Ads by Google Ads by Google

22 fa'au'u mai le A'oga Maualuga Iakina Adventist Academy

Iakina Adventist Academy High School Class of 2019.

Pago Pago, AMERICAN SAMOA — "E fanaua e le Atamai Manuia!" O le sini lea a fanau fa'au'u e to'a 22 a le Aoga Maualuga a Iakima Adventist Academy i le fa’au’uuga i le aso Gafua i le vaiaso lenei i le Fale Ta'alo o le A'oga Maualuga i Tafuna,

This year’s graduation coverage is sponsored by local company Paramount Builders, in the spirit of community service and commitment to education.

O le togisilia na maua e Lily Saifaaua Papali'i ma lana GPA e 3.97 ae o ia fo'i o le sui totino o le NHS. Na avea o ia ma Peresetene o le NHS i le tausaga e 2018. A lana sikoa i le SAT e 1250. O ona matua o Li'o Tuitama'i ma Matala Papali'i o Nuuuli.

Validictorian Lily Saifaaua Papali’i

Tulaga sa maua e Julia Antonina Ma'anaima i lana GPA e 3.84 ma lona togi i le SAT e 1220. O ia fo'i o le totino o le NHS mo le 3 tausaga ma o le alo o Tauleva ma So'ofa'atasi Ma'anaima o Pago Pago.

Salutatorian Julia Antonina Ma'anaima

Mo fa’ailoga fa’apitoa, fa'ailoga o le Togisilia na saunia e Toelafoa Semu Ta Siologa & Aiga. Fa’ailoga mo le Tulaga lua na saunia e Ausage & Associates ma Aiga. Fa'ailoga o le Amio Lelei i le vasega na saunia lea e le A'oga ma le PTA ua maua lea e Julia Ma'anaima.

O le fa'ailoga togisilia i le Mataupu fa'ale-Tusi Pa'ia na mauaina lea e Lilly Lauina. O lea fa'ailoga sa saunia lea e Tiapaleleupe Tapua'i. O le fa'ailoga mo le Togi Agai i Luma i mataupu sa tau'avea na saunia lea e Faipule Tuatalauta Samuel Meleisea na maua lea e Cluthea  Su'a Osotonu. O le fa'ailoga na saunia e FCPen & Solaita Aiga mo le sui na ausia togi sili ona maualuga i le SAT na maua lea e le tama'ita'i o Lily Papali'i.

O i latou na mauaina sikolasipi a le Malo: Lily Papali'i mo le a'oga ai i le Union College e tauavea ana a'oa'oga Fa'a-Tausima'i; ma Julia Ma'anaima e aoga ai i Walla Walla College.

O isi avanoa fa'asikolasipi sa fa'alauiloa sa aofia ai: Julia Ma'anaima ua talia e le Pacific Union College e fa'aaoga ai lana sikolasipi e $52,000. Mo Lucky Fa'alogo ua talia mai Walla Walla Colege e a'oga ma faaaoga ai lana sikolasipi e $44,000. O Lily Papali'i ua tali mai le Union College e fa'aaoga ai lana $80,000. o lana sikolasipi.

I le polokalama fa’asolo, maua upu fa'amalosiau mai le Taitai Fa'atonu Fa'aitumalo o le Ekalesia SDA i Amerika Samoa, Pr Uili Solofa, ma sa ia fa'amamafa atili ai, "O le sailiga o le atamai e te mua'i maua i le mata'u i le Atua. A le maua le atamai lea, e le mafai ona fa'apunafanau mai ai ni manuia mo oe.”

Saunoaga a le malo mai ia Lutena Kovana, Lemanu Peleti Mauga, sa ia fa'ailoa ai, "Afai e le fa'amanuia le Atua i sau taumafaiga, e leai se manuia maua fua, e tatau ona e matua galue ma saili, su'esu'e i le atamai ina ia fanaua mai ai manuia ua avea ma taui tele mo oe."

O le fofoga fa'apitoa o le vasega fa'aiuaso o le susuga le Faife'au Bro. Kili Silafau, na soifua a'e i San Francisco, Kalefonia. Na maua ana fa'ailoga maualuluga i le kosi fa'a ITT Drafting and Engineering. E ui ina tele ona fa'ailoga maualuluga, ae ua ia filifili e sailia muamua le finagalo o le Atua i ana taumafaiga uma ma ua avea ai o ia ma Faife'au lea ua ia o'o mai lana auaunaga i le Maranata SDA i Iliili.

O lana fa'amalosi na ia fa'ailoa ai i le fanau le latou sini na saunia, "E te saili le atamai mo sina vaitaimi, ona fanaua mai ai lea o manuia, o le manuia fo'i e fa'atapula'a e tusa o le tele o lau sailiga na e maua ai le atamai."

“Pau le mea e ao ina faia e le tagata tausaili le atamai, o le tatalo ina ia fesoasoani mai e le Atua ia te oe, ma tauivi i ai i lau sailiga. O le tagata e onosa'i i mea e tiga ai, finafinau i le tatalo e maua e ia manuia."

E tolu mea na ia fa'amanuia ai i le vasega fa'aiuaso, "Ia fa'amanuia Ieova le Atua ia te outou, e tuu avanoa fo'i le Atua i a outou taumafaiga fita, ma ia fa'asaga mai fofoga o Ieova ia te oe ma tu'uina mai ona manuia ia te outou uma."

Na tutulai Lily Papali'i mo lana upu fa'afetai i matua mo le latou tausiga ma le fa'afailele mai oi latou uma mai le laiti se'ia o'o mai ina avea i latou ma fanau talavou, ua luia nei mo le fa'amoemoe, ia saili le atamai e fanaua mai le tele o manuia. O lana fa'afetai fo'i na o'o i le Iakina Academy ma faia'oga. E le gata i lena a'o latou ekalesia sa totoina le fatu o le amiotonu i o latou talavou taumafai.

Sa saunoa foi Julia Ma'anaima, peita'i o le fa'atofa ma le latou fa'afetai i matua ma aiga, ma latou uo mamae, sa fai lava si faigata i o latou loto talavou.

"O le ala ua magalua, o le isi ala e to'atele i latou ua savavali ai, aua ua laulelei ma ua molemole, peita'i o le ala gaoa e le o faigofie ona uia, ua to'agaogao lava i latou e mafai ona uia. O lea le ala tonu e taunu'u i manuia sautualasi, e ui ina faigata ma le uia e nisi, ae ia tatou iloa o le luiga lea ina ia tatou uia ma sao ai i manuia ua fa'ailoa mai e le tatou sini ia i tatou."