Ads by Google Ads by Google

132 fa’au’u mai le Kolisi Tu’ufa’atasi a Amerika Samoa


Vasega o tama'ita'i ua tofu maua tusi pasi mai le Kolisi Tu'ufa'atasi a Amerika Samoa i le fa’auuga i le aso Faraile ua te’a. [ata: Leua Aiono Frost]

O se vaaiga i nisi o alo ali'i o le atunu'u ua mae'a umia tikeri mai le Kolisi Tu'ufa'atasi a Amerika Samoa i le fa’auuga i le aso Faraile ua te’a. [ata: Leua Aiono Frost]

O le tamaita'i fa'atonu o Kosi Fa'a-Tausimai a le ASCC Lele Ah Mu ma le vasega o tama'ita'i tausima'i pasi i lenei tausaga mai le Kolisi Tu'ufa'atasi, malo le tauivi i lenei tausaga, toe tima'i atili. [ata: Leua Aiono Frost]

E to'a 132 fanau fa'ai'uaso na taua'aoina o latou tusi pasi ma tikeri i le fa’auuga a le Kolisi Tu’ufa’atasi a Amerika Samoa i le aso Faraile ua te’a.

 

Peitai e to’afa i latou sa ese mai ai latou fa'ailoga e fa’auu mai i nisi kolisi i Amerika, ae sa savalia le solo o le fa’auuga a le ASCC. Tikeri BA i le Social and Criminal Justice o Litia Ti ma fa'ailoga Masters in Education mo Pola Faleupolu-Malosi ma Iloga Utuone a'o le Master of Health Administration mo Denise A. Tuitoelau.

 

O lenei fo'i le ulua'i faau'uga a le ASCC sa faia i lo latou maota fou Multi Purpose Center.

 

E pei ona tima'ia e le failauga fa'apitoa na filifili, le afioga le Lutena Kovana, Lemanu Palepoi Mauga, o se tasi o tama fa'au'u mai a le ASCC ao le'i malaga atu i fafo ma fa'aauau ai ana a'oa'oga, ae maise o lana tautua fo'i i le US Marines ma soso'o ai ma le US Army, "Ia tautuana, o outou lea ua tatalaina lenei maota fou, ia outou toe fo'i mai e totogi a outou aitalafu e ala i la outou tautua i le atunu'u ma ona tagata!"

 

O le sauniga na tatala e le Fa'afeagaiga Rev. Iasepi Ulu ma ia fa'amanatu ai le tovine na toto ai le vine ae ola a'e ai ma le titania. E le'i manatu le e ona le tovine ina ia se'i ese le titania ina ua ola fa'atasi ma le vine. "Tu'u pea e ola fa'atasi, a o'o i le seleselega, ona maua lea o fua, ma iloga ai le titania o le a se'i ma susunuina, ae selesele fua lelei o le saito ma teu i o'u falesaito."

 

"O le aso lenei o le seleselega, ua iloga ai fua sa luluina,” o le toe tima'i lea a le Auauna a le Atua mo le vasega fa'aiuaso.

 

O le upu mai le Peresetene o le Kolisi, Dr. Rosevonne Pato, sa ia fa'ailoa le agaga fa'afetai, ina ua ausia fo'i e le Kolisi Tuufa'atasi ona fa'atino se miti ua leva o tu'upoina mai, ae ua va'aia fo'i ma iloga mai, e i ai mea e ao ina fa'aleleia pe afai e fa'aauau ai pea ona faia fa'atasiga tetele fa'apenei i le fale fou lenei.

 

Na ia fa'alauiloa fo'i le fa'auluuluga o le Faigamalo a Amerika Samoa lea ua tula'i mai ai se tasi o sui sa a'otauina i le Kolisi, ma o se fiafiaga lea i le loto, o le va'aia o ni fua lelei o le vine, ua fa'aaogaina e le tatou malo ma ona tagata.

 

I se saunoaga a Lemanu e avea ai o ia ma sui o le Malo, sa ia fa'atonu le fanau fa'au'u e faliu ma fa'asaga mai i matua ma aiga, ma ave i ai le latou fa'afetai. "Faafetai ia i latou aua sa latou una'ia malosi outou i a'oa'oga, lea ua outou mauaina nisi o sini o le olaga tauivi i a'oga, ia outou manatua i latou i lau fa'afetai i le aso lenei, ma aso uma e te maua ai se galuega ma e toe fa'asaga ane e fa'afo'i ia i latou ni fua lelei o lau seleselega."

 

I lana saunoaga, o le fofoga fa'apitoa na filifilia e le vasega fa'ai'uaso, sa taua ai e Lemanu e fa’apea, "E tusa o le 33 ai lenei o tausaga talu ona ou savali ma nofo mai i le nofoa o lo ua outou fa'atumuina i le aso lenei. O le aso fo'i lenei sa ou taumafai ai e faia se filifiliga tonu mo lo'u lumana'i, ae na toetoe lava a o'u le alu i fafo, ona o lo'u manatu i le tausiga o o'u matua. Peita'i, e le'i manatu o'u matua ou te nofo, na matua tagi lo'u tina aua sa toetoe a ou misia le sikolasipi mo la'u a'oga i fafo."

