Ads by Google Ads by Google

Alo atu Amerika Samoa fa’amanatuina Kerisimasi 2018

“O le taua o le Kerisimasi o le fa’amanatuina o le aso soifua o lo tatou Ali’i o Iesu Keriso. O le meaalofa sili mai le Atua mo lo tatou fa’aolataga,” o se vaega lea o le saunoaga fa’apitoa a le afioga a le Kovana Sili, Lolo Matalasi Moliga mo Amerika Samoa, a’o alo atu le atunu’u e fa’amanatuina i le aso a taeao, Tesema 25, le Kerisimasi 2018.

 

Ua le gata i Amerika Samoa, ae fa’apea foi atunu’u eseese o le lalolagi, ae maise lava malo Kerisiano, e fa’amanatuina e o latou tagata le aso soifua o le Mesia.

 

“E le galo lava le auaunaga ma le tautua faifai pea a Toa o Samoa ma fiafita uma o lo’o fa’atagataesea i nu’u ese ona o le puipuiga o le saogalemu ma le atina’eina o le filemu o le lalolagi,” o se vaega lea o le saunoaga a le kovana i lana feau fa’amanuia o le Kerisimasi.

 

“Matou te tatalo pea mo lo outou saogalemu, ma ia outou lagonaina le mafanafana o a’ao o Iesu le Tama Meamea. Ia manuia le kerisimasi ia te outou ma nai outou aiga,” o se upu lea a le kovana mo Toa o Samoa.

 

I lenei vaitau o le tausaga, o le to’atele o le mamalu o le atunu’u e auai fa’atasi ma o latou aiga ae maise uo mamae i le fa’amanatuina o le Kerisimasi e ala i sauniga lotu i le afiafi nei, ae maise le aso taeao.

 

Ua le gata i lea, o tulaga foi o pati ma fiafia i soo se tulimanu o le atunu’u.

 

O lenei aso, aso Gafua, o se tasi o aso e vaai ai le pisi i luga o le alataele i fao’aiga a le atunu’u aua fa’atauga mo le Kerisimasi. O nisi o latou sa pisi i le fa’aiuga o le vaiaso ua te’a, ae maise le aso Faraile ua te’a, ina ia vave maua oloa matagofie mo mea alofa o le Kerisimasi.

 

O nofoaga pito sili atu ona pisi ai le auala i luma o le Laufou Shopping Center, ae maise i Fagatogo i vaega o le taulaga o lo’o i ai faletupe. O le aso foi lenei o le a tele ai nisi o pati a nisi o le atunu’u.

 

Ina ia mafai ona tali atu i le mamalu o le atunu’u i fa’atauga o le Kerisimasi, o le tele o fale oloa sa vave ona tatalaina i le aso Faraile ua te’a, ae fa’apea foi mo lenei aso. Ma o le tele foi o nei fale oloa sa tuai foi ona tapunia. O nisi o fale oloa ma pisinisi o lo’o fa’amoemoe e tuai ona tapunia i le afiafi nei.

 

Mo faleoloa o lo’ fa’atauina oloa mo le saunia o taumafa, ua sauni foi i latou e tali atu i manoga o le au faatau ma ua leva ona taunu’u oloa aua lava le fofoga taumafa o le atunu’u.

 

Ua ma’ea ona fa’alauiloa e le afioga i le kovana sili, e fa’apea o Tesema 25, 2018 o le aso malolo lea o le malo, e aloaia ai le Aso Kerisimasi ma e tapunia uma ofisa o le malo. E fa’apea foi ofisa fetarale i Amerika Samoa ma le Iunaite Setete e tapunia foi ofisa.

 

I kamupani tua i le teritori e tapunia uma fa’atoa toe tatalaina i le aso Lulu, Tesema 26 - fa’apea ofisa o le malo.

 

O le kamupani a le StarKist Samoa, e lua vaiaso o lo’o tapunia ai talu mai le aso Faraile ua te’a, e pei ona masani ai i le fa’a’iuga o tausaga taitasi mo le malologa. I lea taimi e i ai galuega toe fa’aleleia e faia i le kamupani ‘ia i le taimi o lea malologa.

 

Ona o lenei vaitau o aso fiafia, e fa’amanatu atu ai e le Matagaluega o Puipuiga Lautele, le amatalia i le vaiaso ua te’a o a latou polokama ma fa’amolisia tulafono i luga o ala tele, ina ia saogalemu Amerika Samoa. O le a vaaia leoleo i nisi o vaega o le atunu’u, e o’o fo’i i le po aua lava le saogalemu o tagata lautele.

 

Ua le gata i lea e fa’amanatu au e le komiti fa’afoe a le malo o lo’o gafa i mea iu malolosi ma le pia, mo fale kalapu ina ia manatua tulafono tamau e tatau ona aloia i le taimi e fa’asa ai ona fa’atau le ava malosi. E fa’apea foi fale oloa o lo’o faatauina ai ava malosi ma le pia, e le mafai ona fa’atauina pe a te’a le itula e 10 i le po.

 

Talu ai ona o aso fiafia ua lipotia mai i le Malae Va’alele Faavaomalo i Tafuna le tele o malaga a va’alele i le va o Tutuila ma Samoa tutoatasi, talu mai lava le vaiaso ua te’a. Ua lipotia mai le fa’aopoopoina o malaga a kamupani va’alele o le Samoa Airways ma le Talofa Airways.

 

Ona o le fa’amanatuina o le Kerisimasi 2018 o le a leai se lomiga a le Samoa News i le aso Lua. Ua le gata i lea, o le a leai se lomiga i le aso Lulu, ona o fuafua i le fa’aleleia o nisi o masini e lomia ai le nusipepa, ae tatalaina pea le ofisa i le taimi masani. Fa’atoa maua le Samoa News i le aso Tofia.

 

Mai le Pulega ma le aufaigaluega a le Samoa News, Manuia le Kerisimasi ia Amerika Samoa, ae maise Samoa i so’o se itu o le lalolagi.