Ads by Google Ads by Google

Aloaia e le Ofisa o Palota sui tauva mo le palota o lenei tausaga


[ata: foa'i]
ausage@samoanews.com

O le aso Faraile na te’a nei na tuuina mai ai e le Komesina o le Ofisa o Palota le lisi o sui tauva ua aloaia le agava’a e tausinio i le palota a le atunu’u mo le aso 6 Novema o le tausaga nei.

 

E le gata ua aloaia le lisi mo sui e tauva i le palota, ae ua fa’alauiloa aloaia mai ai fo’i ma le amata aloaia o le palota mo i latou e le auai i le atunu’u i le aso o le palota, lea na amata i le aso ananafi, Setema 10 ma le fa’amoemoe e mae’a i le 4:30p.m i le aso 5 Novema.

 

O le itula e 8:00 i le taeao e oo atu i le itula e 4:00 afiafi mai le aso Gafua e o’o atu i le Aso Faraile, e fa’ataunu’uina ai palota mo i latou e le i ai i le atunu’u i le aso o le palota ia Novema 6.  Ma o le a tatalaina foi le Ofisa o Palota i aso To’anai mai le 8a.m. i le itula e 12 i le aoauli, mo lenei fa’amoemoe seia ma’ea le palotaga.

 

E pei ona taua e le afioga ia Dr. Lealofi Uiagalelei i sana tusi e fa’apea, o i latou uma e agava’a ona palota mo palota faapitoa e pei ona taua, e tatau ona faia a latou palota i le Ofisa o Palota i Tafuna, a o le i malaga atu i latou i fafo mo mafua’aga eseese e aofia ai le malaga o Talavai; malaga ona o mataupu tau i le Militeli; malaga ona o aoaoga ma fonotaga tau i le galuega; faapea ai ma le malaga ona o malologa.

 

Ina ia tusa ai ma le tulafono, e tatau ona tuuina atu e i latou nei pepa aloaia e fa’amaonia ai lo latou malaga ese atu ma le atunu’u i le aso tonu e faia ai le palota.

 

O ni isi o ia pepa e aofia ai pepa faamaonia o le pasese ua totogi, pepa faamaonia mai le Militeli e fa’amaonia ai aoaoga e auai atu i ai, pepa faamaonia o Talavai mai falema’i i fafo, ma isi lava pepa faamaonia e mafai ona lagolago atili ai i le talosaga.

 

Mo i latou uma e malaga i fafo ae toe fo’i mai i le atunu’u, a o le i oo i le aso o le palota ia Novema 6, e le agava’a ona palota i latou i lenei palota fa’apitoa.

 

SUI TAUVA

 

Mo sui tauva mo le palota, ua aloaia lava le to’a 55 o sui ua aloaia le tauva mo nofoa o itumalo ta’itasi i le maota o sui mo le Fono Faitulafono, ma le toa 3 ua fa’amaonia le tausinio mo le nofoa a le atunu’u i le Konekeresi a le malo tele.

 

Na taua e Uiagalelei i lana tusi sa tuuina mai e aloaia ai suafa o i latou nei e fa’apea, ua mae’a ona iloilo e le Ofisa o Palota suafa o sui tauva uma nei, ma ua aloaia loa lo latou agava’a mo le palota a le atunu’u.

 

O le lisi o suafa uma o i latou ua aloaia mo le palota i lenei tausaga, o le lisi lava fo’i lea e tasi na tuuina mai e le Ofisa o Palota i le vaiaso na te’a nei, mo sui ua mae’a ona lesitalaina mo fa’amaonia mo le palota.