I le aso Faraile talu ai i le aoauli sa fa'atasia ai le Galeai Cancer Foundation i lona Komiti Fa'afoe ina ia latou taua'aoina atu le tinoitupe ua mafai ona maua mai mo i latou sa talosagaina se fesoasoani ina ia fesoasoani ia i latou a'o fetaiai ai ma togafitiga o le Kanesa.

E to'a 15 i latou ua fa'amanuiaina latou talosaga, ma ua aofia i latou i le tufatufaga muamua o se vaega tupe ua toina mai e le Galea'i Cancer Foudation e fesoasoani ia i latou. Peita'i o le punaoa ua mafai ai nei ona fa'atupeina lea fa'amoemoe, o se talosaga lea sa fa'auia i le Matagaluega o Fefa'ataua'iga (DOC) mai le polokalama fetarale, CDBG, ma ua mafai ona fa'amanuiaina lea talosaga.

O le fa'afetai ona o lea fo'i vaega o le Malo i lea ituaiga o talosaga ua avanoa mai mo le Galea'i Cancer Foundation e talosaga ai, ina ia fesoasoani ia i latou ua lutia i lenei gasegase fita. Fa'afetai ia i latou na galulue punoua'i ina ia talosagaina lea seleni e fa'ailoa ai le agaga fesoasoani ma le alofa moni. Tau ina ia manuia le toe taumafaiga, aua o lo'o i ai le isi fa'amoemoe ina ia toe taua'aoina fo'i se isi vaega o lea seleni o totoe mo nisi sui e talosaga atu.

Ua le gata ina taua'aoina atu lea seleni i sui uma, ae na tapena fo'i le Galea'i Cancer Foundation mo se 'aiga fiafia fa'atasi ma i latou uma e to'a 15, sui fo'i o le Matagaluega o le DOC i le vaega o Grants ma pa'aga ma le Komiti Fa'afoe a le Foundation sa mafuta fa'atasi i lea aoauli i le Paradise Pizzas i Nuuuli mo le fa'amoemoe.

Na saunoa se tasi o i latou na agava'a i lenei fesoasoani, "Ou te fa'afetai, aua o togafitiga e faia uma lava i Hawaii, o le fesoasoani tupe lea ua taua'aoina e $2,000. fa'afetai o lo ua maua le fa'amama avega i le tulaga o le pasese e malaga atu ai ma toe taliu mai i aiga, ua tele lea fa'amama avega ia a'u lava ia."

Ina ia mautinoa ua fa'amanuiaina fo'i sau talosaga e ao ina fa'aulu sau talosaga i le Galea'i Cancer Foundation. Ua fa'ailoa fo'i o nei talosaga sa fa'auluina i le tausaga ua te'a i lona fa'ai'uga. Ua matauina lava le aoga o le Galea'i Cancer Foundation i le to'atele sa mua'i talosaga ma latou tali mai talu mai le tausaga e 1992. E fesuia'i lava ona peresetene peita'i o lenei vaitausaga ua tula'i mai ai le susuga Apisa Pete Galea'i e avea ma Peresetene.

O i latou ua taua'aoina i ai lenei foa'i, ua fa'amaonia lava o lo'o fitaituga i togafitiga i lenei vaitau.