumai ai le feau vai (tulou) mai ia Sagote ina ia fa’atino ai le suega, ae to’atasi lava fo’i le tagata sa faia le suega.

 

I le suega sa faia ia Sagote i le LBJ, e eseese mamao ma le suega sa faia e le Ofisa Faanofovaavaaia, e le gata e leai se isi na molimauina le taimi na ao mai ai le feau vai mai ia Sagote, ae eseese fo’i tagata sa latou molimauina le fa’atinoina o le suega.

 

“O le suega sa faia e le Ofisa Faanofovaavaaia, e le gata sa molimauina e le sui e to’atasi o le ofisa, ae o mau faamaonia fo’i sa mafai ona ao mai ai, na matua malu puipuia uma i le taimi a o fa’agasolo le suega, ae o le suega sa faia i le LBJ, e le gata e eseese tagata sa mata’ituina le suega, ae le o mautinoa fo’i le malu puipuia o mau fa’amaonia na ao mai e fa’atino ai le sueg.”

 

O se tasi o itu na faamanino e le fa’amasinoga i lana faaiuga, o le molimau sa tuuina mai e Sagote i le aso na iloilo ai mau fa’amaonia o lana mataupu. O molimau na valaau e le ua molia e aofia ai se foma’i ma ni tagata faigaluega se to’alua mai le Falesu’e Toto a le LBJ.

 

“O le itu na faateia ai le fa’amasinoga, o le foma’i sa valaau e Sagote e molimau mo ia, e lei i ai o ia i le falema’i i le aso na faia ai le suega a Sagote. Ae mo tagata faigaluega e to’alua mai le Falesu’e Toto a le LBJ na molimau, e le o i latou sa fa’atinoina le suega.”

 

“O le itu pito sili ona mamafa i ai le vaai a le fa’amasinoga, o le auala sa puipuia ai mau faamaonia i le taimi na faagasolo ai le suega sa faia i le falemai. E foliga mai i molimau sa tuuina mai i le fa’amasinoga, e leai se tagata na molimauina le taimi na ao mai ai le feau vai mai ia Sagote. E le gata i lea, e ese le tagata sa tuuina atu i ai le feau vai e fai i ai le suega, ese fo’i le isi tagata na tapenaina le faaiuga o le suega, ma ua atagia mai ai le le faatuatuaina o le faaiuga o le suega sa tuuina mai.”

 

“I le mae’a ai ona fa’afofoga o le fa’amasinoga i mau uma o lenei mataupu, ua faaiuina ai le lagolagoina malosi e le fa’amasinoga o le suega sa faia e le Ofisa Faanofovaavaaia, nai lo le suega sa faia e le Falesu’e Toto o le LBJ, ma ua faamaonia ai le soli e Sagote o tuutuuga o lana nofovaavaaia, e ala i lona tagofia o fualaau fa’asaina o le aisa ma le mariuana,” o le faaiuga lea a le fa’amasinoga.

 

O le ali’i loia ia Marcellus T. Uiagalelei sa tula’i mo Sagote, ae o le tama’ita’i loia sili lagolago ia Christy Dunn sa tula’i mo le malo.