O le vasega amata i le a'oga tumaoti a le Ekalesia Fa'apotopotoga Kerisiano i Amerika Samoa i Kanana Fou ECE, ae ua toe fa'au'u mai lea fo'i vasega e aga'i atu ai i le A'oga Tulaga Muamua, ua mafai ai e le to'a 50 o i latou ona taua'aoina o latou ulua'i tusi pasi, e tamau ai latou taumafaiga tau le sailiga o le atamai lautele.

"Ia avea oe Ose Suiga ua e Momo'o e Ola ai i le Lalolagi” - O le Manulauti filifilia mo lenei faau'uga, ma ua sili ona taua lea mo matua, aiga ma vasega o faia'oga, ae o le tima'i e ao ina fa'amanatu pea lava i le vasega fa'au'u a'o fa'agasolo pea lo latou soifua taumafai i a'oa'oga i lenei soifuaga o tatou ola fa'atasi ai.

O le latou ulua'i aitema fo'i ina ua mae'a le tatalo amata a le faife'au, Rev. Tusi Seanoa mai Petesauta EFKAS, o le "SUIGA (CHANGE)” lea na tusia, fatu ma toe pese e le ali'i lauiloa o Michael Jackson...na maofa lava le vasega o matua, uo mamae ma aiga ae maise fo'i le Luamua, le Komiti Fa'afoe ma le Laulauatofi o le Pulega a Kanana Fou, i lea fa'atinoga na faia e le fanau a'oga sili ona laiti i fa'au'uga uma, ae tele se suiga o le olaga ua latou manana'o, e amatalia e i latou i lenei soifuaga.

Ua iloga fo'i le titi faitama o matua, e felanulanua'i tapenaga o le aso o le fanau uma lava sa pale i le tusi pasi fa'apitoa, ae maise fo'i o tifiga uma lava e fa'ailoa ai le naunau o matua ma aiga, ia sapaia pea taumafaiga a le fanau e amata mai lava i le fa'ato'a fotua'i mai o latou soifua a'oa'oina i a'oga ECE.

Na matua mafuli fo'i tama'ita'i faia'oga e sisiva ma pepese fa'atasi ma fanauiti i a latou aitema mo le fa'au'uga. Sa iloga ona matagofie lea aso, aua sa pulunaunau le fanau e fia fa'aalia uma mea ua mae'a a'oa'oina.

Peita'i, e o'o lava i togi ma tulaga o taumafaiga, sa tu'ufa'atasia uma lava e le vasega o faia'oga ma le pulega. E lua vasega maoti sa vaevaeina i ai le 50 lenei o i latou, Section 1 & 2. E i ai sui e to'alua sa avea togisilia mai vaega nei e lua e ta'i 4.0GPA na ausia, ae to'atele sui na ausia tulaga lua. E i ai fo'i sui e amio lelei, fa'atasi ai ma i la'ua e to'alua na ausia le togi fa'apitoa mo le sui sili ona matauina lona taumafai i lenei tausaga aoga.

"A'o Oe Timoteo, ia e manatua mea ua a'oa'oina ai oe..." O le mau lea o le upu apoapoa'i pu'upu'u lava a le Faife'au, ma sa iloga ona fetaui lelei ma le fa'amoemoe o le manulauti lea o le aso iloga o le fanau talavou. Ona ua agaga i latou i se suiga e faia i lenei lalolagi o lo'o tatou ola fa'atasi ai, "Ia avea i latou ma nisi e amatalia lea suiga lelei, amata mai lava ia te oe."

O i latou uma nei, ua fa'afetaia e le sui o le Komiti Fa'afoe o Tina o le Mafutaga EFKAS, Fuamoa Tagaloa, ona o le taumafai ma tutumau i mea ua a'oa'oina ai. "Ia fa'agasolo mai le soifuaga, ae ia outou manatua, o outou na mua'i manana'o i suiga lelei, ia outou taumafai fo'i i ai!"

O i latou i le section 1 ua aofia ai: Alofatunoa Va'a, Amia Momoe, Anderson Toilolo, Atlas Velghe, Aurora Toafa, Arvel Magalei, Chrisikana Lafoai, Deuteronomy Reopoamo, Daniel Mataituli, Evana Siofaga, Emmanuel Mata'utia, Ellienaia Iefata, Elise Momoe, Gavin Fiatoa, Grace Siaosi, Jeremiah Lauofo, Olita Stanley, Joshua Fa'afiti, Shalom Tuai, Elora Vala'au, Aurelia Lefiti, Jaazaniah Vaeao, Jaylynn Mamea, Maikee Leutele, Alofa Banse ma Siosiana Moli.

O le Vasega Section 2 e aofia ai: Jaedyn Tauiliili, Leemo Patea, Leiema Forsgren, Marianne Manuel, Mariette Falelua, Makayla Fa'asoa, Pene Jr. Vaisagote, Pouono Taotua, Romepati Fa'apouli, Semaia Amani, Suitupe Ta'ase, Taliau Tigilau, Temukisa Ponepi, TJ Momoe, Titimaea F.Manila, Va'aimamao Faiai, Christine Olo, Tuitaufa'asau Thompson, Doralse Aveina, Mercedes Malae, John Mamea, Merlina Tuimalatu, Anasetasia Leasiolagi ma Kara Pauga.