Ads by Google Ads by Google

$70,000 foa'i AS Community Cancer Coalition i le Taua & Le Kanesa


[ata: foa'i]

Ua fa'aauau le galuega fesoasoani a le Sosaiete o le American Samoa Community Cancer Coalition (ASCCC) i le mamalu o le atunu'u o lo ua po'ia latou soifua i le ma'i faigata o le Kanesa.

 

Ona o foa'i na tu'ufa'atasia e le vasega o pisinisi, tagata ta'ito'atasi, ae maise o galuega tausaili a le ASCCC na fa'atino, ua aotelega ai le $70,000 le tupe ua mae'a taua'aoina atu i le mamalu o i latou na fa'aulu talosaga mo se fesosoani mo latou togaftiga.

 

O i latou na talosaga, o i latou ua po'ia i le ma'i faigata o le Kanesa ma ua fa'ailoa e le susuga Va'a Toleafoa o le ASCCC Coordinator Special Projects, "O lenei tausaga ua si'itia ai le aotelega o foa'i na to'ia ai le ASCCC, ina ia taua'aoina atu ia i latou ua i ai le mana'omia tau tupe aua togafitiga po'o se pasese fo'i e malaga atu ai i talavai fa'atulaga mo i latou i falema'i i fafo. Ua mafai ona tu'ufa'atasia le aotelega o foa'i na taua'aoina, fa'atasi ai ma sailiga tupe faia a le Asosi lava latou, ae maise o le foa'i mai pisinisi fa'apa'aga e aofia ai le Neil's Ace Home Center i Malaeimi, fa'alapotopotoga atoa ma nisi o sui ta'ito'aasi ua foa'i ma le loto i lea fa'amoemoe lelei."

 

"O le taumafaiga lava latou a le matou Sosaiete ina ia sailia mai ala o le foa'i lautele a tagata, ua iloga ai le naunau o le to'atele ina ia fesoasoani atu i e ua a'afia le soifua i lenei ma'i faigata. Peita'i ua foa'i i latou le mea ua mafai ona latou taua'aoina, ae a tu'ufaatasia mea uma, ua maofa ai i lona aotelega, ua silia i le $70,000,” se tala fa'aauau lea a Toleafoa.

 

"Ua pei lava ona faia mai i tausaga ua mavae e o'o mai i lenei tausaga, po'o le a lava le aotelega o foa'i na taua'aoina mai e tufatufa atu mo i latou na talosga, e le faaaogaina lava se vaega o lea tinoitupe i se totogia o ni tautua po'o nofoaga o lo'o fa'atautaia ai galuega a le Coalition, peita'i ua fa'aalu uma lava lea tinoitupe ua tu'ufa'atasia mo le mamalu o e na talosaga mai ia talia lo latou fanoga."

 

O lenei tausaga ua fa'aalia mai e le sui o le ASCCC, ua to'atele atu i latou ua mafai ona maua lenei fesoasoani nai lo le faitauga sa i ai i le tausaga 2017.

 

I le 2018 e tusa ma le to'a 71 i latou na talosaga ma ua mae'a tali atu fo'i e tusa o le fanoga. Mai lea aotelega o i latou e to'a 51 o sui fou fa'ato'a talosaga lava lea e 35 tamaitai ae na'o le 16 tane. O le to'a 29 o i latou nei ua maua i le Metastatic  Cancer, lea ua iloga mai ua sosolo le Kanesa i isi vaega o le tino. Ona o le to'atele o i latou ua fa'ailoa mai i talosaga nei, ua aafia i lea ma'i tiga, ua faia ai se faaiuga e si'itia le aofai o le tinoitupe e toina atu i le ta'i $750 mai le $500 sa i ai i le 2017. Peita'i o i latou ua talosaga fa'alua i le 2019, o le a tumau i le ta'i $500.

 

O le Komiti Fa'afoe o lo'o ua avea ai Taotasi Archie Soliai ma Taitaifono ua latou fa'afetaia tele le lima foa'i o le mamalu lautele, ae maise lava fo'i le Kamupani a le Niel's Ace Home Center, lea latou te fa'atalau'ula i a latou tagata fa'atau ina ia foa'i mo lea fa'amoemoe i le vaitau fiafia o tausaga ta'itasi. Ua loa o faia mai le latou lea foa'i, ma o se galuega alofa ua latou faia ma le loto fesoasoani i so'o se tasi ua a'afia i le Kanesa.

 

"O ituaiga galuega nei ma loto alofa nei e mafai ai ona tu'ufa'atasia fesoasoani sili ona aoga mo tagata lautele,” o se tala lea a Taotasi.

 

O talosaga uma e mafai ona faatumu lea i le Uepesite i Laina Feso'ota'i fa'ainiteneti -  https://asccancercoalition.org/tautai-laveai/ po'o le Ofisa autu o le ASCCC i Nuuuli, e fa'atumu ai lau talosaga. Numera telefoni 699-0110 mo nisi fa'amatalaga.