 

"Le Au fa'au'u, o i tatou o lo'o aitalafu le ola, ae le o ola aitalafu. O le Aitalafu o le Ola, e ao ina e alu fa'aleleia atoatoa oe e tapena ai oe mo tiute e te toe aoga ai ma totogi lau aitalafu, e ala i lau tautua, ma lou aoga i ou matua ma lou aiga fa'apea ma ekalesia, pe a e taliu mai ma le manuia."

 

Na fa'aauau lana tautalaga, "O le a'oga ina ia atamai o le pau lea o le auupega mo le lumana'i o le tatou malo, nu'u, ekalesia ma aiga.”

 

"O le lelei fo'i o tatou a'oa'oga, e mafai ai ona tatou tau fa'atutu atu i le tele o suiga fa'aonaponei ua matua fa'ateleina mai. E le o tutumau le olaga, o lo'o fa'agasolo pea lava, ma ua sau fa'atasi ma ona suiga tetele, e ono le agava'a ai i tatou ola ai pe afai o le a tatou le opogi atu i ona suiga ua fetuleni mai."

 

Na ia fa'atusaina aso ta'itasi o le olaga faigaluega i le a'oa'oga koleni a le vaega au. "E ao ina matua lelei ona teu lou moega i lou ala a'e ae le'i e alu e sauni mo le galuega. E muamua su'e fo'i e le ta'ita'i po'o lelei ona teu lou moega, a leai e toe fai lava se'ia lelei. Aisea e taua ai le teu fa'alelei o le moega? Ia atagia ai lou olaga faigaluega i aso ta'tasi, e amata i le taeao fou, ia amata mai i mea sa'o ma lelei ona fa'atulaga. O'o i totonu o ofisa po'o tiute i tua i le fanua, ia taumafai ia sa'o mea uma lava ua a'oa'oina ai oe, a i ai ni fatia o lea aso, ia gata ai i le mea na fa'atino ai, ae toe taliu mai i lou moega o lo'o mae'a ona teuina lelei ma le matagofie, e te moe lelei ai!"

 

"O outou o a taeao, a'o i matou mo nei, ia tele ni o tatou 'ai ae a le folauga i lagima a le tatou malo ma ona tagata lautele. Ao e gaiue fo'i ma tau totogi si au aitalafu lea, aua ne'i outou fuaina le tagata galue i lau va'aiga ia te ia i le tino, ae fua i le tele o lona alofa ua fa'atino ai lana tautua!"

 

Sa ia tolaulauina fo'i nisi o lona tausaga a'oga ua latou toe taliu mai ona o le taumafaiga e totogi aitalafu ae mafua uma lava, e tele lo latou agaga alofa i o tatou tagata ma lo tatou malo. O i latou ia e pei o le Peresetene o le Kolisi Tu'ufa'atasi, Dr Tuatoo Reese, Rev. Siulagi Solomona, Faleatafa Moli Lemana, Rev. John Kruse.

 

O i latou na fa'au'u e to'atele ai lava i latou na taua'aoina i ai fa'ailoga Associates of Arts e to'a 41 i latou. Associates Arts in Education e to'a 7 i latou. Associates of Arts in Accounting e to'a 11 i latou. Associates of Arts in Human Services &AA in Political Sciences e ta'ito'alua ia kosi ua faau'u nei. O le AA in Pre Law e toatasi.

 

I fa'ailoga Assciate of Sciences e to'a 53 i latou ma i latou ua taua'aoina i ai tusi pasi Certificate of Proficiency in Accounting & Eletronics e to' lua. O le vaega ua taua'oina i ai fa'ailoga o Tausimai Pasi e to'a 10 i latou ma le to'aono ua tauaaoina i ai fa'ailoga Bachelor of Education.

 

O i la'ua ua mauaina togi maualuluga mai le 3.90 - 4.0GPA o Monalisa Sera Afoa ma JunLin Du. O isi o fanau sa auasia togi maualuluga e i le va o le 3.74 - 3.89 ua maua lea e Rianna Legalo Lafaele, Emilio Rojan Banzil Fernandez ma Genesis Sasolo Lagai, o isi o ausia togi maualuluga e pasi ai mai le 3.5-3.75 ua aofia ai: Olivia Charlie Atisano'e, Celine Puipa'a Puletasi, Amy Marie Thrun, Gloria Sophia Tuiasosopo, Pauline Hardy, Kyrstene Salafaia Lin, Fa'asiu Timu Fa'alata, Saelia Camille Holmgren, William Jeronimo Leo.