Ads by Google Ads by Google

Le A'afia Polokalama Food Stamp & WIC i le Tapunia o le Feterale


[ata: foa'i]

O le tatou matagaluega o Alagamanuia mo Tagata Lautele po'o le DHSS, o se tasi o matagaluega o le tatou malo e fa'atupea atoa e polokalama foa'i fuaina mai e le Feterale, peita'i ua fa'ailoa mai e le susuga le Fa'atonu, Muavaefa'atasi John Suisala, "Ua le afaina ma se tasi o nei polokalama o lo'o va'aia ma fa'atautaia e lona matagaluega i le tapunia ai o matagaluega o le Feterale i lenei amataga o le tausaga 2019."

 

O le tele o nei polokalama ua fa'atautaia ma va'ai toto'a e le DHSS ua agava'a ai le to'atele o le atunu'u e utiuti le fa'asoa o le tamaoaiga tausi o latou aiga, ma ua taumafai lava le vasega o au fa'asalalau, ina ia tima'ia matagaluega o lo'o nafa ma le tele o polokalama fa'atupe e le Feterale ina ia fa'ailoa patino mai pe a'afia i latou i lea tapunia o galuega a le Feterale pe leai.

 

O se tali maoti la lea ua fa'ailoa mai e lea matagaluega, lea e aofia fa'atasi ai le Food Stamp, WIC ma le Child Services.

 

O nisi o nei tautua e fa'atutu aga'i i fanauiti, ua aofia ai le latou WIC e ta'i masina ma taua'aoina mai a latou pepa e talafua ai mea'ai e tausia lelei ai lo latou soifua maloloina e ala i mea'ai paleni, ae maise fo'i o totogi o le tausiga o i latou i Day Care a'o faigaluega o latou matua, e aofia ai fo'i ma le fa'atupega o le tausiga o tina ma fanauiti ua sauaina i o latou lotoifale.

 

I le fa'apupulaga atili o lea lava tulaga ua fa'asao mai ai lea matagaluega mai le taofiga o galuega lea e foufou e tupu i le amataga o lenei tausaga, na fa'ailoa ai e Muavaefa'atasi Suisala, "Na fa'ataga e le afioga le Kovana sili Lolo Moliga le tu'uesea o le Matagaluega lenei mai lana fa'alauiloga aloa'ia o le a tapunia nisi o tautua a le Malo i le amataga o le tausaga. Peita'i ua ia taliaina le tatala pea lava o le Matagaluega o Alagamanuia lautele ina ia mafai ona tautuaina le atunu'u lautele."

 

Ua ia fa'ailoa atili, "E ui lava ina o le matagaluega o Fa'ato'aga a le Malo tele e fa'atupea lea Polokalama o le Food Stamp ma le ASWIC, ma o lo'o aafia fo'i lea i le tapunia ai o lala o le Feterale i le 2019, ae ona o lea lava ua mae'a talia ma pasia le fa'atupega ua mae'a toina mai mo nei polokalama a'o le'i mae'a le 2018, o lea e le o afaina ai i le tautua lea i lenei taofiga o galuega. Afai lava o lo'o ua mae'a i ai pea le fa'atupega e fa'aauau lava galuega nei."

 

Ua fa'ailoa mai fo'i e aofia fo'i ma isi polokalama aoga tele i lea lava fa'aauau ona tautuaina i latou o e mana'omia, e pei o le Behavioral Health Services , Child Care Programs; Children and Family Services, Developmental Disabilities Planning Council ma le Community Assistance Division.

 

O le tele o nei polokalama ua fa'atupea mai lea e le US Dept Health & Human Services ma ua le a'afia fo'i lea matagaluega o le feterale i le taofiga o galuega ua i ai nei, aua ua mae'a pasia atoa ma taua'aoina le latou fa'atupega mo le tausaga fa'aletupe 2019.

 

Ua mae'a fo'i ona taua'aoina atu le alamanuia sa mafai ona toina mai mo i latou uma sa matauina e matua tele le afaina i vaitaimi o le afa o Gita, i latou e le'i maua ni alamanuia na talosagaina.