Ads by Google Ads by Google

Alia’e tu’uaiga tagata faigaluega JDC o loo malaga ae maua lava totogi


[ata: foa'i]
ausage@samoanews.com

O le masina na te’a nei na alia’e mai ai ni tu’uaiga fa’asaga i se tagata faigaluega sinia a le Falepuipui o Tamaiti (JDC), o se lala lea o le Matagaluega o Leoleo, e fa’apea ripoti o loo malaga o ia i fafo mo talavai ae o loo fa’aauau pea ona maua lona totogi.

 

O le itu e sili ai ona maoa’e lenei mataupu, e le gata i le tagata faigaluega sinia lenei, ae e i ai fo’i isi tagata faigaluega a le JDC o loo taua le malaga i ni isi o taimi i fafo mo ni isi o mafua’aga eseese, ae fa’aauau pea ona maua a latou totogi.

 

O le auala na taua e le molimau o loo maua ai le totogi a le tagata faigaluega sinia e pei ona fesiligia, o le tuuina atu lea o lana pepa o loo i ai fa’amaumauga o taimi faigaluega i piriota totogi ta’itasi a le malo.

 

Na taua e ni isi o tagata faigaluega lagona le fiafia, ona o loo faamaoni e galulue ina ia maua o latou totogi, ae foliga mai o lo o i ai ni isi o gaioiga masalomia faasolitulafono o loo faia i pepa e pani ai taimi faigaluega a le tagata faigaluega sinia o loo malaga i fafo, e ala ai ona maua pea lava lona totogi.

 

Na taua atili e se molimau e fa’apea, o le tulaga e faigata ona ia taliaina, o le usu i taeao taitasi e faigaluega, poo po fo’i pe a fesuia’i sifi ina ia atoa le 80 itula faigaluega, ae o lea lava o loo masalomia le tuuina atu fa’asolitulafono o le pepa e faamaumau ai taimi a le tagata faigaluega sinia o loo malaga i fafo, ina ia maua ai lona totogi.

 

Na maua le avanoa e fesiligia ai e le Samoa News le ta’ita’i o le JDC o loo i ai i le taimi nei e uiga i lenei mataupu, le faletua ia Lomi Aumua. E le gata sa fesiligia o ia i luga o le telefoni, ae sa maua fo’i le avanoa mo se fa’atalatalanoaga i le ofisa autu a le JDC i Tafuna i le vaiaso na te’ a nei.

 

I ia talanoaga uma e lua sa faia ma Aumua, sa ia faamaonia mai ai le fa’aauau lea ona maua o le totogi o le tagata faigaluega sinia o loo malaga i fafo mo ana talavai, talu lava ona malaga ese atu o ia i le masina o Aperila o le tausaga nei seia oo mai i le vaiaso totogi na fa’atoa mae’a atu nei.

 

Sa ia taua fo’i i le Samoa News le leai o ni faiga fa’asolitulafono o loo faia i le ofisa a le JDC talu ona ia tula’i mai, o faiga fo’i e pei ona fesiligia, ua mae’a ona uia tulaga e tatau ona uia, e aofia ai le fa’amaonia mai lea e se tasi o a latou sui komesina.

 

I le talanoaga i luga o le telefoni, na taua ai e Aumua le tulaga pagatia o loo fetaia’i ma le JDC, o le le lava lea o tagata faigaluega e fa’atinoina le galuega. Ona o lea tulaga, ua mafua ai ona galulue ova taimi tagata faigaluega e aofia ai ma le tagata faigaluega sinia o loo malaga i fafo mo ana talavai.

 

Sa ia taua e fa’apea, tusa lava pe galulue ova taimi le aufaigaluega, e na o le 8 lava itula e mafai ona totogi e le ofisa o Leoleo. O itula ova taimi e totoe ai, e fa’amaumau uma i lalo ma le fa’amoemoe e totogi mulimuli mai e le matagaluega.

 

Na taua e Aumua i le talanoaga i luga o le telefoni ma le Samoa News, o le siaki a le tagata faigaluega sinia o loo maua, o ona itula faigaluega ova taimi ia e lei mafai ona totogi i le taimi na maua ai, a o lea fa’atoa mafai ona totogi ina ua malaga o ia i fafo mo ana talavai.

 

Sa ia taua atili e fa’apea, o le siaki la a le tagata faigaluega sinia sa maua, o ana lava tupe sa afu ma pologa ai.

 

Ae i le fa’atalatalanoaga lona lua ma Aumua i le ofisa autu a le JDC, na suia ai lana tali. Sa ia taua i le Samoa News e fa’apea, o le siaki a le tagata faigaluega sinia lea e maua i aso totogi a le malo talu mai lava le masina o Aperila na malaga ai i ana talavai, o loo maua mai i ona itula livi ma’i.

 

Na fesiligia e le Samoa News ia Aumua pe faamaonia o loo tuuina atu e le ofisa a le JDC le pepa e faamaonia ai taimi faigaluega a le tagata faigaluega sinia lenei i vaiaso totogi uma lava a le malo, ina ia mafai ai ona maua lona totogi. Na tali Aumua, o lea lava.

 

Pau le eseese, o lo o fa’apipi’i fa’atasi atu i le pepa e faamoania ai taimi faigaluega a le tagata faigaluega sinia o loo malaga, ma le pepa mai le foma’i e fa’amaonia ai o ia o loo malaga i fafo mo ana talavai.

 

Na fesili le Samoa News ia Aumua poo ai e sainia taimi faigaluega a le JDC ao lei tuuina atu i le ofisa autu a Leoleo i Fagatogo, na tali le molimau, na te le sainia ni taimi faigaluega. O le faiga lava ua masani ai, e alu atu le sui o le Ofisa autu i Fagatogo e piki mai taimi faigaluega a le JDC, ona tuuina atu loa lea i le ofisa autu a Leoleo mo le fa’agasoloina o tulaga uma e moomia ina ia maua ai le totogi o le tagata faigaluega sinia.

 

O se tasi o itu na taua e se molimau i le Samoa News, o le tulaga lea i le tagata na te pikiina le siaki a le tagata faigaluega sinia o loo i fafo. Ae na taua e Aumua, e alu sa’o lava i le faletupe le totogi a le tagata faigaluega sinia o loo fesiligia.

 

E le i manuia taumafaiga a le Samoa News i le tau sailiina lea o se avanoa e fesiligia ai le sui o le ofisa autu o Leoleo o loo gafa ma le fa’amaumauina o taimi faigaluega a tagata faigaluega.