O le amataga o le vaiaso lenei sa fa’alauaitele ai e le faipule o Amerika Samoa i le Konekeresi, Aumua Amata, e to'a sefulu alo o le atunu'u ua agava'a ma ua mae'a fa'aulu talosga mo avanoa e ulufale ai i A'oga Fa'amiliteri a le Iunaite Setete.

O tausaga ta'itasi e faia ai lenei filifiliga e fa'atatau lea i togi o fanau o lo'o ausia i mataupu i a latou vasega. E tatau ona a'oa'oina i a'oga maualuluga e te agava'a ai fo'i mo lea filifiliga, ae e te le tau tau'avea ni mataupu fa'amiliteri i le polokalama a le JROTC.

E ese lea e ao fo'i ina tapena e faia'oga o nei fanau tusi e fa'amaonia ai latou amio ma togi; tusi mai nisi ta'ita'i i totonu o le Malo e tamau ai le agava'a, usita'i ma le fa'alogo o i latou o naunau e fia ulufale i a'oga fa'amiliteri; fa'atasi ai ma le tala e tusia lelei e le sui talosaga, e fa'ailoa atu fo'i le maualuga o le atamai ua mae'a ausia e le sui talosaga e mafai ai ona ia fa'ailoa ona lagona naunau e fia ulufale i lea ituaiga o a'oa'oga. E fa'aulu nei pepa talosaga i le Ofisa o Aamata.

I pepa o fa’amatalaga o lo’o fa’ailoa ai e Amata i latou ua talia mo aoga fa’amiliteri.

"Avatu le fa'amalo ma le fiafia tele ia te outou na talosaga, aua ua taulimaina o outou lipoti o togi ma o outou amio fa'atasi ai ma le agaga filiga e fia fa'aauau tomai e tautua ai lo tatou atunu'u. Fa'amalo le tauata'i i a'oa'oga, faafetai i lo outou loto ia fa'aea taumafaiga a nai o outou matua o lo'o tautiga ai ina ia i'u lelei outou taumafaiga e saili le atamai ae maise fo'i o tomai e tautua ai i le lumana'i i aiga, nu'u, ekalesia ma le tatou malo pele. Fa'afetai fo'i i matua ma aiga, aua e le o mapu lava le taulogologo, tausi, fa'atonu ma tima'ia fanau ia lelei amio, ia to'aga e saili le poto, ma ia avea ma tagata amio lelei e ta'uleleia ai aiga, nu'u ma le atunu'u."

I le tausaga nei, ua iloga mai, o le to'atele o i latou ua mae'a talia mai talosaga, o sui o lo'o talosaga mo le fia auai i le A'oga Fa'amiliteri a le Fuava'alele a le Malo tele. O i latou fo'i ia e maualuluga tele togi e ulufale ai mo nei a'oga fa'apitoa a le Militeri, ma o se isi lea vala o le fiafiaga tele o le loto o Amata.

E to'aiva i latou ua talia mai i le USAir Force Academies; e to'a fitu i latou e talia mai i le US Naval Academy ae to'atolu i latou e talia mai e le US Military Academy.

Afai e fia ulufale se tasi o fanau a'oga i le US Coast Guard, e le tau mana'omia se filifiliga a le sui i le Konekeresi e ulufale ai sui agava'a i lea ituaiga o a'oa'oga. A ausia lava e le Sui togi i le su'ega a le Militeri, ua tamau ai iina lona avanoa e ulufale ai i le a'oga a le US Coast Guard.

I lenei tausaga, e leai se tasi na talosaga atu e fia ulufale i se a'oga faapitoa a le US Merchant Marine, po'o i latou e malaga fa'aauva'a i so'o se ituaiga o va'a folau.

E mautinoa lava e le faigofie le taumafaiga e ulufale i nei a'oga fa'amiliteri a vaega au eseese ma e le gafatia foi e le to'atele ona maua avanoa pe a talosaga, aua e pikia mai lava e nei a'oga fa'amiliteri, i latou ua matua agava'a i le atamai fa'apea ma le amio lelei, ua lava fo'i le onosa'i ma ia fa'ailoa le agaga tautua mo nisi e ala la i lipoti tapena mai ta'ita'i o Ekalesia, A'oga ma le atunu'u sa taua'aoina.

"Avatu le fa'amalo ia i latou ua tula'i mai e fia talosaga, ae fa'afetaia fo'i outou o tofu sao i le taumafaiga a nei fanau a'oga, ia latou ausia lea matati'a i o latou olaga a'oa'oina lelei. O le avanoa lea, o le isi faitoto'a fou e te ulu atu i ai, ma e toe milo ai fo'i mo le isi fa tausaga, pe tua ma ni a lau taumafaiga. Fa'amalosi atili, e le o toe mamao faatini o outou fa'amoemoe lelei na moemiti i ai nai o outou matua i taimi uma. I le taimi nei, ua mae'a fa'afiafiaina e outou le tapua'iga mau a matua, aiga ma faia'oga fa'apea pulega o a'oga o lo'o a'otauina ai outou, aua ua outou si'i le fale o Asomua i le mauga i le amataga o lenei tausaga. Ia manuia o outou faiva,” o se tala lea a Amata.

Lisi o le fanau ua manuia taumafaiga e aofia ai:

• Auva'a, Talalelei mai le Manumalo Academy, fa'aulu talosaga i le US Air Force; Schuster, Ben S. mai Manumalo Baptist ua fa'aulu le talosaga i le USAFA, USMA ma le USNA.

• Alofa, Aitulagi W. mai Manumalo Academy ua fa'aulu le talosaga i le USAFA; USMA & USNA. Mamea, Rachael R. mai le Manumalo Academy ua fa'aulu lana talosaga i le USAFA ma le USNA.

• Fruean, Manaiasiva mai Buena High School Arizona ua fa'aulu lana talosaga i le USAFA, USMA ma le USNA. O Nua, Dionysis mai Samaoana High ua fa'aulu lana talosaga i le USAFA.

• Wang, James G mai le Pacific Horizons i le 2018, ua fa'aulu lana talosaga i le USAFA ma le USNA.

• Mauga, Gaoa mai Nuuuli Voctech High talosaga i le USNA; Grey, Raelyn mai Fagaitua High talosaga i le USAFA ma le USNA; ma Ulu, Morgan T. mai Samoana High  talosaga i le USMA.

Ua mae'a fa'aulu nei talosaga uma ia Tesema 20, 2018 ma ua toe lava o le tali mai a nei A'oga Fa'amiliteri ona mautinoa loa lea o latou filifiliga mo a'oga fa'amiliteri e a'oga ai mo le isi tausaga a'oga o lumanai.