Ads by Google Ads by Google

75 ‘au fa’au’u Aoga Maualuga Matata Eseese Nuuuli (NVTHS) - 2019

Nuuuli Vocational Technical High School Class of 2019

Pago Pago, AMERICAN SAMOA — O le fa'amoemoe o le Malo o Amerika Samoa ina "Ia solo le Lavalima" na afua ai ona fa'atula'ia le A'oga Maualuga Matata Eseese i Nuuuli (NVTHS), lea ua latou soloa'i mai ai le to'a 75 sa fa’au’u i le aso ananafi o le 2019.

O tala o fa’auuga o lenei tausaga a le Samoa News o lo’o lagolagoina e le Paramount Builders Inc.

O le togisilia i lenei tausaga i le vasega fa'ai'uaso o le tama'ita'i o Ariolene Ashley Ta'atasi ae o le tulaga lua o le  tama'ita'i o Florine J. Roe.

Nisi fa’ailoga na fa’alauiloa, o Jonathan Levu mauaina le fa'ailoga o le SAT togi maualuga ma Ariolene Ashley Ta'atasi mo le fa'ailoga tulaga lua i togi o le SAT. Edward Atafua maua le fa'ailoga Ali'i Sili ona Agava'a i le Matata Eseese o le tausaga,  a'o Ariolene Ashley Ta'atasi na ia mauaina fo'i le fa'ailoga "Tama'ita'i Sili ona Agava'a i le Matata Eseese o le tausaga.

Valedictorian Aroilene Ashley Ta'atasi

Salutatorian Florine J. Roe

O le ali'i lelei tele i ta'aloga ua maua e Sene Isileli Jr, a'o le tama'ita'i lelei le ta'alo i ta'aloga o Iaeli Filifili. O le faailoga mo le Tama ta'alo lelei i le Teritori i Ta'aloga Tu'uga Tamo'e na maua e Iosefa Mauga. O le fa'ailoga a le Kalapu a le Rotary na maua e Lui Lui Filimaua ao le fa'ailoga o le Amio Lelei na maua e Ta'a Muliipu ma le fa'ailoga o le ta'ita'i lelei o le tausaga a'oga ua maua e Ariolene Ashley Ta'atasi.

O fa'ailoga sikolasipi a le malo na maua e Ariolene Ashley Ta'atasi e a'oga ai i Iunivesite i fafo, ma le fa'ailoga e a'oga ai i le ASCC na mauaina e Jonathan Levu.

O le fofoga fa’apitoa o le aso, o le afioga i le faipule mai le Tualauta, Larry Sanitoa ma sa ia fa’afetaia le pule aoga, ae maise lava le vasega o Faia'oga, aua ua ia fa'amaonia lelei, o i latou ia e faigaluega i aso e fitu o le vaiaso i le 24 itula o aso ta'itasi, “ina ia mautinoa ua mae'a a'oa'oina fanau ia popoto ma agava'a i matata e galulue ai.”

Na ia fa'afetaia fo'i Pisinisi sa latou va'ava'alua i le taumafaiga e foa'i ane mea e mafai ona fa'atino ai galuega ma a'oa'oga a le fanau lea.

I matua, aiga ma ekalesia, sa ia saunoa, "E ui lava ina ua mae'a lenei la'asaga o le sofia taumafai o le fanau i tomai ma a'oa'oga fa'apitoa, ae le muta ai le mana'omia pea o le tatou a'apa atu ma fa'asino, fa'atonu ma tima'i pea se'ia fua mai i galuega ma ua aoga fanau.”

"Ua atoa le 34 tausaga ‘O solo le lavalima’ i lenei laumua, ae le'i mae'a ai le tele o mea e mana'omia. Atonu o le a alofagia e lenei faigamalo ma le Sui i le Konekeresi se vaega tupe mo se faleta'alo o le A'oga Matata Eseese.”

Tolu mea na manatu e Sanitoa e fo'i ma le fanau i lenei aso, a'o amatalia le savaliga o soso'o mai o le soifua taumafai. "Ia iloa e le o se mea fou le fefe. E fefe lava tagata uma, ae e te le tu'u i lou fefe, oso i totonu e te gafatia ona fa'atautoto fa'aletonu fa'apena."

"Ia e mautinoa lelei e taua le tumau e filiga e sofa'i le fa'amoemoe na e manatu e fia maua. Ia e iloa lelei e umi ma gaoa le ala ua e savalia nei. E leai ma se faigofie o i ai, e le maua fo'i ni mea maua fua."

"Ia e fa'amasani ma mafuta ma i latou mautalitonuina lou agava'a ma lou malosi'aga e te mafaia mea ua e manatu e tausaili. O le tagata muamua lava e ao ina gaua'i muamua e iloa lou agavaa, o oe lava. Fai ia te oe, e te mafaia."

O le toe fofoga tima'i o le aso, le afioga le Lutena Kovana, Lemanu Peleti Mauga, o ia lea na ia toe fa'ailo le matata tau'ave fou mo le vasega fa'aiuaso, "Ia solo le Lavalima" ia le tu'ua lo tatou tofi, le gagana Samoa ia le mou malie atu. Taofi mai le I'umaea lea ia toe mautu, aua ua mae'a fa'ailoa mai i suesuega a i latou o polofesa o gagana a atunu'u uma o le lalolagi, e tusa ma le 60% o gagana eseese uma i le lalolagi e mou ese atu i le tausaga 2050."

"Afai e oo i ai le soifua lena vaitausaga, ua atoa le tou 49 tausaga o le soifua, o lona uiga o outou na e tatau ona outou tutu malosi e afua i le taimi nei, e fa'aaoga ma a'oa'o isi tupulaga faia'e o le atunu'u i le tatou gagana, le tatou tofi aua le olaga o tagata Samoa i le lumana'i.”

"Ia avea outou ma filiafa o le gagana Samoa ina ia fa'aauau pea ona ao Samoa, aua o lana gagana e fatufatu ai lagona, e fa'amatalaloto ai manatu, ma atina'e ai le lumana'i o se atunu'u mautu.”