Ads by Google Ads by Google

4 ali’i ua filifilia fai ma sui AS ta’aloga o fusuaga Pacific Games


[ata: foa'i]
ausage@samoanews.com

E to’a fa ali’i ua filifilia nei e fai ma sui o Amerika Samoa i ta’aloga o fusuaga mo le ta’amilosaga o Taaloga a le Pasefika, lea e talimalo ai Samoa i le masina o lo o lumana’i nei.

 

O i latou e to’afa ua filifilia e aofia ai George Tanoa Jr, Yolando Taalo, Alofa Mata’afa ma Riley Tuala.

 

Na fa’amaonia mai e le Peresetene o le Asosi o Fusuaga a Amerika Samoa, afioga Paepaetele Mapu Jamias i le Samoa News i le vaiaso nei, le mae’a lea ona filifilia o i latou nei.

 

Saunoa Paepaetele e fa’apea, e i ai isi ali’i fusu ua leva ona koleni mo le fa’amoemoe, ae o le fa’afitauli ua le mafai ai ona filifilia i latou, ona o le tulafono lea e le mafai ai ona tauva se tagata taalo mo le atunu’u o loo nofo ma aumau ai, pe afai o lo o ia umia se tusi folau mai se isi atunu’u.

 

Mo se fa’ata’ita’iga o le susuga ia Kaisa Ioane lea ua tele tausaga o fusu mo Amerika Samoa, ua le mafai ona filifilia ona o ia o se tagatanu’u o Samoa.

 

Saunoa Paepaetele e fa’apea, o lenei tulafono ua leva ona i ai mo Taaloga a le Pasefika, ma e le mafai fo’i ona suia se’i vagana ua talosaga tu’u sa’o i le Komiti Fa’afoe o Ta’aloga a le Pasefika.

 

Ae mo le ‘au e to’afa ua mae’a ona filifilia, na faamaonia mai e Paepaetele le lava tapena o i latou mo le aga’i atu i le fa’amoemoe.

 

Na maua le avanoa o le Samoa News e fesiligia ai Faiaoga o lo o tapenaina le ‘au mo Samoa, i se tulaga ua i ai a latou tapenaga i le taimi nei.

 

Na taua e le ali’i Faiaoga o le ‘au ia Sala Sanele Etuale e fa’apea, ua tele le la’asaga ua ausia e le au fusu a le atunu’u talu mai ona tu’u fa’atasia a latou koleniga i ni nai masina e le i mamao atu ma ua molimauina fo’i le lava tapena o i latou mo le fa’atinoina o le ta’aloga.

 

“O se tulaga maualuga ua o o i ai tapenaga a le ‘au, ma ua faagaeetia lava a’u i le tulaga ua i ai le malosi ma le vave o le fa’atinoina o le ta’aloga. O se galuega lelei fo’i sa fa’atinoina e le Taupulega, pau le tulaga lea ua totoe nei, o le tu’uina atu loa o le galuega e fa’atino e le tama taalo i totonu o le maea.”

 

Na maua le avanoa e fesiligia ai e le Samoa News ni isi o le au fusu.

 

Na taua e le susuga a Taalo lona sauni e tausinio i Samoa, ma le mea sili na te mafaia aua se pine mo Amerika Samoa.

 

“Ua leva ona ou tapena ma ua ou lagona fo’i ua ou sauni mo le fa’amoemoe. E le o se fa’amoemoe e faigofie ae faalagolago mea uma i le faatasi mai o le Atua, e ala i le malosi ma le poto e fa’atino ai le ta’aloga. E le o se ta’aloga e faigofie lona fa’atinoina, peitai o le poto ma le malosi faatasi ai ma le faamaoni e koleni, lea ua mafai ai ona faa faigofie fuafuaga uma i lo’u mafaufau,” o le saunoaga lea a Taalo.

 

E tele ta’amilosaga faavaomalo na fai ai Taalo ma sui o Amerika Samoa, lea fo’i na ia manumalo ai i pine mo le tapuaiga a le atunu’u.

 

O ni isi o ia ta’amilosaga faavaomalo e aofia ai le ta’amilosaga lea sa faia i Samoa i le amataga o le tausaga na te’a nei, e sauni ai au fusu a le Pasefika mo Taaloga o le Olimipeka mo Tupulaga Talavou sa faia i Argentina.

 

Na fesiligia e le Samoa News le susuga a Tanoa Jr, ma ia fa’ailoa, ua ia sauni e tuuina atu le mea sili na te mafaia e fa’atino ai le fa’amoemoe.

 

Sa ia taua fo’i lona faanaunauga o lo o i ai, ina ia fa’asa’o le mea sese na tula’i mai i ta’aloga a le Pasefika sa faia i Papua Niu Kini i le 4 tausaga talu ai, ina ua faiaina i lana ulua’i fusuaga ma le maua ai se pine mo Amerika Samoa i fusuaga.

 

E pei ona silafia, e na o Tanoa Jr lava le tama fusu na fai ma sui o Amerika Samoa i Papua i le 2015. E le i manuia le taumafaiga a Tanoa Jr mo se pine ina ua faiaina i lana ulua’i fusuaga i le ali’i mai Papua Niu Kini.

 

I le taimi nei, ua ta’utino Tanoa Jr e le tatau ona toe tupu lea tulaga, ae tatau loa ona ia faia le mea sili ina ia maua ai se ‘ai mo le tapuaiga a le atunu’u.

 

Na fesiligia fo’i e le Samoa News le susuga ia Mataafa e tusa ai fo’i o lana tapenaga. Na taua e Mata’afa e fa’apea, ua atoatoa lona malosi ma ua leva fo’i ona tapena mo ta’aloga i Samoa.

 

“Ou te iloa e le faigofie lenei ta’amilosaga, o le a aofia ai tama fusu lelei ma le ta’utaua mai atunu’u eseese o le Pasefika, ae o lo’u taofi, afai lava sa faamaoni le tagata fusu i lana tapenaga, o ia fo’i lena e mauaina le manumalo,” o le saunoaga lea a Mataafa.

 

Ina ua fesiligia e le Samoa News pe ua atoatoa lana tapena aemaise ai o lona malosi, na tali le ali’i fusu, “Ua atoatoa ma lelei la’u tapenaga, o se taimi muamua fo’i lenei ua oo ai lo’u malosi i le tulaga maualuga ua i ai, talu ona ou koleni mai i ni isi o a’u fusuaga ua mavae atu.”

 

Na taua e Paepaetele e fa’apea, o se tasi o itu sa mafuli i ai tapenaga mo le ‘au fusu a le atunu’u, ia lava le malosi e fa’atino ai le ta’aloga. Sa ia taua e fa’apea, tusa lava poo le a le lelei o le tama fusu ae afai e le lava le malosi, e le mafai ona ia fa’atinoina le ta’aloga i totonu o le mae’a.

 

E tusa ai ma le polokalame mai Samoa i le fa’atinoina o ta’aloga, e na o ta’aloga fusuaga lava e fa’ataunu’uina i le motu i Savaii, i le Hall a le Aoga a Don Bosco i Salelologa. O le aso 16 ma le 17 o Iulai, 2019 lea ua fa’amoemoe e fa’ataunu’u aloaia ai fusuaga.

 

O le amataga o le masina o Iulai lea ua fa’amoemoe e amata ai loa ona gasolo le au ta’aalo a Amerika Samoa, a o lumana’i ai le tatala aloaiaina o ta’aloga i le aso 8 o Iulai mo le umi e 3 vaiaso.