Ads by Google Ads by Google

205 fanau fa'au'u mai le Samoana High 2019

Samoana High School Class of 2019

Pago Pago, AMERICAN SAMOA — E to'a 205 le fa'auu mai le vasega fa'ai'uaso 2019 a le Aoga Maualuga a Samoana. O le 'au'au o le latou fa'amoemoe, "Ina ia mafaia mea tetele, e ao ina e moemiti ma e talitonu i ai!"

Mai le vasega faaiuaso e to'a 33 i latou sa auai i le Soaiete a le fanau a'oga e maualuluga o latou togi i mataupu.

O tala o fa’auuga o lenei tausaga a le Samoa News o lo’o lagolagoina e le Paramount Builders Inc.

Ma o le togisilia i le vasega fa'aiuaso, o Morgan Ulu, o le alo o Rev. Iasepi ma Leone Ripley-Ulu o le EFKAS i Fagatogo. O lana GPA e 4.0. O togi SAT e silia i le 1000 ma e tulaga tolu lana togi lea i le fa'asologa o i latou na togi maualuluga i le SAT. O lana ACT e silia i le 20+ e tulaga lua fo'i lona togi lea i le fa'asologa o i latou na su'ea lea suega i lana vasega fa'aiuaso. O togi i le ASVAB na tulaga lua o ia. Ua tuuina atu i ai le fa'ailoga a le Rotary Club of Amerika Samoa, ua agava'a fo'i o ia i le fa'aiooga a le PTA mo le togisilia. O lo'o malaga atu fo'i o ia e tauva i le fa'aaliga o galuega fa'atino a le Tala Fa'asolopito i Amerika. Ua talia o ia i leIunivesite o Hawaii ma o le a ia tau'avea Kosi fa'aInisinia.

Valedictorian Morgan Ulu

Tulaga lua ia Margaret V. West mai le nu'u o Afonotele. O ona matua o Cory & Folole West o Afonotele. O le totino o le NHS ma o lona GPA 3 3.989, o ia fo'i o se totino o le HOSA. O lona togi SAT e 1000+. E tulaga lua lona togi na maua i le ACT 20+. E tulaga lua fo'i lona togi na maua i le SAT. Ua ia mauaina le fa'ailoga o le Tulaga Lua mai le PTA. Ua talia o ia i le Dixie State University, ma o le a ia tau'avea ai a'oa'oga "Fa'atusitala".

Salutatorian Margaret V. West

O le fofoga fa’apitoa o le aso o le tama'ita'i Inisinia a le ASPA, Edna Asalele Noga. O lana augani muamua lava i le vasega fa'aiuaso, "Ia aua ne'i galo ia te oe lou taule'ale'a ina ia e ava i ou matua ma e mata'u i lou Atua."

Sa ia saunoa, "Afai e te fia faia mea tetele, e ao ina e matua talitonu i ai! Sa matou fia maua se faleta'alo fa'apenei i le Laumua i le matou tausaga 1994, ae le'i maua, peita'i na matou talitonu e i ai le aso e mafai ai ona tula'i se fale fa'apenei, ae o taimi ua matou le i ai i le laumua nei. Fa'afetai i ta'ita'i o le Malo, aua sa fa'aulu le talosaga i le matou tausaga 1994, ae o lenei 25 tausaga ua tuana'i ae ua ou tu ai ma faia lenei molimau."

E 5 mea na tima'ia e ia: “Aua ne'i galo le Atua i lau sailiga. Ia e talitonuina lau taumafaiga e mafai. Ia e filifili toto'a i le mea ua e manatu e tausailia. Ia e tumau i lau taumafaiga ma lou loto atoa. Fai le mea e tatau ona e faia, ia maua le sini ma lou fa'amoemoe na e taumafai i ai. Pau lava lau mea e fai, Ia fai le mea na e manatu e fai!"

"O le aso lenei e fa'amau fa'ailoga ai la outou taumafaiga. Ua patipatia fo'i la outou taumafaiga e i matou uma ua aofia i le fale nei. Peita'i o le aso fo'i lenei e muta ai la outou savaliga fa'atasi mai ma nisi e to'atele o la outou vasega fa'aiuaso. Ole fautuaga, aua ne'i muta ai lau folauga i le aso lenei. Filifili ma fai loa, amata lau savaliga."

"Ina ia mautu lau folauga ua amata, e fa fo'i mea ua ia fa'avasega mai: Amata i le Atua lau taumafaiga; Ia manatua le fa'afetai i ou matua ma aiga; Ia e iloa ua e agava'a mo lau sailiga, aua ne'i fa'atuava'a lau va'ai ia te oe ma lou malosi ua e maua e amata ma fa'amae'a ai ou faiva.; Aua ne'i galo ia te oe le mea na e sau ai, ma lou tagata ae maise lou fa'amoemoe na mafua ai lau folauga."

O upu fa'ala'eiau a Lutena Kovana, Lemanu Peleti Mauga, na ia toe tima'ia ai le fanau fa'au'u i le taua o le faia o le filifiliga tonu, lou mautinoa o lou tagata tausaili, ma ia tausaili ma toe fo'i mai ma le tausa'afia.

"Tepa i lou itu agavale, tepa ane i lou itu taumatau, o i latou na o au uo mamae i le isi la'asaga o lumana'i o lau folauga. O i latou na o le a e talanoa ma so'otau'au i ai ou fa'amoemoega. Peita'i afai e mae'a au taumafaiga uma, o i latou na e tu'ua iinei, i lou aiga ma lou atunu'u ae maise lau ekalesia, o i latou lava na e te toe fo'i mai i ai. Afai e te fo'i mai, fo'i mai ma le manuia, ia fa'ataunu'u au miti uma, ona ua e talitonu a'ia'i i ai."

E to'a 12 i latou na maua faailoga sikolasipi mai le malo mo iunivesite i fafo male ASCC.